الاثنين، سبتمبر 01، 2008

اخبار بلدنا فى اغسطس -2008

اخبار بلدنا فى 7 اغسطس

بدء تطبيق قانون المرور والغرمات شغاله الله ينور والميكروباصات اختفت من الشوارع والناس مش لاقيه مواصلات بس برده النظام كويس ومدام هيطبق على الباشا والغفير زى مهو واضح لحد دلوقتى ومفيش كوسه يا مراحب بغض النظر عن قصة المثلث وشنطة حمزه اللى فيها مستشفى وموضوع هنركن فين دى كلها حاجات هايفه وممكن فى المستقبل يختروعلنا عربيه تطبقها وتحطها فى جيبك .

من اطرف مواقف القانون الجديد ان فى ظابط محترم برتبة عقيد وقف عربية محافظ كفر الشيخ وانذره باتباع القانون وربط الحزام والا سيتم تطبيق القانون عليه بصرامه وعلى الرغم ان الظابط لسه منقول من يومين لكفر الشيخ فى الحركه الجديده وميعرفش المحافظ لكنه لما عرف لم يتراجع عن موقفه اما براوه للعقيد .

وزير النقل راح افتتح كوبرى جرجا فحط 20 جنيه تحت حجر الاساس كنوع من التفائل تصرف عجيب خصوصا اننا فى عصر الحكومه الديجيتال وبيدل على الدروشه على الاخر بس ماعلينا المشكلة ان فى خوف لحجر الاساس يتكسر عشان ال20 جند اهى تنفع تجيب رغيفين عيش ولا ثلث ك لحمه ولا حتى 10 لتر بنزين من اللى مش موجود.

فى صورة اتنشرت للدكتور نظيف وهو واقف فى طابور عيش فى اسكندرية اللى مصدق الصوره يبقى يقولى .

الحكم بحبس سعد الدين ابراهيم مدير مركز بن خلدون بتهمة الاساءه لسمعة مصر مع ان التصريحات اللى اترفع بسببها الدعوه مش شايف فيها اساءه لسمعة مصر بس هنقول ايه كلنا لها ومحدش عارف الدور على مين .

بدو سينا عملوا مؤتمر وطالبوا فيه بالافراج عن المعتقلين وتمليك الاراضى وكان رد المحافظ ان اللى شاركوا فى المؤتمر ده خارجين عن القانون مش عارف لحد امتى مش هنعرف نختار مسئول يكون مسئول ميتملكوا الاراضى مش احسن ميتملكها الصهاينه وافرجوا عن ولادهم لو مظلومين وكان هيحصل ايه لما المحافظ يقول كلمتين حلوين يثبت بيهم الناس ويحسسهم انهم ليهم قيمه بدل ميولعها كده يحاول يتعلم من اسمه ويحافظ على شعور الناس ورغباتهم مدام مشروعه .

هيغيروا لون التاكسى يااخونا خلاص وداعا للبلاك اند وايت رمز الاجره على مر العصور هيعملوه اصفر ووداعا برده للسيارات القديمة هتتعمل خردة ويسلموا ااصحابها تكاسى جديدة والفكرة محترمه الحقيقة ومن بق سواقين التاكسى القروض ميسره والدفع حنين اما براوه للبيئه والمرور ومحافظة القاهره .

سيادة الوزير احمد المغربى فى افتتاح بعض محطات المياه الجديده يظهر ان الفرحه نسيته اللى كان وقالك ايه ( بلد النيل لم تكن ابدا عطشانه والله تنفع مطلع اغنيه استنوا لسه بقية التصريح واللى بيتكلموا عن ثورة العطش هدفهم مهاجمة حكومة الوطنى فقط )) تصريح طبعا يظهر انه نوع من الدعابه او سيادة الوزير بينسى بسرعة الفيمتو ثانيه ودى تبقى مصيبه مشاهد الجراكن لسة فى الاذهان ومياة الترع هى وسيلة الشرب لمعظم سكان الاقاليم مش عشان محطتين ميه بقت الحياه سلسبيل .

الحكومه صرفت العفريت وقالت اجريوم بح شكرا ومفيش مصنع ومفيش مشروعات صناعية هتتعمل فى المنطقه دى المنطقه دى للسياحه اونلى (فقط ) مبروك لانتصار إرادة الشعب .

