اخبار بلدنا فى 12 يونيو
تشريعية الشعب تحذف جريمة الاحتكار من قانون غسيل الاموال فى اجتماع استغرق 7 دقائق—دة لو كانوا بيتفقوا على ربع جنية كانوا خدوا وقت اكتر من كدة .
انتهاء المرحلتين الاول والثانية من المتحف الكبير والمرحلة الثالثة والاخيرة بحلول 2011 – دة صرح كبير على ارض بلدنا اما براوه لكل من ساهم وشارك فية الحقيقة حاجة مشرفة وتليق بمصر .
سفيرة امريكا تعتبر نفسها محظوظة بالعمل فى أم الدنيا وتسأل مصيلحى عن المظاهرات فيرد سيادة الوزير : بأنها لاتعبر عن الواقع --- وانا مع سيادة الوزير لانها مش بتعبر عن الواقع بس دى بتعبر عن الكوسة والبامية والرشوة والفساد والمحسوبية والنفوذ والاحتكار وكل المفردات اللى لسة هتجد واللى انا معرفهاش ماشاء اللة بلدنا سلطة .
رئيس القابضة لكهرباء مصر (( يجبوها يمين يجبوها شمال احنا أبرياء من وفاة أطفال مستشفى المطرية )) الراجل جاب من الاخر فين المولدات الاحتياطى فين بطاريات الحضانات فين الناس المسؤله لما الكارثة دى حصلت .
وزير الزراعه السودانى (( مشروع عملاق بين مصر والسودان لزراعة القمح خلال الشتاء القادم لتلبية احتياجات البلدين فى اقرب وقت )) دايما بحب اعمل زووم على اى خبر بخصوص الموضوع دة لانه حاجة حلوة الحقيقة تعاون حقيقى بين بلاد وادى النيل تعاون فية خير للكل وفكرة جامدة جدا ويارب تتم على خير وميبقاش فيها أنه .
اعترف السفير احمد القويسنى مساعد وزير الخارجية بعجز السفارات المصرية عن تقديم الرعاية اللازمة لجاليتنا بالخارج نظرا لنقص قواعد البيانات وحمل المسؤلية للسفارات وللمواطنين ---- الخبر دة اهميتة ان بداية حل اى مشكلة هو الاعتراف بالمشكلة تانى حاجة هو العثور على اسباب المشكلة ودة كمان موجود فى التصريح الثالث بقى هو ايجاد الحلول وياريت بقى منجيش عند الخطوة الثالثة ونقف الوزارة تشد على سفارتها والناس يبقى عندها وعى وتروح تسجل نفسها .
ابو العينيين (( عقود تصدير الغاز بها بنود سرية لا يمكن لفهمى او غيرة افشاؤها ))—ومالة بس لية ؟؟؟ سؤال منطقى يعنى انتى تبيعوا الغاز بتاعنا اللى هو ملك الشعب المصرى يعنى محدش ورثوا من جدوا الباشا وتقولوا فى بنود سرية الناس دى بتتكلم مع هبل ولا فاكرين الشعب ساذج.
الرئيس يدعو لحملة قومية للتعامل مع القضية السكانية وقال (( المصريون بنوا الاهرامات وعددهم مليون نسمه )) – هى المشكلة فى الناس اللى بتخلف بس ولا المشكلة فى الناس اللى بتتولد ومش لاقية تعليم ولا صحة عشان بعد كدة ينفعوا البلد ومش لاقيين طرق وتخطيط عمرانى صح عشان نتوسع فى بلدنا منفضلش جوة الانبوية وبدل السكان مايكونوا عنصر سلبى يبقى عنصر ايجابى وياريت نبص على الصين والهند واحنا نفهم المشكلة فين ؟؟.
الحديد لية مبنستوردوش ؟؟؟ حديد عز فين ؟؟؟ حد يعرف يرد على الاسئلة دى لان الاجابة اللى عندى شريرة وبتهدد الامن القومى وبتروج اشاعات هدامة وبتضر برجال الاقتصاد الوطنيين الطيبين الحلوين والمعزززين المكرمين .
البحرية المصرية تنقذ 43 شابا مصريا من الغرق اثناء محاولة هجرة غير شرعية---- مش عارف اقول اية للناس ابقى قاسى عليهم ولا كفاية قسوة الحياة يااخونا اتقوا الله فى ارواحكم وفى اهاليكم وفينا وكفاية كدة اما براوة لرجال البحرية المصرية .
