اخبار بلدنا اليومين اللى فاتوا 11 سبتمبر 2008
قراصنه صوماليون يختطفون السفينه المنصوره وعلى متنها شحنة اسمنت ويطالبون بفديه – الخارجية المصريه بتحاول تخلص الناس على حسب مانشر بس لحد دلوقتى مفيش جديد ربنا يستر والقراصنه دول خاطفين 10 سفن تانيين وبيفاوضوا عليهم العالم بتاعنا ماليان افلام ولا الافلام هى اللى مليانه حقائق واحنا مش واخدين بالنا.
الدولة حاليا بتحصر كل الاراضى الصحراوية واملاكها لمواجهة التسقيع ووضع اليد طبعا تصرف تمام وكويس ويارب يبقى على الكل مش على ناس وناس .
4 ضباط شرطة ضربوا محامى فى اسوان وبهدلوه فى 1500 مواطن ومحامى اعتصموا هناك والدنيا كانت مقلوبه اليومين اللى فاتوا ومدير الامن والمحافظ اجتمعوا بالناس بس لسه الازمه شغاله ومحدش عارف الضباط دول هيتحاسبوا ولا يدوبك هنملص ودانهم ونقولهم متعملوش تانى كده يا وحشين .
نسيت اقولكم المحامى اضرب ليه كان فى القسم مع موكلته وهما رايحين على النيابه امين الشرطة اتحرش بالست المحامى عنفة راح شتمة خرج ضابط بدل ميعاقب الامين شتم المحامى وهانه فالمحامى اقلوه احترم نفسك يظهر ان الكلمه معجبتش الضابط ضربه قام 3 من صحابه الضباط حبوا يوجبوا مع زميلهم هرسوا المحامى ياعينى وجريوا وراه من القسم للشارع للمحكمه وفين يوجعك .
وافتكر ان حملة احترم نفسك ضد التحرش الجنسى معنيه بالامر ده الراجل شكله كان مقتنع بافكار الحملة لما شاف حد بيتحرش بسيده قلوه احترم نفسك .
صفط اللبن 4 ايام بدون مياه و3 قرى بالغربيه 38 يوم بدون مياه وماخفى كان اعظم والكلام ده فى رمضان حد يدينى عقله الناس هتامل وتشرب وتتوضا ازاى اتقوا الله .
افتتاح اول مدرسة تدرس اللغة الصينيه فى مصر على انغام متقولش ايه ادتنا مصر قول هندى ايه لمصر وانا مع الكلمات ومعانيها بس ياريت نفصل مابين مصر البلد والكيان ومابين الحكومه والمسئولين والا تبقى مصيبه لو الاغنيه تقصد ان مصر هى السلطه والمسئولين .
السجن المشدد من 3 الى 15 سنه ل14 متهما فى قضية تسريب امتحانات الثانويه العامه وبراءة خمس طلاب وانا شايف ان المسئول الحقيقى فى المهزله دى متحاكمش وهو وزير التعليم لانه ببساطه مقصر وغير امين وغير مدرك لحجم مسئوليته .
الكهرباء لسه بيفصلوها عن الناس فى 17 قريه فى الغربيه بتتفصل عنها الكهرباء يوميا 11 ساعه بقالهم اسبوعين وطبعا شرحنا ردود المسئولين الاسبوع اللى فات ايه سبب الازمه بس فى سؤال محيرنى انا بشترى خدمه وبدفع فلوسها لما الضغط يزيد يقطعوا عنى الخدمه ولا هما يطوروا من كفائتهم وقدراتهم ؟؟ .
الامارات العربيه المتحده تعفو عن 103 سجين مصرى فى السجون الاماراتيه بمناسبة شهر رمضان قرار موفق وشكرا للحكومه الاماراتيه ويارب دايما يبقى الخير يجمعنا والمواقف المحترمه .
الأمن السعودى معتقل مواطن مصرى لدخوله على موقع الكترونى محظور ملابسات الموضوع مش معروفه فمش عايز ادى احكام مسبقه وكلها يومين والموضوع يبان .
التضخم ماشاء الله ارتفع ل 25.6% يعنى ولا ايام الحرب العالميه الثانيه عشان بس نعرف المجهودات العظيمه للحكومه بتاعتنا .
اسعار المواد الغذائيه مرتفعة بنسبة 35.5% وده برده من ضمن جمايل الحكومه على الشعب الحقيقه مش عارفين نودى جمايلهم فين بس يعنى ياريت يحرمونا بقى من النفحات دى احسن الشعب انبسط واخر تمام واتنفخ وكله بقى مضروب فى الخلاط ومحدش بقى فاضى يحك ودنه من كتر اللف فى ساقية الغلاء والفساد وتدنى الخدمات وهو المطلوب اثباته زى مكنا بنكتب فى الهندسه لما بنحقق نظريه او بنوصل لهدف معين .
الدكتور البرادعى اعلن عن عدم ترشيح نفسة ارئاسة الوكالة الذريه للمره الرابعه قرار زى الفل الراجل بيعرف يترجم المعطايات اللى قدامه وشايف اللى ناويين عليه الامريكان ومش عايز تاريخه يتلوث بالمهازل اللى هتحصل .
===================================
الملف الكامل عن كارثة الدويقه
افقر قرى مصر ( ام الرضا)-
من هو المشير ابو غزاله
========================
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
واخيرا وليس أخرا مصر هتفضل غالية عليا.
ال ن ســــــــــــــــــاج
ال ن ســــــــــــــــــاج
ليست هناك تعليقات:
إرسال تعليق