الاثنين، سبتمبر 01، 2008

اخبار بلدنا فى يوليو-2008

اخبار بلدنا فى 10 يوليو
في البداية وقبل الاستطراد في أخبار بلدنا ننعى إلى الأمة المصرية و الإسلامية كل من :

· استشهاد الملازم أول محمد فاروق حسن القرش على الحدود المصرية الإسرائيلية أثناء مطاردته لمجموعه من مهربين المخدرات يحاولون التسلل للأراضي المصرية – والد بطلنا قال الحمد لله انه مات شهيد وممتش عادى وعلى فكرة البطل دة لسه متجوز من شهرين بس- رحم شهيد بلدنا وقرة عين مصر محمد القرش.

· مصر كلها ودعت مفكرنا الكبير الدكتور عبدالوهاب المسيرى وعلى الرغم من خلو الجنازة من اى تمثيل رسمي إلا أن العزاء كان به بعض الوزراء و ممثل لرئيس الجمهورية يظهر إن الأسبوع اللي فات كان أسبوع الحزن ليس لمصر وحدها ولكن للأمة الإسلامية والعربية كلها رحم الله فقيدنا وجعل مثواه الجنة.
==========================

ونبتدى بقى
· في مصيبة عجيبة أوى لجنة من مجلس الشعب كانت تزور فنادق طابا اكتشفت إن بعض الفنادق بتاخد المياه بتاعتها من إسرائيل قال أية عشان ارخص وان دة في اتفاقية البتنجان آه اقصد السلام شر البلية ما يضحك طبعا اللجنة وصت إن لازم الوضع دة يتغير عشان الأمن القومي بس يظهر إن المصريين هما الخطر على الأمن القومي لكن الصهاينة وإسرائيل لا .

· و مكنش من العجيب انننا نعرف إن المصريين ممنوع عليهم الدخول من ميناء طابا وبيحولوهم على ميناء نويبع وان عبارة أهلا ومرحبا للصهاينة والاسرائيلين فقط وسلمى على السيادة والأمن القومي والدولة صاحبة التاريخ والحضارة وزعيمة العالم العربي وكل الكذب اللي إحنا عايشين فيه .

· اللي بيروح حلوان لازم يكون شاف أو على الأقل سمع عن حديقة اسمها الكازينو ودي حاجة تاريخية جدا يا أخوانا في عصور قديمة وحتى فترة قريبة لحد ما حي حلوان إفتكس إفتكاسة فريدة الحقيقة وحول الحديقة لموقف ميكروباص وسلمى على قوانين البيئة وتشريعات حماية المسطحات الخضراء وأبتسم يا أخي أنت في مصر .

· في عزبة اسمها الهلالية في إسكندرية عايزين يهدوها ليه الحقيقة معرفش فالأهالي عرفوا إن الريس فى إسكندرية عشان تخريج دفعات الكليات العسكرية قرروا إنهم يطلعوا على الطريق عشان يطلبوا منه يصدر قرار بمنع الهدد وطبعا دة جنان وكانت النتيجة إن 15 عربية امن مركزي من الحجم الكومبوا حاصرة العزبة ولا حصار المماليك ومنعت الناس من الخروج عالم بتهرج قال يكلموا الريس قال .

· نتيجة الهوجة بتاعت تسريب الامتحانات 19 واحد حرمان عشان استفادوا من التسريب و10 مسئولين تحقيق و65 واحد حرمان بسبب الغش يا بلاش اوكازيون .

· الأمريكان رموا الكره في ملعب مصر وقالوا إن مصر قادرة على تحقيق الاكتفاء الذاتي من القمح والأمر يتوقف على أولويات الحكومة يعنى لحد يقول الأمريكان مانعنا من زراعة القمح ولا سياسة مش عارف أية جابوها على بلاطة انتو ا اللي مبتزرعوش وسلمى على اللي بـــــ يستوردوا القمح وال6 مليار دولار.