التفاضل والتكامل ولا مذبحة الممماليك العيال مبقتش عارفة الامتحان بيتكلم عن اية 9 نقط اللى يحل 2 ولا 3 وفى ناس هتتجنن لحد دلوقتى متعرفش السؤال التانى تفاضل ولا تكامل اللة يكون فى العون يااخونا كلنا لها .
15 سفارة اجنبية فى المعادى تطلب نقلها بعد ضم المعادى لحلوان ودة طلب منطقى لان السفارات يجب ان تكون فى عواصم الدول بس اللى مش منطقى بعض السكان اللى بدأوا يعزلوا لمجرد ان المسمى بقى تبع محافظة حلوان عشان الاسم مش استايل هههه الرفاهية انواع يظهر الناس مش حاسة باللى بيحصل فى بلدها كل مشكلتها الاسم استايل ولا لا .
40% من شباب مصر يفتقدون المثل الاعلى او الهدف كل طموحاتهم يتجوزوا ويلاقوا شغلانة --- طبيعى جدا الدولة بتجنى ثمار سياستها .
-(( كان نفسى الدولة تعالجنى واعيش واربى ابنى )) تلك الكلمات هى كانت امنية سيادة المستشار الشاب محمد محمود بكرى الذى وافتة المنية خارج مصر فى الصين عن عمر يناهز 32 سنة --- دة شاب مصرى شريف بيعمل قاضى فى محكمة طنطا ابتلاه الله بالمرض ورفضت وزارة العدل علاجة واعطتة 50 الف لعملية تحتاج لمليون واهدرت كثير من الوقت الى ان استطاع اصدقائة واهل الخير جمع تبرعات لة وسافر ولكن اكتشف ان عمليتة سوف تتاخر وحالتة ظلت تسوء وكان الامل فى ان يجد من يساعده ليجريها فى ارووبا او امريكا لكن ضاعت توسلات زوجتة الشابة ودموع طفله الرضيع واهله هباء ولم يسمع احد فهو لم يكن فنان او لاعب كورة اوراقصة مع احترمنا التام للجميع ولكنها مجرد امثلة رحمه اللة وألهم اهله الصبر والسلوان إنا لله وإنا الية راجعون.
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
واخيرا وليس أخرا مصر هتفضل غالية عليا.
=======================
اخبار بلدنا فى 19 يونيو
فى سابقة برلمانية لم تحدث ولن تحدث وستدخل موسوعة جينس للارقام الاحتكارية مجلس الشعب بيوافق على تعديل قانون حماية المنافسة ومنع المنافسة الاحتكارية بعد 48 ساعة بس من اقرارة وده عشان عزو باشا تقدم بتعديل ان اللى يبلغ عن الاحتكار يعفى من نصف العقوبة بس وليس الاعفاء الكامل كما كان القانون بالتالى محدش هيبلغ اصلا .
التعديل بقى اللى اقترحة سيادة النائب المحترم دة قدمة على ورقة بخط اليد قام رئيس مجلس الشعب موقع علية وقال عاجل قامت اللجان اجتمعت وعدلت القانون وهو لسة طازة وكأنها جمهورية عز المهلبية وليست جمهورية مصر العربية.
وفى انباء ان سيادة الوزير المحترم رشييد محمد رشيد تقدم باستقالتة من الحكومة لممارسات عز الاحتكارية وتدخلة فى قانون منع الاحتكار على الرغم من انة المحتكر الاول فى مصر وعلى فكرة عزو باشا مش محتكر الحديد بس دة محتكر البجاحة كمان.
قرار جمهورى بتعيين 6 روؤساء جدد للجامعات هى القاهرة وبنى سويف والفيوم واسيوط وسوهاج والزقازيق لكن فى تذمر فى الجامعات دى لان المرشحين من خارج جامعتهم ماعدا جامعة القاهرة التذمر ان اللى مسك اخو وزير الاتصالات وليس الاكفاء والاكثر نضجا والاحق فالاحق بعتوه جامعة بنى سويف .