الدفاع بتاع ممدوح اسماعيل يطالب النائب العام بوقف النشر فى قضية العباره خوفا من التأثير على الهيئة القضائيه اللى هتنظر الطعن وكمان عشان الاعلام بيضلل الرأى العام وانا بقول للمحامى ده لو بتحب ممدوح اسماعيل وابنه خليهم يتسجنوا عشان لو مكنش هيتسحلوا .

فى وثيقه عملها مفكرين لمستقبل مصر فى ناس مش عاجبها وانسحبت من التوقيع لمجرد ان الوطنى اتبنى الوثيقه وعجبته وانا مش فاهم انتوا اية مشكلتكم بالظبط مشكلتكم اوضاع غلط وموضوعيه فى الحوار ولا مشكلتكم حزب وطنى وخلاص اللى بيدور على مستقبل مصر بيوحد الجهود لكن اللى بيدور على مصلحته بيعمل زيكم كده .

شباب 6 ابريل اللى خرجوا اتقدموا ببلاغ للنائب العام ضد نقيب امن دوله فى اسكندريه عشان سحلهم وضربهم وقطع علم مصر وبثق عليه لما ظابط يبثق على علم تفتكروا ده عقابه يكون ايه لو فعلا عمل كده .

شهيناز النجار واحمد عز رفعوا قضيه ضد عبدالحليم قنديل رئيس تحرير صوت الامه عشان نشر مقال بعنوا (سارق مصر الاول ) طبعا اللى على راسه بطحه عرف على طول وزعل وطبعا اكيد هيكسبها .

خبر طبيعى للحاله الاقتصاديه السيئه اللى بيعيشها المصريين تراجع اقبال المصريين على العمره الموسم الحالى بنسبة 30% ربنا يوعد الجميع ويفكها علينا قادر يا كريم .

فى واحده اسمها ايناس الدغيدى طبعا الناس كلها عارفاها اخر افتكاسات الست ايناس بقى انها عايزة الحكومه ترخص الدعارة وعايزة مبدا المساكنه ان الولد والبنت يعيشوا سوا من غير جواز ولما الناس هجمتها قالت يااخونا ازاى تهاجمونى هو انا بطلب حاجه قلة ادب!!!!! ده انا برفض وجود شواطىء العراه فى مصر ونسيت تقول انها بترفض لانها مش شايفه ان فى اجسام مصريه حلوه ممكن تتعرى .

الست افتكاس بقى شايفه ان الدعارة موجوده كده كده فنعملها ترخيص احسن ومعنى كده نرخص الحشيش والمخدرات برده مهى موجوده وبالمره نرخص القتل والسرقه مهى موجوده ونعيش بقى زى الحيوانا فى قلب صفايح الذباله طبعا المجتمع ورد عليه منحرفات كتير بس بالصوره بتاعت افتكاس هانم الحقيقه موردش .

وفاة الشهيد الحى المهندس ابراهيم شكرى رئيس حزب العمل المجمد الذى هاجم الملك وسجن فى المعتقالات الذى تلقى رصاصات الانجليز على كوبرى عباس صديق عبدالحكم الجراحى شهيد الاراده الطلابيه سنة 35 وفاة الاب الشرعى لقوانين الاصلاح الزراعى بن الطبقة الارستقراطية نصير الفقراء وفاة الوزير الذى تقدم باستقالته للرئيس السادات احتجاجا على كامب ديفيد وفاة الرجل الحر وفاة عاشق مصر والفقراء رحمة الله على فقيد الشعب .

هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم نتمنى ان تكون كل اخبارنا بعنوان اما براوه وكم نحن حريصون على الارتقاء بلغة الحوار والنقد حتى نكون موضوعييون فأختلافنا هدفه التكامل وليس التضاد.

واخيرا وليس أخرا مصر هتفضل غاليه علينا .
==========================
اخبار بلدنا 14 اغسطس
· هشام مصباح بن الاسكندريه جاب لمصر اول ميدالية اوليمبية فى بكين حقق البرونزية فى الجودو وزن 90 ك مبروك لمصر وشكرا لبطلنا واما براوة وعقبال الباقيين .