· خبر جامد بقى في النص الحكومة هددت منتجين الدواجن بإلغاء الرسوم المفروضة على استيراد الفراخ لو فكروا يرفعوا الأسعار وبصراحة ياريت العين الحمرة دى تفضل موجودة على السفاحين اللي بيموصوا دمنا وقوتنا أما براوة للحكومة وعقبال الحديد والاسمنت .

· في فيلم في إيران أسمة إعدام فرعون عن حادثة اغتيال الرئيس السادات هو مسيء طبعا للرئيس وكان الموقف الرسمي لمصر على مستوى المسؤولية الحقيقة ووجهوا خطابات شديدة اللهجة لطهران وكان رد طهران إن الفيلم لا يعبر عن الموقف الرسمي لإيران وعلى العموم كل اللي ببدور حولهم الفيلم في دار الحق وربنا اعلم بمن فيهم الفرعون ومن الشهيد رحمة الله على قائد العبور وفقيد وطنه الرئيس السادات.

· الست اسكوبى دو السفيرة الامركاوية رايحة جاية تقابل المعارضة ورؤوسا المحاكم ومبتونش ودة عامل هسس طبعا في الشارع السياسي وكله بيقولك هي عايزه أية ؟ أية الغرض ؟ على العموم الأيام مفيش اقرب منها وبكرة كل شيئا يكشفن ويبان .

· نقابة الأطباء عاملة مناشدة ظريفة و عجبانى أوى بتناشد أولياء الأمور يدوروا على مصلحة عيالهم بجد ويسيبوهم من موروثات كليات القمة ويدخلوهم كليات يحتاجها سوق العمل وخاصة كليات تكنولوجيا المعلومات وأنا عن نفسي معاهم جدا في المناشدة دى لان الرزق والنجاح مش بالكللللللللللليه خالص بس مين يفهم .

· الخبر دة أنا خليته للأخر عشان دة الزغلول الكبير جريدة المصري اليوم زعلت الناس الكبار ونشرت مسودة قانون بيعد لتنظيم البث الفضائي المسموع والمرئي وكمان النت ودة طبعا بعد ما فشلوا فشل ذريع في القانون اللي عرضوه على الجامعة العربية ومش هدخل في التفاصيل كتير بس هقولكم مادة واحدة تعرفكم انننا فى عصر ما قبل الأسرات بتقولك أية بقى يعاقب بالحبس او الغرامة والاثنين مع بعض كل من تفوه بأي خبر عن سياسة عمل المؤسسة اللي هيعملوها عشان تنظم البث حدش شاف كدة في أي مكان في الدنيا انتوا متخيلين يعنى لو قلت أنها وحشة ممكن أتسجن دة إحنا مدخلناش جوه لسه عن حرية الرأي والمقدم يعنى ببساطة واحد زى حلاتى أكيد أكيد هيتسجن وبحلقة هتبقى مقبرة الشباب يا سلام على عصر الحريات والديمقراطية ما شاء الله فعلا انس الفقى وزير إعلام فوق العادة في قوانينه واقتراحاته.

هذا النقد لأنفسنا قبل ان يكون لغيرنا وهو لمسئولين وليس لأشخاص فلا يزايد احد على حب مصر فكلنا نحبها وكم أتمنى أن تكون كل أخباري بعنوان أما براوه وكم أنا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

وأخيرا وليس أخرا مصر هتفضل غالية عليا.

==============================
اخبار بلدنا فى 17 يوليو

بطرس غالى انا نادم على عملى بالأمم المتحده وقبولى منصب الامين العام - طبعا ده تصريح كان مثير جدا للدكتور بطرس غالى وكانت وجهة نظره انه لما قبل المنصب كان فاكر انه هيقدر يطور لكنه اكتشف انا امريكا مسيطره تماما على الأمم المتحده تبعا لرغباتها وكان سبب عدم ترشيحه مرة تانيه انه مكنش على مزاج امريكا وده يعتبر تصريح شجاع من سيادتك تستحق عليه كل الاحترام أما براوه .

رحيل الدكتور مصطفى كمال حلمى رئيس مجلس الشورى الأسبق ونقيب المعلمين رحيل الرجل الذى عاش صامتا ورحل هادئا رحمة الله عليه .