الشاعر احمد فؤاد نجم وجورج اسحاق منسق حركة كفايا وبعض الولاد بتوع جماعة 6 ابريل حبوا يعملوا مظاهرة تاكيدا على روح الوحدة الوطنية واول منزلوا الشارع الامن راح مرجعهم تانى وحبسوهم فى دار ميريت للنشر لحد نص الليل لية محدش عارف مع ان التظاهر هدفة حلو والله وفى اللذيذ ومحدش جاب سيرة الحكومة بس هنقول اية عم نجم قالها مش انا بس اللى كنت محبوس فوق مصر كلها محبوسة .
عمال حديقة الحيوان فى الجيزة ياكلونها نظرا لتدنى اجورهم دة كان تعليق نائب فى مجلس الشعب على ظاهرة اختفاء الحيوانات - والحديقة بعد ماكانت فى المركز الثانى عالميا اصبحت خارج لائحة التصنيف الدولى .
وزير الزراعة اعلن انة سوف يستعين بخبير انجليزى لتطوير الحديقة واعادة الشارة الدولية ليها والله حلو نظام الاحتراف دة بس ياريت يكون بفايدة .
حسين فهمى فى تعليق لة على موقف وتصريحات وزير الثقافة الامور (( فاروق حسنى يلهث وراء اليونسكو بإرضاء اسرائيل )) وطبعا احنا عارفين اللهاث من صفات مين ومفيش تعليق اصل الكلام عجبنى .
غموض حول موت كلب السفيرة الامريكية بالقاهرة مسموما فى حديقة السفارة ويظهر كدة ان الكلب طفس واكل من سم الفران اللى فى الحديقة لمحاولة منع دخول الفئران وعقبال باقى الكلاب .
المستشار الخضيرى رئيس نادى قضاة الاسكندرية الاسبق فى رسالة موجهة للرئيس مبار ك(( برا بقسمك نطالبكم بمنع تصدير الغاز باسرائيل حتى لاتقوى به تل ابيب علينا )) دة طبعا اشارة للقسم الجمهورى اللى بيقسم فية الرئيس بالحفاظ على امن الوطن وسلامة اراضية ولسة عندى امل الغاز ميتصدرش دة اذا مكنش اتصدر من شهرين .
صفوت الشريف رئيس مجلس الشورى والامين العام بتاع الحزب الوطنى بيقول فى تصريح ضحكنى والله (( المصريون ينضمون للحزب الوطنى لانه الملاذ والاستقرار لهذا الوطن )) فى ممثل اسمة دريد لحام قالك السياسيون فى العالم العربى هيوقفوا حالنا لانهم اصبحوا كوميديين اكثر من المممثلين عندك حق يااستاذ دريد .
احتفلت وزارة الصحة بتحريج 240 من خريجى الجامعات للعمل بالاسعاف بالتعاون مع جامعة هال فى انجلترا دة خبر حلو وبجد واما براوة وخطة لتطوير خدمة الاسعاف المصرى اماااااا براوه .
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
واخيرا وليس أخرا مصر هتفضل غالية عليا.
=========================
اخبار بلدنا فى 26يونيو
· سرور لمنتهى السياسة على قناة المحور (( ايوه احنا ترزية قوانين – بس ترزية قوانين لمصلحة البلد والناس )) فعلا ياسيادة النائب حتى قانون الاحتكار يشهد على تفصيل القوانين وتظبيطها بس بلاش تجيب سيرة الناس فى الموضوع الا لو كان الناس بالنسبالك هما عزو باشا.
· حركة 9 مارس ((الوطنى والتدخل الأمنى وراء تراجع التعليم الجامعى)) وطبعا ده نتيجة لان امن الدولة بتتدخل فى تعيين هيئة التدريس على حسب الولاء والثقة وياسلام لو فى كارنية عضوية حزب وطنى يبقى عنب اوى و ممكن ياخد رئيس جامعه مره واحدة ولا رئيس قسم فعلا فعلا مصر بتتقدم بيهم .
· فى طالب فى الدبلوم أسمه صفوت احمد من الاقصر كتب فى امتحان العربى (( حاكم ظالم وشعب مظلوم )) وطبعا الدنيا قامت ومقعدتش وبعد مالدنيا هديت الولد قالك انا ياجدعان غلبان مقصدش الريس انا اقصد رئيس اللجنه اللى كان بيغشش العيال اللى دافعة فلوس وعشان انا غلبان ومدفعتش مرديوش يغششونى ودة بعد متحرم من دخول الامتحان سنتين
· الطالب دة بقى ناشد الريس انه يسامحوا ويخلية يدخل الامتحان عشان والدتة الغلبانة اللى بتصرف علية هو واخواته عشان يعرف يتخرج ويساعدها .