· رئيس محكمة النقض ورئيس مجلس القضاء الاعلى المستشار مقبل شاكر قال (التعليق على أحكام القضاء جريمه واى قاض سيظهر على الفضائيات سيحال فورا للتفتيش) لما قرات الخبر دة افتكرن مسرحية الواد سيد الشغال لما عزة بهاء بتقول لعادل امام انت شيديددد اوى مع الموظفين بتوعك !!! تصريح فوقى جدا ولاقيت الفار بيلعب فى عبى هو التصريح ده وراه ايه ؟؟

· تانى يوم راح نائب رئيس محكمة النقض المستشار هشام البسطويسى رادد على التصريح ده وقال ان تحذيرات مقبل شاكر هدفها حماية احكام وتصرفات معينه ويبقى الفار بتاعى كان عنده حق ومكنش بيلعب على الفاضى اما دة موجود فى القضاء امال اية اللى فاضل !! .

· وزارة التعليم قالت اللى عايز يدخل كادر وياخد فلوس زيادة يمتحن راحوا المدرسين رافضين من منطلق بعد مشاب ودوه الكتاب وانا بقى مع وزارة التعليم الحقيقه مهو مش معقول مدرس نص لبه وعايز ياخد فلوس كفاية انه بيطلع جيل تعبان اصلا ومدام انت متفوق وقوى فى شغلك خايف ليه ؟؟؟

· طبعا حاليا فى محاكمة الناس اللى سربوا الامتحانات شغالة وواحد من الشهود قالك انا جاتلى ورقة الاسئله فى السبت (( اللى بينزلوه من البلكونه ))ودفعت جنيه - دليفرى يعنى يابلاش والله -- وانا رأيي ان وزارة التضامن تدرس هذه التجربة الرائدة للأخذ بيها فى توزيع رغيف العيش ونستغل هذه الكوادر ونداء لكل اولياء الامور لية تدفع كتير مدام ممكن تدفع جنية بلاها دروس وقضوها سبت بجنيه .

· والبلد شغاله محاكمات بيحاكموا 49 واحد امام محكمة امن الدوله طوارىء والمجموعة دى اللى هتشيل الليله بتاعت اضراب 6 ابريل واللى حصل فى المحله الله يكون فى عونهم .

· احدث تصريحات وزيرة القوى العاملة الحكومة عندها 2.5 موظف ليست فى حاجة اليهم لما تبحلق فى التصريح تلاقى نفسك بتقول هى الحكومة ناوييين يخصخصوها وهيسرحوا الناس ولا الوزيرة بتبرر حاجة معينه وعايزة تقول احنا خيرنا عليكم فى كل الاحوال تصريح مالوش لازمه .

· اوعى تروح انترنت كافيه احدث حريه بتمنحها الحكومه بتاعتنا مااحنا فى عصر الحريات محدش يدخل على النت الا لما يمضى ويكتب استمارة فيها كل بياناته واكيد يعنى مش عاملين الموضوع ده عشان يبعتوا للمستخدم جواب شكر ولا هيبعتوله كارت معايده فى عيد النت لكن اكيد عشان لما حد الشيطان يوزه يتسحل من قفاه دة مش كلامى دى منظمات حقوقيه اتهمت الحكومة بانتهاك الخصوصية بالاجراء ده .

· هيصرفوا رواتب شهر 9 بدرى عشان رمضان وبداية العام الدراسى قرار ممتاز من السيد رئيس الوزراء والحكومة اما برواة وكل سنه وحضراتكم كلكم طيبين وبخير .

· وزير التعليم العالى اعترف فى احد الندوات ان فى تجاوزات فى امتحانات بعض الكليات وخاصة الطب لكن مفيش ابدا تجاوز فى تعيين المعيدين الجزء الاول نقولك اما برواه وتصريح شجاع وبداية لحل المشكلة الجزء التانى انا مش مصدقك وافتكر زى كتير والمحاكم تشهد .

· ولسة مع وزير التعليم العالى نجم الشباك الاسبوع اللى فات قالك اية بقى( مافيش حاجه اسمها سياسة داخل الجامعه واللى يشارك كتيار سياسى هفصله)) انا متفق معاك تماما ان داخل الحرم الجامعى مكان للعلم والتحصيل فقط بس هل دة بيطبق على الكل ولا فى استثناء اسمه حزب وطنى وانتخابات اتحادات الطلاب ابلغ رد .

· البورصه عماله تقع والمستثمرين بيطالبوا باقالة ماجد شوقى رئيس البورصة مع ان انا شايف الراجل مالوش دعوه وان كلمة السر فى الهبوط والخراب ده سوزان تميم .