أعضاء مجلس محلى قنا هددوا بتجميد أعمال المجلس لأنه مالوش لازمه مدام مسؤلين الحكومه مبيحضروش الجلسات وكل ميطلبوا حد ميجيش ويظهر ان المسؤلين اللى بيدفعلهم الشعب فلوس مسؤلين عن حاجات تانية خالص غير مسؤليات المناصب تامر عايز امتحان الثانوية وبلحه عايزه عريس ومراته عايزه شاليه فى مارينا والعربيه قدمت ولازم تتغير الله يكون فى العون .

جهاز الاحصاء بيقولك ايه بقى ارتفاع نسبة البطاله بين حملة المؤهلات العليا والمتوسطه وإنخفاضها بشده عند الأميين فعلا احنا جيل 2000 ومصر داخله عصرالذرة نسب زى دى تنسف كل ملاعيب شيحه اه أسف أقصد تصريحات حكومتنا الحلوه الكميله .

باحث امريكى بن حلال خالص صعب عليه الشباب العوانس فى الشرق الاوسط وخاصة مصر قام عامل دراسه علينا وأكتشف ان عشان أتجوز محتاج ان انا وابويا نحوش دخلنا لمدة 43 شهر من غير منصرف مليم وان نسب العنوسه بقت عاليه جدا فى البنات والتقرير فى نسب ينطبق عليها كلام حليم لما قالك طريقك مسدودون مسدودون يا ولدى .

طبعا عارفين ان الخمور اتمنعت فى جراند حياة بأوامر رجل الاعمال السعودى المحترم اللى بيخاف ربنا وطبيعى ان الصحف الامريكيه تشوف ده نوع من التطرف وعدم التسامح حسب مقال نشر فى واشنطن بوست بس اللى مش طبيعى ان الاستاذ احمد الناظر الامين العام لغرفة المنشآت السياحية المصرى يصر ح ويقول (( ان هذا القرار لايغذى سوى الارهاب والتعصب )) تفتكروا بنى ادم ذى ده ممكن يترد عليه يتقاله ايه على فكره الخطر على الوطن ده مش من الناس اللى بره الخطر على الأمه من المنافقين اللى ذى الاستاذ ربنا يقول لعن الله شاربها وحاملها وساقيها وهو يقولك لا كده يبقى تطرف انا محروق دمى كفايه كده .

الحكومه وقفت العمل فى ترعة السلام اللى لو كان أكتمل العمل فيها كان هيتزرع فى سيناء 600 الف فدان و 50 مليون شجرة زتون نحب نعرف هى ايه أولويات الحكومه بتاعتنا بالظبط ؟؟؟

ماسورة مازوت تابعه لمصنع حلوان للأسمده أتكسرت تحت النيل وأتسببت ان 2 ك من سطح النيل اتلوثت ببقع زيتيه بس الحمد لله تم السيطره وكل حاجه بقت زى الفل وكل حاجه بقت زى النعناع وربنا يستر .

جهاز الاحصاء مش عاتقنا خالص ويظهر ان ده الموسم بتاعه طلع تقرير مخيف بيقولك ان المصريين أنفقوا حوالى 18.2 مليار جنية على المخدرات يعنى على الكيف والمزاج محدش بقى يقول الحكومه ولا الحزب ولا غيره احنا اهوه اللى بندبح نفسنا احنا اللى بنفرط فى صحتنا ودينا وقيمنا احنا اللى بنضيع اقتصادنا ومواردنا اللى بيعمل كده ميستهلش يعيش على أرض زى مصر .

طبعا نتيجة الثانويه العامه طلعت ومبروك للى مبسوط وهارد لك للى زعلان وعايز اقول كلمتين يااخونا لو حوشنا فلوس الدروس للعيال هتنفعهم احسن من الثانويه العامه عمر مكان الرزق بالكليه وعمر ميكون بنى ادم امكانياته محدوده والدروس هتخليه فلته كل واحد يجتهد ويشوف سوق العمل محتاج ايه منغير بعبع الثانويه وكليات القمه الوهميه خلاص مبقتش بلد بتاعت شهادات وبس أتقوا الله لأنكم انتوا اللى بتظلموا عيالكم قبل نفسكم .

