واشنطن تعتذر عن مقتل بمبوطى السويس فى حادث اطلاق النار بالقناه وتتفق مع اسرته على دفع 750 الف جنيه تعويض البمبوطى اسمه محمد وعنده طفلة اسمها رحمه 6 سنين ورضيع اسمه فؤاد 11 شهر تفتكروا الفلوس هتعوضهم عن محمد حتى لو كان فقير ؟؟؟
زوجة محمد (بمبوطى السويس) انا سلمت على السفيرة واتصالحت معها لان محدش يقدر يقف قدام الحكومه لكن فلوس الدنيا متنسنيش جوزى تعالوا شوفوا بنتى وهى بتسأل جدتها هو بابا فين ؟؟؟ ولا بابا هيجبلى الفانوس والكنافه زى كل سنه ؟؟؟ وانتوا تعرفوا انا حاسه بايه – عندها حق ربنا يرحمه دعواتكم ليه فى الايام المفترجه دى وان ربنا يبارك فى عياله .
الهيئة القومية للبريد اعلنت الغاء شعبة البريد من تجارة حلوان لعدم حاجتها لخريجين جددا وده تصرف صحيح جدا لان قسم مالوش شغل ومش محتاجينه افضل نلغية بدل ميطلع خريجيين مش لاقيين شغل زى مهو حاصل دلوقتى قرار موفق وعقبال مكل قرارتنا يبقى فيها وضوح وصراحه ومدام منطقيه محدش هيزعل .
طبعا عارفين السحابة السودا ايها محافظة الدقهلية عشان تمنع حرق قش الرز اللى بيسبب السحابه فرضت غرامه 2000 جند على اى فلاح يتظبط بيحرق القش خصوصا انهم وجدوا استخدامات لية وبدايل عن الحريق باعادة التدوير واستخدامه وياريت كل الناس تبطل تحرق بدون غرامات وقوانين .
ليبيا افرجت عن 128 مصرى منهم 8 كان محكوم عليهم بالاعدام من السجون الليبيه بمناسبة الذكرى ال39 لثورة الفاتح حمدالله على سلامة اخونا المصريين ونتمنى يفتحوا صفحة جديدة مع نفسهم ومع الدنيا شكرا لصاحب قرار زى ده .
خمس سنوات مرت على اختفاء رضا هلال مساعد رئيس تحرير الاهرام وده صحفى اختفى فى ظروف غامضه ومحدش عارف مكانه من 5 سنوات نقابة الصحفيين كانت عامله ندوه عنه ومعظم الحاضرين فى الندوة وعلى رأسهم اسرته تؤكد ان الامن وراء اختفائه وناس تانية تقولك ازاى ده كان فى الاهرام ودى جريده قوميه لكن الكل اجمع انه كان راجل حقانى عشان كده اعدائه كانوا كتير سواء من السلطه او من بره السلطه --- يا ترى الراجل ده مصيره ايه ؟؟ .
البحرية المصريه انقذت 81 مهاجر غير الشرعى اتعطل بيهم مركب صيد فى البحر المتوسط ااصحاب المركب اتمسكوا واتحولوا للنيابه اما براوه للبحريه بتاعتنا وبقول للمهاجرين دول اتقوا الله فى اروحكم واهاليكم الظروف صعبه اه بس مش معنى كده ان الناس تنتحر .
خبر عجيب اوى اوقاف المنصورة وزعت منشور منعت فيه الاعتكاف فى المساجد والافطار الجماعى وعقد القران بدون تصريح خلال شهر رمضان كان ناقص يمنعوا الصلاه والصيام كمان ويطلعوا قرار كمان ممنوع دخول الحمام غير باذن مسبق شوفتوا تهريج اكتر من كده .