· مطربة اتقتلت ومكنتش اعرفها اصلا عرفت ان اسمها سوزان تميم الموضوع مفرقش معايا ولا شغل تفكيرى لكن اللى حصل واللى تقال فى الجرايد وان رجل اعمال مصرى ورا الموضوع والبورصة بتقع وقرار بحظر النشر فى القضية خلانى اضمها لاخبار بلدنا لانها طالت اقتصادنا وعماله تخرب بيوت ناس بسبب البورصه وربنا يستر ويارب يطلع برىء بجد مش كده وكده عشان خاطر مصر اما لو مذنب يبقى دم الست دى فى رقبة كل اللى هيطرمخ علية لو متحاكمش.

· ايمن نور طول عمرى مقتنع انه كارت امريكى ومجرد صداع فى رأس القيادة فى مصر بتستخدمه امريكا فى الوقت اللى عيزاه بس مكنتش اتصور ابدا انها توصل بيه انة يبعت لاوباما يقوله انا محبوس فى مصر بتهمة تهديد حلم وريث الريس وانا مش فاهم يعنى هيعملك اية وانا لو من الحكومه يطلع عشان يعرف انه لا صداع ولا اصلا حد هينتخبة - ويكون واحد زيه رئيس لمصر .

· الخارجية بتاعتنا بينة كرامة وجابت سفراء الدول الاوربية ووجهت رسالة صارمة وعنيفة لتحسين معاملة المصريين اللى بيتقدموا للتعامل مع السفارات دى وكانت المرة دى غير اى مرة وربنا يسهل وتكون بداية اما براوة لوزارة الخارجية .

· 7300 حمار ادبحوا واتصدرت جلودهم لكن لحومهم راحت فين محدش عارف والفار اياه ابتدى يلعب فى عبى ومن حق مصر كلها تعرف اذا كان لحم الحمير انضم لقائمة الطعام بتاعنا واحنا مش عارفين عشان كل فلاح ياخد باله من حماره ولو ان ده هيسبب ازمة فى سوق الحمير وسعرة هيغلى بس مش مهم نعرف برده .

· مصيبه والنائب العام لازم يحقق ازاى تنزل نسخ من المصحف الشريف الاسواق فيها اخطاء شنيعه فين الازهر فين ااصحاب دور النشر لازم اللى مسؤل عن جريمه زى دى يتعلق مهو معندناش اغلى من المصحف نخاف ونحافظ عليه .


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.
====================
اخبار بلدنا 21 اغسطس
· مجلس الشورى اتحرق حته من تاريخ بلدنا مسكت فيها النار المبنى اللى بناه اسماعيل باشا المفتش وزير الماليه من 160 سنه ولع تفتكروا زهق مننا ولا اتخنق من سحابة الدخان اللى فى حياتنا طبعا دى تعبيرات فلسفيه لكن اعذرونى انا زعلان اوى على مبنى كان شاهد على تاريخ مصر .

· رئيس الجمهوريه امر باعادة المبنى على نفقة الدوله بعد ان تعالت اصوات من رجال اعمال بتجديدة واحياءه طبعا شعور طيب ووطنى من رجال الاعمال بس قرار موفق من سيادة الرئيس مكان زى ده يتعمل من فلوس المصريين احنا نصرف عليه بكل سعاده مش افراد .


· اسعار الحديد والاسمنت فى كل بلاد العالم انخفضت بنسبة 38% الا فى مصر لان مصر فيها قانون ان الحاجة اللى ترتفع لا ممكن تنزل الارض ابدا .

· وبما انننا بنتكلم فى الزيادات عايز اقولكم ان السلع الغذائيه فى كل بلاد العالم انخفضت بنسبه من 15 % الى 30% الا برده فى مصر عشان احنا سبيشيال مخصوص يعنى طلباتنا جامده اخر حاجة مش كماله بلغة الكشرى .

· الدهب بقى قالى هكسفك و سعرى ننزل عشان متقولش بس مفيش حاجة بتنزل وانا بقوله وانت فاكرنى زعلان انك هتكسفنى ياعم ياريت كل حاجة تكسفنى واطلع قاسم السماوى ورخم بس الاسعار تنزل والحياة تبقى بمبى اه اقصد دهبى ويلا اللى عايز يتجوز يجيب الشبكة وينتظر الفرج لحد مالباقى ينزل.