الخبر دة ضايقنا جدا البنوته المجتهده هبة الله سيد عبد الحميد اللى طلعت الاولى على علمى علوم والدها توفى وهى بتستلم تكريم وزير التعليم وعرفت الخبر وهى فى الحفلة ورجعت بسرعه على القليوبيه وكان أمنيتها ان ابوها رحمة الله علية يفرح بيها لما تبقى جراحه زيه ووعدت بإكمال مسيرته وبالتفوق ولكنها اعتذرت عن حضور تكريم وزير التعليم العالى فلم تعد لديها رغبه فى الفرح رحمة الله على والد هبه وصبرهم يارب ياريت كلنا ندعى لوالدها بالمغفره دى اقل مشاركه ومننساش نقول ان محافظ القليوبيه بعتلها برقية عزاء خاصة تقديرا لها .

يظهر ان مواقف المستشار عدلى حسين محافظ القليوبية الأنسانيه لاتنتهى فقد اصدر قرار يعفى 100 الف طالب ممن سيلتحقون بالمرحلة الابتدائية من نصف المصروفات تشجيعا على تعليم الاطفال وتوفيرا على الأسر وعقبال مترجع مجانيه كامله زى زمان اما براوه ياسيادة المستشار .

عجبنى الحقيقة تصريح رئيس اكاديمية الشرطه لما قال ان واسطة الطلبه المتقدمين للشرطه هى شخصيتهم وان المجموع ليه مفاضله والطول ليه مفاضلة والحاله الاجتماعيه ليها مفاضله وما الى ذلك من الشروط ولو صدق سيادة اللواء فى تصريحاته وان الواسطه هى الشخصيه مش التلفون ولا الكارت يبقى اما براوة للداخليه .

طبعا قانون البث الوبائى او الفضائى زى مبيقولوا نشرته المصرى اليوم وطلعت تصريحات رسميه تنفى وبتقول انه لسه مشروع قانون ومسوده وبتاع ويظهر ان خلاص الكدبه ملقتش حد يصدقها واخيرا اعترفوا بيه اما نشوف بقى هنوصل فى الأخر لأيه .

هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم نتمنى ان تكون كل اخبارنا بعنوان اما براوه وكم نحن حريصون على الارتقاء بلغة الحوار والنقد حتى نكون موضوعييون فأختلافنا هدفه التكامل وليس التضاد.

واخيرا وليس أخرا مصر هتفضل غاليه علينا .

==========================
اخبار بلدنا فى 24 يوليو

رشيد السلع الأساسيه بالمجمعات الاستهلاكيه والأسواق بسعر الجملة طوال شهر رمضان يسمع من بقك ربنا ىياسيادة الوزير

أجواء الغضب تعود لدمياط بعد تصريحات سيادة رئيس الوزراء حول استمرار أجريوم فى جزيرة رأس البر بدمياط ويظهر ان توصيات مجلس الشعب مكنش ليها لازمه وكمان الحكومه رجعت فى كلامها والشعب يتفلق وأجريوم فوق الكل وعلى فكره أجريوم كمستثمر موقفه قانونى جدا وكمان معندناش شىء ضده المصيبه فى حكومتنا اللى بتجبلنا ذبالة الصناعات تتعمل على ارضنا وبسعر أوكازيون كمان .

دكتور بطرس غالى يقول نحتاج من 20 ل40 سنه لتعزيز الديمقراطيه فى مصر بس نسى يقول بعد المائه لان مفيش امل ولا بعد قرن من الزمان مش لحاجه غير لان كل مبنتقدم خطوه بنرجع 10 لورا كل منشم نفسنا يطلعلنا قانون مقلوظ كده يرجعنا لعصر السخره .

السياحه تهدد مالك جراند حياة بخفض مستوى الفندق من 5 نجوم لنجمتين اذا مرجعش يبيع الخمور تانى شوفتوا بجاحه وناس بتسعى لجهنم اكتر من كده فعلا صدقت ياسيدى يا رسول الله سيأتى على أمتى زمن القابض على دينه كالقابض على جمره من النار .

