خايف

خايف يا غربه تنسيني ...أهلى وأحبابي وطيني

والعمر يجرى زى الطيف ...ويسيب قساوته على جبيني

دنيا وماشيه بركابها... لا هتوقف ولا تديني

عايش أسير لقمة عيشي ...وبزرع فى غيط غير غيطي

كاتم همومى وأوجاعى ...وشايل جبال على دراعي

بسرح فى أبويا وفى أمى ...يمكن ساعتها أنسى همى

ليلك يا غربه مسهرنى ...والنوم ما يخطر على عيني

مستنى يوم ما أرجع بلدى ...وااخد فى حضنى محبيني

والله فراقك على عيني ...وأسألى شوقى وحنينى

مشتاق لهرمك يا بلادي ...مشتاق لتاريخ أجدادى

عاشق لترابك وجذورى ...ووحشنى نيلك وأصولى

نفسى ألف فى حواريكى ...وكل مكان يكون فيكي

وحشونى ناسك يا بلادى ...جنبهم بتكون أعيادي

جايلك يا بلدى أستنينى ...واحلفلك بصلاتى وديني

أول ما رجلى تخطيكى ...هسجد وأبوس أراضيكى

وأدعى ربى يحميكى ...وينصرك على أعاديكى

ده يوم ما اجيلك يوم عيدي يوم أفراحى وتغريدى

هتلاقى صورتك فى دموعي ...زى ما أسمك على ضلوعى

راجع أقولك سا محينى ...سا محى وبلاش تجافينى

وخايف يا غربه تنسينى أهلى وأحبابى وطينى

أنا الغريق

اهداء لكل شهداء الهجره غير الشرعيه

============================

أنا الغريق يا أمي

أنا اللى مات جوه نفسه من سنين

أنا اللى عاش بالألم مكسور حزين

أنااللى كان غريب فى بلده وواحد من المدبوحين

كنت زيي زى غيرى حتى حلمي زي غيري وبرده راضى زي غيري والله بالقليل

مش بحلم بالكتير ولا عايز أكون أمير أنا راضي بالغفير مع نسمة عليل

حتى ده ماوصلتلوش والأمان ماعرفتهوش والعدل ماقبلتهوش والنهار بقى زي ليل

أنا الغريق

كان كل حلمى زوجه وبيت وبنتى تكبر زي زرع الغيط

وأعيش معاكوا مستور سعيد وييجي يوم وأفرح بالعيد

كان كل حلمى رضاكي يا أمى ياللى ساكنه فى روحى ودمي

أنا الغريق

بس حلمي فضل ماحبوس لا قادر يخطى ولا قادر يدوس

قلت أسافربلاد بعيده يمكن الاقى أحلام سعيده

أصل بلدى قسيت عليا حتى ولادها مارحموش اللي بيا

أنا الغريق

وعلى ضهر مركب كان الفراق وكانت الدموع سابقه الاشواق

وقولتلك راجع يا أمى وعدتلك راجع يأمى وحلفتلك بروحى ودمى

ماكنتش اعرف ان الامواج مستنيانى وان البحر غدار أناني

أنا الغريق

هيقولوا سافر وهرب هيقولوا هاجر وباع

قوللهم لأ ..... ده هو اللى أتباع.....وعمره كان ثمن الأطماع

أطماع اللى مارحمهوش وفى رزقه ماسبهوش ولا قدروا الأوجاع

سامحينى يا أما

كان بودى أعيش عشانك كنت بحلم أقدر أكون

أكون حلمك .. أكون سندك .. أكون جنبك وكله يهون

أكون بطلك .. أكون سعدك .. أكون وطنك وكل الكون

سامحينى يأما ماأقدرتش أكون

غير

غريق

أيام الغربه

فى أيام الغربه

الفرحه بتعدى عليا لا تهدي ولا تملى عنيا

وحلمى صار كابوس وقلبى وحيد محبوس

بمني نفسي بالأوهام والغربه بحور ألغام

أيامك يا غربه طااالت والشيب دق الببان ........والعمر بيجرى بينا لا فرحه ولا أمان

بشتا ق لـــ لحظة دفا وسط الجيران والقرايب