· والحقيقة كان رد الفعل ان وزير التعليم اصدر قرار بالسماح بدخولة امتحانات الدور التانى والغاء قرار الحرمان من اجل والدته وتقديرا لمعاناتها وطبعا كان فى جمعيات من المجتمع المدنى ادخلت كتير وحقوق الانسان بس تفتكروا الموضوع يستاهل الضجة دى ويستاهل حرمان سنتين من الامتحان اصلا ؟؟ على العموم كويس انها جت على اد كده .
· وزير التضامن الاجتماعى فى اجتماع مع قيادات المحليات فى مركز ابوكبير بالشرقية (( اللى هيعطل فصل الانتاج عن التوزيع هقطع ايده )) حلوة اوى البلطجة دى فى الحق الحقيقة بتعجبنى شد حيلك ياسيادة الوزير .
· نائب رئيس محكمة النقض المستشار مكى يقول (( المحكمة ارسلت 16 قرار بالفصل فى طعون انتخابيه الى مجلس الشعب ولم يتم تنفيذ سوى قرار فصل نائب الاخوان لصالح لواء امن دولة سابق يتبع الحزب الوطنى )) مهو دة مجلس الوطنى مش مجلس الشعب ياسيادة المستشار .
· انتحار طالب بسبب التفاضل وانتحار طالبة خوفا من الميكانيكا البنت انتحرت قبل الامتحان وااكيد اكيد مكنش الوضع هيختلف لو استنت لبعد الامتحان لانه كان زفت يعنى رياضة 2 شحورت العيال دة غير الفيزياء طبعا وكل يوم اعادة توزيع درجات فى مادة شكل وحاجة تقرف انا مش فاهم احنا ساكتين على وزراة التعتيم لية اة اقصد التعليم .
· مصر تحتل المركز ال40 فى قائمة الدول الفاشلة وتحسن الترتيب عن العام الماضى 4 مراكز كنا ال36 وعلى فكرة ترتيب اسرائيل ال59 يعنى بينا وبينهم 19 مركز هما احسن طبعا - دوله حضارتها 7000 سنه افشل من دولة احتلال بقالها 60 سنه لا صحيح مصر ولاده بس نسيو يقولولنا انها ولاده فشلة .
· وزارة النقل هترفع تذاكر القطارات المكيفة والمترو 25% من الشهر اللى جاى وانا راى بقى نرجع للحناطير والجمال والكارو حقيقى يعنى اهو منه توفير وحفاظ على البيئة من التلوث وبما انننا فاشلين فاشلين مش هيفرق بقى الوقت والعطلة .
· مبارة بين مساجين بحرى ومساجين المركزيه فى نهائى الداخلية علق على المبارة الكابت ابراهيم يوسف وقام بالتحكيم حكم اجنبى سودانى عشان الشفافية والقيل والقال وفازت بحرى 3 -1 وخدت الكاس الحقيقة دة الخبر العدل الوحيد اللى قابلته الاسبوع اللى فات .
· رئيس الوزراء يشطب اسم فاروق جويدة من عضوية المجلس الاعلى للثقافة بسبب مقالاته عن مافيا الاراضى ومهاجمة الحكومة اللى فرطت فى اراضى الشعب – على العموم فاروق جويدة عايش ورئيس الوزراء منسى فاروق جويدة هو اللى بيضيف للمنصب اما رئيس الوزراء المنصب اللى عمله ويظهر ان محدش بيقرا التاريخ .
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
واخيرا وليس أخرا مصر هتفضل غالية عليا.
· حركة 9 مارس ((الوطنى والتدخل الأمنى وراء تراجع التعليم الجامعى)) وطبعا ده نتيجة لان امن الدولة بتتدخل فى تعيين هيئة التدريس على حسب الولاء والثقة وياسلام لو فى كارنية عضوية حزب وطنى يبقى عنب اوى و ممكن ياخد رئيس جامعه مره واحدة ولا رئيس قسم فعلا فعلا مصر بتتقدم بيهم .