والشىء بالشىء يذكر علماء الازهر يرفضون تصريحات وزارة السياحه التى تهدد مالك جراند حياة بسبب رفضة بيع الخمور ويصف موقف الوزارة بالعجيب وغير الدستورى والمخالف للشريعه الاسلاميه نتمنى ان حد يقبى عنده عقل وبيخاف ربنا ويتصدى للمهزله دى .

عمال الغاز الطبيعى طلبوا الفتوى من دار الإفتاء حول مشروعية بيع الغاز الطبيعى لاسرائيل وكان الرد اية بقى ( نحن لانملك الخبرة الفنية ووسائل الرد على هذه الفتوى ودى مش محتاجة فتوى دى محتاجة قرار مجتمعى ) لك الله يامصر الساكت عن الحق شيطان أخرس .

طبعا مصر كانت بتحتفل اليومين اللى فاتو باحتفالات الثورة وعادة سفارتنا فى الخارج بتقوم بالاحتفال وبتدعوا كبار رجال الدوله اللى هما فيها وسفارتنا فى مورتانيا عملت كده لكن العجيب ان السياسيين المورتانيين انسحبوا من الحفل وكل واحد بيضرب كف على كف قولولى ليه قشطه هقولكم لانهم لاقوا سفير اسرائيل فى الحفل حد يصدق كده يااخونا السفير الاسرائيلى يحضر احتفالاتنا بثورة يوليو رحمة الله على الزعيم جمال عبدالناصر .

النيابة قامت بموقف محترم الحقيقة بدل متحول الصحفيين للمحكمة والجنايات حولت عشر قضايا لنقابة الصحفيين عشان تتخذ العقوبات فى القضايا دى ضد كل من أخطأ فى استخدام قلمة اما براوة صحيح .

خبر الحقيقة بيعكس المستوى اللى وصل لية الانتماء فى بلدنا واد ايه المصرى فقد الرباط المقدس بينه وبين وطنه نظرا لعوامل كتير مش مجال الحديث فيها دلوقتى الخبر بيقولك امن الدولة تحقق مع 8 مصريين حاولوا التسللل لاسرائيل بحثا عن العمل تفتكروا الولاد دول عملوا كده ليه ؟؟؟

الدكتور مصطفى الفقى (( ثورة الجياع وارده لان القاهره محاطه ب 7 مليون شخص عشوائى )) طب دول اللى بره ياسيادة النائب امال اللى جوه كام مصر معظمها جياع وتبقى مصيبه لو مش مصدقيين وربنا يستر .

25 مليون الف تلميذ فى المدارس من ابتدائى لثانوى تحولوا لمدمنيين مخدرات وتجار صغار وسلملى على جيل المستقبل ومستقبل مصر وفلاذات اكبادنا وكل الكلام اللى مممنوش لازمه ده مصر يااخونا مستقبلها بيندبح قدام عنينا واحنا كل اللى يهمنا دة قال ودة عاد وقوانين البث والتعتيم الاعلامى والمظاهرات واعتقال اصحاب الفكر الحر وسايبين تجار المخدرات والسلاح والدعارة بيبرطعوا فى البلد .

الهندوسيه دخلت مصر تحت مسمى تعليم اليوجا لا واية بتدفع فلوس كمان بتاع 2000 حنية يلا عشان بدل منعلم ولادنا القرءان ولا الانجيل ولا نوديهم جامع ولا كنيسة ولا نعلمهم يبقوا رجالة بنوديهم يتعلموا يوجا احدث موضة رفاهيه فى مصر دلوقتى فعلا من أعمالكم سلط عليكم .

دكتور مفيد شهاب فى لقاء فى الاسكندرية (( التعامل مع الاخوان محظور كالتعامل مع اسرائيل )) التصريح كله شىء مخجل لان الاخوان مهما كانوا ومهما كان وجهة نظرنا فيهم مش زى الاسرائليين الصهاينه وغير كده مفتكرش ابدا ان الحكومه اللى انت محسوب عليها سيادتك بتحظر التعامل مع الصهاينه دى بتصدرلهم الغاز وبتجبهم فى حفالات يوليو ماشاء الله تصريح لا يليق بيك ياسيادة الوزير .