· تسمعوا عن عصير القصب اه اللى من القصب اللى بنموصه بتاع زمان ده اللى كان فى كل حته مشروب الشعب يظهر انهم احتكروه هو كمان مبقاش موجود والللى موجود الكبايه بقت بجنيه وربع اه يااخونا بتكلم عن القصب مش عن الفراوله ولا الفخفخينا دة اذا لاقيته اصلا ربنا يباركلنا فى العرق سوس والتمر هندى ويكفيهم شر الخصخصه والمحتكرين .

· طبعا كلنا ركبنا القطارات بس مش كلنا نعرف انها بتخسر سنوى مليار وشوية ليه هى ليها اسباب كتير كده مش هوجع دماغكم بيها الخلاصة ان السنه اللى فاتت خسرت 400 مليون وشويه بس يعنى انخفاض الخسائر 700 مليون وعلى 2010 هتبقى الخسارة زيرو سكر ااقصد زيرو خساير غير انها هتطور خبر لذيذ وظريف واما براوه.

· الاسكان ودمياط اتفقوا انهم يحولوا الارض بتاعت اجريوم الى نادى ومحميات طبيعيه حاجه حلوه جدا والخبر ده دليل على انتصار ارادة الشعب .

· طبعا فاكرين الارهاب اللى حصل فى التسعينات وكانت الداخليه فى الايام دى شديده حبتين فاعتقلت ناس كتير لمجرد انتمائهم للجماعات الاسلاميه واعتقلتهم وعذبتهم المهم ان الناس دى بعد مخرجت ملقتش شغل فرفعت قضايا تعويضات وكسبتها والداخلية فعلا صرفت 25 مليون جنيه تعويضات ل 1000 معتقل طبعا لا هقول اما براوة ولا هنتقد المرحلة دى محدش يقدر يقيمها مين غلطان ومين مظلوم لان لسه صورة شيماء الطفلة شهيدة المدرسة الاعدادى فى ذهنى لانها كانت فى مثل سنى يعنى لو عاشت كانت هتكون عروسه دلوقتى وكمان محدش يرضى ان حد يتعذب لمجرد الاشتباه .

· طبعا عارفين مشكلة الكادر وانا كنت مع وزارة التعليم فى تطبيقية لكن كمان مع المعلمين ان قبل ميمتحنوا يدربوا ودة بنص القانون انشاء مراكز تدريب اكاديميه للمعلمين وده شىء منطقى طبعا .

· الحزب الوطنى طلب من احمد عز توفير حديد التسليح لشباب ابنى بيتك بسعر المصنع وطبعا هيوافق ويدخلها فى الشو الاعلامى اللى محاصرنا شكر لعمو عزو.

· ارباح مجموعة عزو فى نص سنه يعنى فى 6 شهور مليار وشويه بزياده 63% خلوها مع الخبر اللى فات مجموعه واحده بقى عشان يمكن نفهم ومحدش يعمل علينا رجل البر والاحسان .

· تقرير حكومى طلع منح مصر تقدير ضعيف جدا فى الشفافيه والنزاهه حدش قال حاجه وشهد شاهد من اهلها وبعدين هتعملوا ايه بقى ؟؟؟ ولا تقرير وهيدخل الدرج .

· وزير الانتاج الحربى بيقولك مصر فى حاجة لصواريخ متوسطة المدى فقط وليس طويله حتى لا تخلق الاعداء وان الطويلة لازم يبقى فيها رؤووس نوويه عشان يبقى ليها قدرة تدميريه قوية والا ميبقاش ليها لازمه ده خبر موجود فى الجرايد والجيش خط احمر لا تعليق لانى مبفهمش فى العسكريه .

· فى حاجة اسمها اولمبياد المعلومات ودة حدث محترم وكبير جدا وعصرى وديجيتال هيتعمل فى مصر و77 دوله هيشتركوا فيه والحمد لله اسرائيل اعتذرت عن عدم المشاركه يلا فى داهيه وكويس انها جت منهم لان مصر متقدرش تمنعهم ودى شروط الاوليمبياد دى .

· خبر جامد وعجبنى بيقولك الاسكان هتعمل شقق لمعدومى الدخل ببلاش ووزارة التضامن الاجتماعى بتحصرهم دلوقتى فى كل المحافظات عشان يبتدوا فى تنفيذ المشروع اما برواه لوزارة الاسكان وكل اللى هيشارك وهنا اقدر اقول بالفم المليان عماااااااار ياا مصر .