· فى طالب فى الدبلوم أسمه صفوت احمد من الاقصر كتب فى امتحان العربى (( حاكم ظالم وشعب مظلوم )) وطبعا الدنيا قامت ومقعدتش وبعد مالدنيا هديت الولد قالك انا ياجدعان غلبان مقصدش الريس انا اقصد رئيس اللجنه اللى كان بيغشش العيال اللى دافعة فلوس وعشان انا غلبان ومدفعتش مرديوش يغششونى ودة بعد متحرم من دخول الامتحان سنتين
· الطالب دة بقى ناشد الريس انه يسامحوا ويخلية يدخل الامتحان عشان والدتة الغلبانة اللى بتصرف علية هو واخواته عشان يعرف يتخرج ويساعدها .
· والحقيقة كان رد الفعل ان وزير التعليم اصدر قرار بالسماح بدخولة امتحانات الدور التانى والغاء قرار الحرمان من اجل والدته وتقديرا لمعاناتها وطبعا كان فى جمعيات من المجتمع المدنى ادخلت كتير وحقوق الانسان بس تفتكروا الموضوع يستاهل الضجة دى ويستاهل حرمان سنتين من الامتحان اصلا ؟؟ على العموم كويس انها جت على اد كده .
· وزير التضامن الاجتماعى فى اجتماع مع قيادات المحليات فى مركز ابوكبير بالشرقية (( اللى هيعطل فصل الانتاج عن التوزيع هقطع ايده )) حلوة اوى البلطجة دى فى الحق الحقيقة بتعجبنى شد حيلك ياسيادة الوزير .
· نائب رئيس محكمة النقض المستشار مكى يقول (( المحكمة ارسلت 16 قرار بالفصل فى طعون انتخابيه الى مجلس الشعب ولم يتم تنفيذ سوى قرار فصل نائب الاخوان لصالح لواء امن دولة سابق يتبع الحزب الوطنى )) مهو دة مجلس الوطنى مش مجلس الشعب ياسيادة المستشار .
· انتحار طالب بسبب التفاضل وانتحار طالبة خوفا من الميكانيكا البنت انتحرت قبل الامتحان وااكيد اكيد مكنش الوضع هيختلف لو استنت لبعد الامتحان لانه كان زفت يعنى رياضة 2 شحورت العيال دة غير الفيزياء طبعا وكل يوم اعادة توزيع درجات فى مادة شكل وحاجة تقرف انا مش فاهم احنا ساكتين على وزراة التعتيم لية اة اقصد التعليم .
· مصر تحتل المركز ال40 فى قائمة الدول الفاشلة وتحسن الترتيب عن العام الماضى 4 مراكز كنا ال36 وعلى فكرة ترتيب اسرائيل ال59 يعنى بينا وبينهم 19 مركز هما احسن طبعا - دوله حضارتها 7000 سنه افشل من دولة احتلال بقالها 60 سنه لا صحيح مصر ولاده بس نسيو يقولولنا انها ولاده فشلة .
· وزارة النقل هترفع تذاكر القطارات المكيفة والمترو 25% من الشهر اللى جاى وانا راى بقى نرجع للحناطير والجمال والكارو حقيقى يعنى اهو منه توفير وحفاظ على البيئة من التلوث وبما انننا فاشلين فاشلين مش هيفرق بقى الوقت والعطلة .
· مبارة بين مساجين بحرى ومساجين المركزيه فى نهائى الداخلية علق على المبارة الكابت ابراهيم يوسف وقام بالتحكيم حكم اجنبى سودانى عشان الشفافية والقيل والقال وفازت بحرى 3 -1 وخدت الكاس الحقيقة دة الخبر العدل الوحيد اللى قابلته الاسبوع اللى فات .
· رئيس الوزراء يشطب اسم فاروق جويدة من عضوية المجلس الاعلى للثقافة بسبب مقالاته عن مافيا الاراضى ومهاجمة الحكومة اللى فرطت فى اراضى الشعب – على العموم فاروق جويدة عايش ورئيس الوزراء منسى فاروق جويدة هو اللى بيضيف للمنصب اما رئيس الوزراء المنصب اللى عمله ويظهر ان محدش بيقرا التاريخ .
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
واخيرا وليس أخرا مصر هتفضل غالية عليا.
ال ن ســــــــــــاج
ليست هناك تعليقات:
إرسال تعليق