طبعا نهنى ء مصر كلها باحتفالات يوليو والثورة وبعيد عن تصريحات الجهل بان الملكيه كانت افضل نترحم على قائد الثورة الرئيس الراحل جمال عبدالناصر وعلى قائد العبور الرئيس السادات ونهنىء سيادة الرئيس حسنى مبارك رئيس جمهورية مصر العربيه ونهنىء انفسنا كشعب .

طبعا الفترة اللى فاتت كانت فى حوادث كتير وشهداء كتير سواء من ابناء وبنات بلدنا تحت قضبان القطارات او فى حوادث التصادم او الغرق فى النيل او شهداء مصر من ظباط الداخلية ابطال هذا الوطن لذا نتوجه بالدعاء لهم جميعا ونتمنى على الله لهم الجنه ولنا السلامه ولمصر الازدهار.


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم نتمنى ان تكون كل اخبارنا بعنوان اما براوه وكم نحن حريصون على الارتقاء بلغة الحوار والنقد حتى نكون موضوعييون فأختلافنا هدفه التكامل وليس التضاد.

واخيرا وليس أخرا مصر هتفضل غاليه علينا .

=======================
اخبار بلدنا فى 31 يوليو

زمان كان سمير غانم يقولك الكوره فين ؟ الكوره فين؟ لكن فى 2008 شهر يوليو بنقول البنزين فين ؟؟ فى كل حته مشاكل للبنزين 80 ولا 90 وفى حتت 92 ومحدش عارفين راح فين ؟؟؟ المصيبه لا يكون هيغلى تالت يبقى حرام الضرب فى الميت حرااااام تعبنا بقى .


واخرة ازمة البنزين فى اسكندريه سوا ق ميكروباص ولد عمرة 19 سنه مش لاقى 80 بقى يحط 90 واختفى 90 حط 92 فرفع الأجرة عشان يعوض فرق الفلوس فراكب من الركاب رفض ويظهر انهم اتخانقوا فدبحه اه والله دبحه والولد مات ياعينى والراجل اللى دبحه مستقبل عياله و بيته راح حد يقولى القاتل والمقتول ذنبهم فى رقبة مين شوفتوا وصلتوا بينا لفين ؟؟

بدأووووا فى تطوير المزلقانات مهو لازم تحصل مصيبه عشان نفتكر ان فى حاجة عايزه تطوير لازم ندفع الثمن لحم ودم عشان نتحرك بس الثمن بقى غالى اوى وكتير اوى المههم انه هيطور بس يارب يطور بجد مش كده وكده.

118 أعتصام و 68 اضراب وتشريد 20 ألف وانتحار 10 ووفاة وأصابة 1005 عامل حصاد النصف الاول من 2008 ياريت الارقام دى تقارنوها بانجازتكم ونشوف مين الخسران ومين الكسبان بس من دلوقتى بقول لكم بلدنا خسرانه والله خسرانه ومحدش كسبان فيها غير اللى بينهب فيها .

بوش يطلب الافراج عن أيمن نور ويظهر انه بوش متفق مع الحكومه لان كل ما بيطلب كده ده بيبقى فى مصلحتهم وضد ايمن نور .

دار الافتاء المصرية (توريث الحكم فى مصر غير جائز شرعا) طبعا فى تفاصيل كتير فى الفتوى وان التوريث غير جائز وولاية العهد تنفع وان الدستور بيحكم الموضوع ده بس هى فتوى ريحت ناس وضايقت ناس بس مش شايف ان ليها اهميه كبيره ولا هتغير فى الواقع شىء لان اصلا فكرة التوريث مش موجوده ومن حق اى حد يترشح ومن حقنا نختار اللى يعجبنا بس.

