فيلم الموسم....تزوير رغم أنفك

اعزائى محبى مصر من فترة طويلة تجاوزت العام بطلت اعلق او اكتب اخبار بلدنا ودة كنوع من الاحتجاج على نفسى قبل غيرى لانننا بنتكلم وبس ، فى كل مكان الناس لما بتتكلم وتنقد اوضاعها بيحصل نوع من التنوير لما النور يزيد يحصل تغيير الا مصر بنتكلم وبس فبطلت اتكلم وبس .

لكن مع نزول فيلم الموسم (تزوير رغم انفك) انتاج الحزب الوطنى بطولة قيادات الحزب وبمشاركة ساذجة وواضحة من الاحزاب والقوى السياسيه المصريه سيناريو وحوار عزو باشا واخراج اللجنه العليا للافتكاسات كان لازم اشارك انا كمان والا هيجيلى الضغط .

· من كام يوم حصل حاجه مشهوره وظريفه بيسموها فى اوروبا والدول المتقدمه انتخابات الاختراع ده بيعملوه فى مصر كل خمس سنين عشان الحسد

· المفروض انننا وااقصد المتفرجين يعنى الشعب نروح ننتخب نواب لينا يحاسبه الحكومة عشان متبقاش عزبة ولا تكية يتصرفوا فيها براحتهم وعشان مانخدش على قفانا

· ولما تخلص الانتخابات يقوم حزب الاغلبيه بتكوين الحكومة اللى هتخدم الشعب ، حاجه زى الفل وشىء لا يصدقه عقل الحقيقة والحياه لونها اخضر ومصر بتتقدم بينا ومتنساش كل اللى بيحصل ده من أجلك أنت ....وماحدش يسألنى مين أنت دى

· حصلت الانتخابات وناس كسبت وناس خسرت وناس بتعيد واحنا لسه بنتفرج ومؤدبين خالص وكأن الموضوع دة بيحصل فى بلد تانيه غير بلدنا

ومن مانشاتات الدعايه والاعلانات اللى صاحبة نزول الفيلم

· الشريف الانتخابات كانت حره ومحايده وشفافه ... 3 فى 1

· محافظ الاسكندرية الانتخابات تمت فى شفافية ونزاهه وبلا مصادمات ... واضح ان موضوع 3 فى 1 دة متفقين عليه اما الرد على تصريح المحافظ هو انك متردش عليه اصلا

· مشعل بكري يمارس الارهاب الاعلامى ويستقوى بالخارج.... البجاحه ليها حدود ياسيادة الوزير مش كده

· اللجنه العليا للانتخابات الادعاءات بشبهة تزوير وعدم سلامة الانتخابات مغلوطة... تقريبا دى لجنة عليا لانتخابات فى بلد تانية مش عندنا .

· قاضى فى العريش يعتذر عن ادارة الانتخابات عشان التزوير وقاضى فى البدرشين حبسوه عشان التزوير وفيديوهات ملأ السمع والبصر للتزوير وبرده اللجنه العليا بتقولك مغلوطه .... حمرا

· الناس اللى نجحت على طول جريت على مجلس الشعب تتطلع الكارنيهات عشان تلحق مكان جنب السواق

· نسبة المشاركة الرسمية 35% مع ان يااخى كل مااشوف صندوق الاقيه فاضى بس هى الاصوات كانت مخفية عشان ماتتنظرش بدليل ان الوفيات صوتت

· منع المجتمع المدنى من المراقبة ومنع موكلين المرشحين من التواجد ومنع وسائل الاعلام من التصوير ... شفافيه شفافيه فعلا

· اسامه الغزالى حرب انتخابات الشعب نكسة حقيقيه .... حزب الوفد على لسان رئيسه هننسحب من الاعاده ... الاخوان المسلمين هننسحب من الاعاده ...... يبدوا ان تترات العناوين بتاعت الفيلم اختلف عليها الشركاء والمونتاج والقص شال من مشاهدهم فى الفيلم فقلبوا على بعض

· لجان بتقفل عشان يتغدوا... لجان مابتفتحش اصلا .... لجان بتتحرق ... لجان للبلطجة ولمرشحين بعينهم ... فلوس على ابواب اللجان .... اجازات للمصانع واتوبيسات لنقل الناخبين لحساب سيادة الوزير طبعا مش وزير واحد كل وزير ... حتى نسبة المرأه فى البرلمان زوروها برده ... طفاصه طفاصه

· فتح طلعلها صوت وعلى لسان احد قيادتها انتخابات مصر انتصار لدولة الشعب وانكسار لدولة الجماعه ... فى دبانه بتزن باين

· انا مستغرب الناس زعلانه ليه اللى بيحصل دة فى مصلحة الشعب عشان مسرحية الديمقراطية تنتهى بقى ومجلس الشعب طول عمره اصلا مجلس الحزب يبقى كويس كده وكفاية استهبال واستخفاف بعقول الناس .

· بالنسبة للاحزاب والقوى السياسية المصريه االلى بتثبت فشلها يوم بعد يوم حتى فى عقد الصفقات بطلوا تضحكوا على الناس بقى وتحسسونا انكم ضحية ... مافيش ضحيه غير مصر ... احنا كمان مش ضحيه لانننا مشاركين فى الفيلم دة عشان بنتفرج عليه ههههه حتى بنكسل نصقف او ننتقد .

الحزب الوطنى .... الطفاصة وحشة ومصر كبيرة عليكم وهتقف فى زوركم مش هتتبلع

الوفد .... اللى حضر العفريت يصرفه

الاخوان المسلمين .... انتوا مش ضحايا انتوا والوطنى زى بعض الفرق ان هما اللى على الكرسي

القوى السياسيه وباقى الاحزاب.... متستهلوش الكلام اصلا

الشعب .... احنا بنضيع حق اولادنا وبنفرط فى بلدنا وكالعادة مش هنفوق الا على مصيبة وكارثه التاريخ بيقول كده

وهذا مجرد رأي يحتمل الخطأ والصواب فاختلافنا هدفه التكامل وليس التضاد

واخيرا وليس اخرا مصر هتفضل غاليه عليا