بشتاق لــــ نظرة وفا من حبيبي اللي غايب

بشتاق حتى لـــ جفا بعض الصحاب والحبايب

أيامك يا غربه طااالت والشيب دق الببان ........والعمر بيجرى بينا لا فرحه ولا أمان

نهاري زي ليلي بعد السنين والساعات

بحلم بحضن أمى وبكل الماضى اللي فات

والذكريات تلف بيا وأفوء على قلبي اللى مات

أيامك يا غربه طااالت والشيب دق الببان ........والعمر بيجرى بينا لا فرحه ولا أمان

ياعزيز عينى

فنان الشعب سيد درويش

بــــــــلدي

المبدع بديع خيري
================================

الخواطر مستوحاه من تيمة يا عزيز عينى لبديع خيرى وسيد درويش

===================

يا عزيز عينى وانا بدي أروح بلدى

بلدي يا بلدي والله مشتاق يا بلدى

سافرت بلاد وبلاد ولفيت بين العباد ما لاقيت زيك يا بلدي

ننجح مهما ننجح ونكبر مهما نكبر فراقك صعب يا بلدي

شهور وسنين بتعدى وكل يوم فى بعدك مش محسوب يا بلدي

فى الغربه قصص كفاح فيها الفشل والنجاح وياريته لمجد بلدى

يا عزيز عينى وانا بدي أروح بلدى
بلدي يا بلدي والله مشتاق يا بلدى

فى ساعة العصاري وقعدة الصحاب بحس بطعم بلدي

فى لمة الاحباب والضحك ورا كل باب بشم ريحة بلدي

فى اللف فى الشوارع وفى صوت الجوامع بشوف صورتك يا بلدي

مع اجراس الكنايس ومع فرحة كل فايز بعيش نصرك يابلدي

يا عزيز عينى وانا بدي أروح بلدى

بلدي يا بلدي والله مشتاق يا بلدى

نغضب مهما نغضب ونزعل مهما نزعل أنتى فى قلبى يا بلدي

ساكنه العين والنني وفى كل ضلع مني بتغنى بحب بلدي

ومهما كنت بعيد فى شدتك اكيد هكون جنبك يا بلدي

مع كل فرحة عيد ومع كل نصر جديد بتمنى أكون فى بلدي

يا عزيز عينى وانا بدي أروح بلدى
بلدي يا بلدي والله مشتاق يا بلدى

لما احمد مات شهيد مينا ماكنش بعيد و الكل فداكى يا بلدي

على ارض سينا أتجمعوا وفوق رملها حاربوا وأجمعوا على نصرك يا بلدي

ناس بتزرع ويا بعض ولما تحصد تدى بعض هى دى ناسك يابلدى

مذكوره فى كل دين... من أبد السنين ...بالخير والله يا بلدي

يا عزيز عينى وانا بدي أروح بلدى

بلدي يا بلدي والله مشتاق يا بلدى

مستنى يوم عيدي يوم ماأرجعلك وأيدي مليانه بالخير يا بلدي

كنانة كل عصر ...أنا بلدي هى مصر ...بصرخ بيها يا بلدي

عرابى كان البدايه وكامل نشر الحكايه وسعد لف بيها لأجل عيونك يا بلدي

عشقى ليكى مالوش حدود زيهم وزى الجدوود وده قليل يا بلدي

يا عزيز عينى وانا بدي أروح بلدى
بلدي يا بلدي والله مشتاق يا بلدى

بلدي بلد الخير والزرع ويا الطير عاشقين لأرض بلدي

حصي الأرض اللي فيكي ...غار من حبي ليكي ...وأعمل أيه يا بلدي؟

بحبك من زمان وكان نفسلي أكون فنان يحفر صورتك يا بلدي

عاشقك من سنين وغلبنى الشوق والحنين وهرجعلك يا بلدي

يا عزيز عينى وانا بدي أروح بلدى ..... بلدي يابلدي بلد الاحرار يابلدي.....بلدي يا بلدي بلد الثوار يابلدي

بلدي يابلدي بلد الاحباب يابلدي...بلدى يا بلدي بلد احفادى وولدي

===============

ال ن ســــــــــــــــاج