مجموعه من الشباب بيسموا نفسهم 6 ابريل اتجمعوا فى اسكندرية واقعدوا يغنوا اغانى وطنية راحت الداخلية معتقلاهم عملا بقانون الطوارى ء اللى بيمنع التجمعات بس كان ليا سؤال اشمعنى دول بيطبق عليهم وحفلات المجون والسكر والرقص على شواطئنا اللى بضم بالالاف لا --- بس التجمع مش بيت القصيد واحنا عارفين فين الإنه.

وطبعا كل المنظمات الحقوقية بتطالب بالافراج عنهم زى العفو الدولية وفى بلاغات مقدمة للنائب العام للافراج عنهم وياريت يفرج عنهم لان حبسهم مش هينفع الداخلية والحكومه فى حاجة بالعكس هيضر بلاش كدة مش معقول الجهاز اللى بيحمينا وبيستشهد منه ابطال من كل حته فى مصر يكون جلا د على رقابينا عايزين صفحات جديدة بين الناس وبين الداخلية لانهم جزء منننا بلاش الفجوه دى ياريت يبقى فى حد عاقل يفهم كده .

المجلس الاعلى للتعليم ولجنة التعليم فى مجلس الشعب كانوا بيطالبوا بتاجيل العام الدراسى بعد رمضان والعيد وسيادة الوزير هانى هلال كان رافض لان دة صورة سيئة للاسلام وانا معاه هو مين قال رمضان نوم وكسل وخروج وسهر وفسح احنا يظهر مبقناش عارفين احنا بنصوم لية رمضان اللى كان فية غزوة بدر وحرب اكتوبر شهر عمل وجد لانه شهر عبادة شهر الدين مش التين وقمر الدين .

فى ناس كتير متعرفش اول المكفوفين وتعرف هو اد ايه ولد مكافح وطموح وعنده ارادة من فولاذ وكانت نتيجة تفوقه ونبوغة الجامعة الالمانية رفضت قبولة بحجة انه كفيف وكمان جريدة الجمهورية رفضت انه يطلع رحلة المتفوقين مع زملاؤه لنفس السبب وبكل بجاحة وعدم انسانية كان رد احد المسؤلين عن الرحلة يعنى هو لو طلع هيشوف اية يعنى ياخد فلوس احسن فاكر ان كل الناس زية ميعرفش ان شخصية طموحة زى احمد ميفرقش معها الكلام دة دة سافر امريكا وعمل دبلومه انا مقدرش اعملها ياريت المسؤلين فى بلدنا يتبنوا احمد ويراعوه ويوفروله كل اللى عايزه ومحتاجه ده اقل شىء.

وزارة الداخلية تسقط جنسية 14 مصرى حصلوا على الجنسية الاسرائيلية بدون اذن او تصريح وانا بكل سعاده وفخر اقدر اقول بالفم المليااااان اما برااوه لوزارة الداخلية وعقبال الباقى .

كل المتهمين فى موضوع العباره خدوا براءه 1034 واحد راحوا فطيس لية الاسباب كتير تبتدى بتهم الاحاله للقضاء وتنتهى بقانون فقد روحه وتعامل بالنصوص وقاضى كان الأشرف له ولنا التنحى يعنى انا اقتل 1034 شخص بسبب اهمالى وجشعى واخد براءه وممكن اتسجن عشان مخالفة مرور يعنى انا ايتم اطفال وارمل نساء وأسكل أمهات واخد براءه لكن ممكن اتسجن عشان بطير طيارة ورق على شط اسكندريه عليها علم مصر .

بس لان فى شرفاء لسه فى بلدنا ودايما فى امل ولان عندنا نائب عام محترم بكل معنى الكلمة لسة القضية موجودة ولسة الامانى ممكنه والمتهمين هيفضلوا هاربين بره ميقدروش يعتبوا مصر لمجرد حكم براءه غير مستقيم ومعادنا 3 سبتمبر مع الطعن.


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم نتمنى ان تكون كل اخبارنا بعنوان اما براوه وكم نحن حريصون على الارتقاء بلغة الحوار والنقد حتى نكون موضوعييون فأختلافنا هدفه التكامل وليس التضاد.

واخيرا وليس أخرا مصر هتفضل غاليه علينا .


ال ن ســــــــــــــــــاج

ليست هناك تعليقات: