أمي الحبيبه
كان بودي أكون وياكي أصبح عليكي وابوس أديكي وكحل عيوني بنظرة عنيكي
أصلك يا أمي انسان خرافي حمال آسيه وحنانه دافي
أقرب تضمي أبعد تحني أغضب تدادي أغيب تنادي أيأس تمني أفرح تهني
شايله حمولك مابين ضلوعك وراسمه ابتسامه تداري دموعك
كل اما افكر ازاي اكافئك تفاجئينى اكتر بنبلك وزهدك
انا ليكي اغلى من عنيكي ورغم قساوتي وبعض جحودي الاقيكي دايما تداري عيوبي
خرجت أدور فى هدايا البشر يمكن الاقى حاجه تنفع القمر
وانا بلف سمعت منادي وكان هتافه ضد الاعادي
بيهتف ويصرخ باسم مصر
عزمت امري وشديت رحالى وعرفت فين هلاقي مرادي
وقفت اصرخ واهتف واجاهد ضد الفساد والاستعباد وظلم طال كل العباد
كافئني ربي واداني هدفي يمكن ارد جميلك يا امي
شهادة نضرة وسيرة عطرة ومصر حره رغم انف الظلمه
اخر هديه فى عيون البشر لكن هديه من رب البشر
شفاعه ونعيم وبراءة من الجحيم يحسدنا عليها حتى الحصى والحجر
كل عام وانتى حره يا أمي
هناك تعليق واحد:
جميلة جدااااااااااااااااا
كل سنة والامهات جميعا بخير وبالاخص ام اشهداااااء, وربنا يصبرهم
إرسال تعليق