· فقدت مصر مجند شهيد برصاص مهربى الغدر مهربى المخدرات على الحدود مع فلسطين المحتله اللى بيسموها اسرائيل وودعت نبروه شهيد رفح المجند احمد محمد الحسانين فى الجنه ان شاء الله ادعولوا من قلوبكم وافتكروه فى رمضان .

· خبر سىء بس حقيقى للاسف عن جريدة واشنطن بوست مصر واحد من اسوأ دول العالم فى نسبة التحرش بالنساء بلد الجدعنه والنخوه والشهامه بلد الرجاله والصعايده والفلاحين مصر يااخونا حالها بقى كده مش حاجه تحزن خساااااره .

· خطط تطوير شغاله فى كل حاجه كل يوم نسمع عن خطط تطوير بس هل بتطور مش عارف بس اتمنى احفادنا يشوفوا ثمرة التطوير الكلمة دى حرقانى ااصلها كل يوم نلاقيها فى كل حته تطوير تطوير بقت لبانه .

· مبروك لكل الناس اللى طلعت فى القرعه وهيحجوا السنه دى وعقبال كل اللى بيتمناها آميين .

هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.
=======================
اخبار بلدنا فى 28 اغسطس

صلاة الجمعه اللى فاتت كانت فى مطروح وطبعا فى فروق توقيت ومواقيت للصلاه الا ان شيخ الازهر اقام أذان صلاة الجمعه قبل موعده بثلث ساعه ليتناسب مع مواعيد البث التلفزيونى – هو فى سؤال رفيع بس لشيخ الازهر هى ايه لازمة مواقيت الصلاه ؟؟ وعلى كده ممكن افطر فى رمضان بدرى ثلث ساعه ولا حتى ساعه اذا كان الصلاه بنصليها قبل معادها اللى هى اهم ركن يبقى على كده الصوم ممكن بردة نظبطه احنا فى اخر الزمن فعلا يااخونا.

امتحانات الكادر الخاص شغاله على ودنه اخطاء وغش وسخط وهجوم وحاجه تكسف الحقيقة انا مع الكادر وضد التنبله بس كمان ضد امتحانات بدون تدريب واخطاء بالجمله فى الاسئله فى نائب اقترح ان الكاد يطبق على الوزير ونشوف يستاهل ياخد لقب وزبر التعليم ولا لا ودة اقتراح لطيف ياريت يطبق على الحكومه كلها تنفع تبقى حكومه ولا لا وعلى اى مسئول ينفع يكون مسؤل ولا لا وعليا انفع اكون مهندس ولا لا على الكل مش على الغلابه بس .

فى 300 فدان غرقوا فى مشروع مبارك بالسويس بمياة الصرف الصحى والمحاصيل تلفت 300 فدان بالزمه مش حرام ونرجع نشتكى من نقص الغذاء والجوع يااخونا ده كله من عمايل ادينا 300 فدان عارفين يعنى اية 300 فدان يعنى مليون و 260 الف متر مين هيتحاسب على المصيبه طبعا اللى هيحاسب على المشاريب الشعب .

فى 200 مواطن مصر عالقين فى غزة فى اوضاع زفت ليه دول مدخلوش ليه مصريين ميرجعوش لبلدهم مش من حق اى حد يمنع مصرى من دخول بلده يعنى المصريين ميدخلوش ومش لاقيين ياكلوا ومتحاصرين والصهاينه بيبرطعوا فى شرم الشيخ ودهب ويكسروا الفنادق ويضربوا العمال البلد دى بتاعت مين بالظبط ؟؟؟

تغريم 20 من مسئولى وااصحاب شركات الاسمنت 200 مليون جنيه فى قضية الاحتكار يعنى كل واحد يدفع 10 مليون جند جامد او الحكم ده وعقبال كل المحتكرين وكل اللى بيسرق قوت الشعب اما براوة لكل الاجهزة اللى ساهمت فى صدور حكم زى ده.

السيد الرئيس امر بتشكيل لجنه للتحقيق فى نتائج بكين وطالب بمحاسبة المقصريين قرار موفق عشان دمنا اتحرق مهو مش معقول تتصرف ملايين من قوت الشعب على الاتحادات والرياضيين والشعب بياكل طوب وفى الاخر محدش يفرحنا .

