تحرۥش... تحرۥش... تحرۥش
=================
50 حالة تحرش في وسط البلد بس أول يوم العيد دول اللي تمسكوا يعنى لو قلنا الكروديات اللي بيتمسكوا 20% يبقى كام حالة حصلت ؟؟؟؟ وخلى بالكم ده في وسط البلد بس يعنى لا قولنا المشمهندسين ولا حلوان ولا مدينة نصر – مدينة نصر دى مدينة نصر دى عايزه عداد الكتروني لوحده عشان يعد الحالات.
ومازلنا مع سمة العصر ولغة حوار هذا الجيل مع التحرش ضبط 137 حالة فى وسط البلد بردة بس تانى يوم العيد واضح إن مفيش فايده
سؤال العيد : متى يتدخل الرئيس مبارك لحل أزمة الطبيبين في السعودية؟؟؟؟؟
السعودية أهدت لمصر عبارتين واحده اسمها الرياض والتانيه اسمها القاهرة هديه للشعب المصري ولنقل الحجاج والمعتمرين ودول اتعملوا على احدث صاحية واتكلفوا 90 مليون دولار والأسبوع اللي فاتت سافر الريس وقام بتدشين العبارتين مع العاهل السعودي طبعا تحيه واجبه مننا للمملكة على الهدية القيمة دى ومقبولة وعقبال المعتقلين.
إسرائيل عملت تصرف غريب من وجهة نظر الناس المحترمة لكن مش غريب أبدا على الصهاينة عملت أيه بقى عملت مزاد وباعت الهدايا اللي كانت بتيجى للحكومات الإسرائيلية من شخصيات عربيه وبعض الهدايا شالت أسامي الناس اللي أهدوها طبعا عشان ميتفضحوش وفى ناس مفضوحين أصلا فماشالوش اسأميهم .
أشهر ناشر مصري في النص قرن اللي فات في ذمة الله الحاج محمد مدبولى نسأل الله له المغفرة .
الأمن بتاعنا الهمام مازال يشارك في حصار غزه ويمنع القافلة الثالثة ويتعدى على المعارضين والصحفيين وسلملى على أحكام القضاء والحق الدستوري والنخوة العربية.
شاب كان بيحلم بالسفر قام واحد سمسار قاله هسفرك يا غالى بس تعالى نعملك شوية تحاليل وفحوصات خدوا مستشفى شهير بالدقي الولا نام وصحي لاقاهم واخدين الكليه بتاعته على طريقة فيلم الحقووووناااا للفنان نور الشريف مافيا تجارة الأعضاء شغاله زى السلاموا عليكم .
سمعنا من فترة إن شيخ مشايخ الطرق الصوفية مات الله يرحمه وسمعنا إنهم انتخبوا واحد وبعدين رجعوا في كلامهم والموضوع كبر وقضايا وتوكيلات وحملات وحاجة تكسف انا مش فاهم الناس بقت ميته على الدنيا وفرحانه بالمسميات أوى كده ليه وبعدين دول المفروض عالم بتوع آخره ودين ولا أنا غلطان ولا مش فاهم ولا أيه ؟؟ ولا هى كلها وشوش بلاستك .
رجال دين بيقولولك الحج الفاخر تجارة وليس عبادة وأنا متفق تماما بس أنا بشوف رجال دين بيحجوا فاخر برده .
الدبلوماسيين المصريون من أسوأ المخالفين لقواعد المرور فى لندن وده اكيد طبعا الناس اللى تربت على مرور القاهرة ومبدأ البوز بيز ااكيد هيبقوا مخالفين في أي مكان في العالم .
خبر خلانى افتكر أفلام زمان لما كانت جدتك تديك قرش وتقولك روح جيب حلبسه يا توفيق ورجع بيا الزمن لأيام الشلن والبريزة والريال والربع جنيا المخروم اللي كان صيحه لانى عرفت انه تم طرح 115 مليون جنيه من العملات المعدنية فئة الجنيه والنص جنيه آه الجنيه بقى عمله معدنيه بقى زى القرش بتاع ستى وستك .
عادة انا مش بحب أخوض في حوارات الحوادث والقضايا لانى بشوف انها حالات فرديه ممكن الناس تحب ترغى فيها وودور عليها لكن الأخبار بتبقى غير دقيقة والحقيقة بتبقى على غير المتداول وعشان كده مكتبتش عن مقتل البنتين بتوع الشيخ زايد .
وانهاردة بكتب عشان احط خبر واحد( الطب الشرعى يكشف عن عذرية نادين وعدم وجود اى اثار لتعاطى المخدرات )) وأقول إنا لله وإنا إليه راجعون وأتمنى أن يكون ظلم البنت والخوض في عرضها وشرفها وعرض وشرف أهلها في ميزان حسناتها .
طبعا كنت أتعرضت لموضوع النقد الغير الموضوعي لشيخ الأزهر الأسبوع اللي فاتت واللي مازلت مقتنع بيه لكن يظهر إن شيخ الأزهر أعصابه بتنفلت بسرعه عشان كده صرح تصريحات أدب الحوار مع او عن العلماء يجعلني أقول له عفوا مولانا الإمام هذا تصريح لا يصدر عن شيخ للأزهر وهسبكوا مع الحوار
· عفوا مولانا الإمام هذا الكلام لا يصدر عن شيخ للأزهر
http://www.almasry-alyoum.com/article2.aspx?ArticleID=189426&IssueID=1247
======================
وأيضا مع بعض التقارير المهمة
· كوسه...كوسه
http://www.almasry-alyoum.com/article2.aspx?ArticleID=189198&IssueID=1245
· حكاوي المصريون العائدون من بانكوك
http://www.almasry-alyoum.com/article2.aspx?ArticleID=189573&IssueID=1248
· زينب لسه عندها أمل ( لمن لا يعرفون معنى الرضا والقناعة)ء
http://www.almasry-alyoum.com/article2.aspx?ArticleID=189838&IssueID=1250
هذا النقد لأنفسنا قبل أن يكون لغيرنا وهو لمسئولين وليس لأشخاص فلا يزايد احد على حب مصر فكلنا نحبها وكم نتمنى أن تكون كل أخبارنا بعنوان أما براوه وكم نحن حريصون على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.
وأخيرا وليس أخرا مصر هـــ تفضل غاليه علينا .
ال ن ســـــــــــــاج
ليست هناك تعليقات:
إرسال تعليق