الكهرباء عماله تقطع بشكل متكرر فى معظم محافظات الجمهورية وفترات طويله وبشكل مستفز للناس وكان رد المسئولين دة بيحصل لانه بيتم تخفيض للاحمال نظرا لان الاستهلاك وصل لمعدلات غير مسبوقة ويجب قطع التيار حتى لا تحدث كارثه بس المفروض انه بيتم بعملية دوريه يعنى ميقطعش كل يوم فى نفس المنطقة يتم فصل التيار بعملية تبادلية ---لكن طبعا ده مبييحصلش البهوات بيستسهلوا وبيفصلوا عن القرى ومحافظات الصعيد وبعض مدن الدلتا .
فى عبارة غادرت متجهة لميناء ضبا السعودى وفى نص السكة القبطان خد قرار بالعودة لسوء الاحوال الجويه وكان على متنها 800 راكب طبعا هى عطلة للناس بس اما براوه للقبطان لان محدش كان هيرحموا لو كان كمل زى الناس مكانت عايزة وممكن اصلا كانت اتكررت المأساه اياها .
البنك الدولى بيقول ان اقتصادنا فى تحسن ملحوظ وفى اصلاحات كبيره وواضحه وان بلدنا من اكتر الدول الجاذبة للاستثمارات الاجنبيه طبعا ده تقرير كويس واكيد مش متفبرك بس نتمنى ان اثار الاصلاح دى تظهر على المواطن البسيط مش على النص % بس .
هشام طلعت مصطفى يواجه عقوبة الاعدام بعد اتهامة بالتحريض على قتل سوزان تميم طبعا التفاصيل فى كل مكان بس بصراحه انا زعلان ليه غرائزنا ونزواتنا توصلنا لكده ليه نضيع كيانات اقتصاديه بسبب شهوات شخصيه ليه نلوث سمعتنا وسمعة اهالينا واولادنا عشان عاهرات على العموم نحمد الله على وجود قضاء عادل ونائب عام محترم ويجب ان ينال المخطىء عقابه .
الرئيس مبارك يأمر بارسال مساعدات غذائيه لاثيوبيا للتخفيف من اثار المجاعه ناس تقولك ياعم هو احنا لاقيين ناكل طب نساعد جوه بدل بره بقولهم اتقوا الله اللى يتابع مجاعات افريقيا ويقرب من الحاله اللى هناك يحمد ربنا على نعمة الستر البلاد دى محتاجة لكل كسرة خبز وبلاش ننزع الرحمه من قلوبنا وتبقى نظرتنا انانيه اوى اما براوه يا سيادة الرئيس.
تصرف محترم ومثالى حصل من 3 لوءات شرطه – الحدوته ان فى سيده كبيره فى السن ماشيه فى ميدان الجيزه وقعت واصيبت بحالة اغماء جرى لواء جابلها كرسى وقعدها وفوقها وعرف قصتها انها كانت رايحه تصرف المعاش كلم لواء تانى صرفلها المعاش وواحد ثالث كلم اسرتها ووصلوها لبيتها معززه مكرمه هو ده الوجه اللى نحب نشوفه بلاش الوش التانى اما برواه للرجال اللى بيحترموا المواطن المصرى .
بلدنا دى ناسها سكر خبر لذيذ اوى استاذ علم اجتماع فى جامعة القاهره انشأ جمعيه اسمها ( الرأس الاملس) دى جمعيه للصلع هههههه اه والله هدفها انها تواجة الاثار النفسيه المترتبه على اصابت الانسان بالصلع ونظرة المجتمع ليه واية الموضوع جد جدا ومقسمين الصلع 5 فئات وبتاع والذ فئه فيهم فئة المنتسبين دى للناس اللى شعرهم بدأ يسقط ويسحب على ورا وفى المستقبل هيبقوا صلع – والله شعبنا ده تحفه وسكر .
كل لحظة وحضراتكم طيبين وكل رمضان وانتوا بخير ومصر حبيبتنا احسن واكثر أمن وازدهار وكلمه ورد غطاها رمضان يااخونا للدين مش للتين وقمر الدين .
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
واخيرا وليس أخرا مصر هتفضل غالية عليا.
ال ن ســـــــــــــاج
ليست هناك تعليقات:
إرسال تعليق