اغرب اعتقال سمعت عنه ضابط يعتقل رضيع عمرة سنه ونص الحدوته كانت فى الدقهليه فى واحد مطلوب راح الظابط اقتحم بيته ملقهوش لاقى عيل صغير بيعيط سال بن مين قالولوا بن اخوا الهارب قلهم هااااااااااتوه ام الطفل راحت قدمة شكوه لمدير الامن اللى رجع الطفل لامه وامر بالتحقيق فى الواقعه مع الضابط لما نبحلق فى الخبر هنلاقى ان ال2 ظباط وال2 فى الداخليه وال2 معاهم سلطه بس واحد بيفهم وقد المسؤليه وواحد مبيفهمش وعديم الانسانيه هى دى الداخليه الوحش بيسىء ليها والكويس بنشكره هو بعيدا عن الداخليه اتمنى يكون المعنى وصل .

فى جبهة اسمها جبهة علماء الازهر بتضم رجال دين افاضل الجبهة دى طلعت بيان بتطلب من الناس بالبلدى كدة بلاش تعمل عمرة كل سنه وابعت الفلوس للفلسطنيين ولا اخوانك فى الصومال او فى جزيرة مور الفلبينيه اللى بيحاولوا يطهروا المسلمين تطهير عرقى اكيد ثوابها عند ربنا افضل وانا معاااااااااهم ويارب الناس تفهم دينها صح اية الاولويات اية الاهم يااخونا الدين مش سجادة صلاة ودقن ومصحف وعمرة وحج بس الدين مش ديكور يااخونا الدين معامله الدين للحياه الدين لنصرة الحق واعلاء كلمة الله .

نقابة المحاميين انتخابتها اليومين دول 18 واحد مرشح لمنصب النقيب و400 لمجلس النقابه مش شايفين انهم كتير شويه يظهر ان محدش عاجبه حد وشايف ان هو اللى ينفع بس.

دكتور مصطفى الفقى ودة شخصية سياسيه ليها وزنها على الرغم من اننا ممكن نختلف مع بعض تصريحاته بس قال تصريح واعى قوى قال يااخونا الخطر الحقيقى على المنطقه مش من ايران الخطر من اسرائيل وانا بقوله ايون احسنت والله ياا دكتور قوللللللللللللهم احسن الاعلام لخبط الناس ومحدش بقى فاهم مين صحبه ومين عدوه.

3 مستشارين ااصحاب مراكز مرموقه جامده جدا فى مجلس الدوله تم احالتهم للتفتيش تمهيدا للتحقيق معهم وتم اعفاءهم من جميع مناصبهم ودة خبر جااااااااااااامد جدا وغير مسبوق لان لما تعرف ان حصل معاهم كده لانهم بيحابوا للحكومه وللوزراء وللمسئولين ومبيحكموش بالعدل وكل واحد ليه ملف ااد كده مليان شكاوى باستغلال السلطه والتربح تعرف ان بلدنا بخير ومحدش فوق القانون اما براااااااوه للمستشار نبيل ميرهم وصحبته والناس النزيهه الشريفه.

محافظ الدقهليه خد قرار منطقى وعملى وواقعى القرار هو الغاء حفلات الافطار الرمضانية الحكوميه ترشيدا للنفاقات والاستهلاك ايون كده مش اخد فلوس الناس ااكل بيها اعضاء المجالس المحليه والمسؤلين اللى مش محتاجين اصلا واسيب الغلابه اما براوه ياسيادة المحافظ .

منظمات حقوقيه تطعن فى قرار حظر النشر فى قضية مقتل سوزان تميم الموضوع طول دة انا كنت نسيته لولا قريت الخبر دة تبقى مصيبه يكون هو ده الهدف ان الناس تنسى مش اننا نحافظ على البورصه والاقتصاد لحد مالحقيقه تبان ربنا يستر .

فى 50 مصنع جديد لتدوير القمامه هيتم انشائهم بالتعاون بين البحث العلمى والانتاج الحربى دى حاجة محترمه ومفيده ونضيفه جدا اما براوه .

الصورة بتاع المدخن اللى على علبة السجاير عاملين منها قصة ورواية وهو مين ومش مين ونازلين تريقه على الحكومه حد يقولى فى مصلحة مين وزارة الصحه بتحاول بكل الطرق تفهم اللى مش عايزين يفهموا انهم بيقتلوا نفسهم نقعد بقى نتريق ونهجص ونسيب الاصل والمعنى ونمسك فى هيافات يلا ربنا يشفى ويهدى .


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.

ال ن ســــــــــــــاج

ليست هناك تعليقات: