فرع
شجرة انكسر فى هبت ريح شديدة .... الفرع كان جامد وليه طله فريده ... حزنت
على الفرع وقولت خسارتنا اليوم كبيرة... ومع هبة ريح تانية لاحظت فروع
كتيرة .... شايلة من الاوراق الوان واشكال جميلة ... الشجرة نقصت فرع محفوظ
فيها مكانه ... ولكل فرع فينا زمانه واوانه ... وداعا لمن رحلوا وتركوا
شجرة مصر
.........................
اللي مش عارف قيمة النهاردة يبقى لمؤاخذه حمار ...
النهارده اول مرة فى تاريخ مصر القديم والحديث الشعب المصري يختار حاكمه
بجد ، النهارده يوم اتمنته اجيال كتير واعتبره البعض فى زمانهم حلم اصعب من
دخول الجنه واخرين اعتبروه جنون لكن بسبب ارادة الله اولا وشهداء يناير
ثانيا الحلم بقى واقع ، النهارده يوم الكرامه
........................
انا النهارده بس اكتشفت ان 81% من الشعب المصري امي وحلال
فيه شفيق والاستبن ... لان نصه منزلش اصلا واللى نزلوا 64% منهم انتخبوا
فردة كوتش وفردة جزمه ...
.......................
اعتقد لو عمنا جلال عامر لو كان عايش كان ممكن يكتب النهارده
... فى الدول الديموقراطية الناخب مغرم ببرنامج المرشح وخلفيته ، اما فى
الدوله المصريه فالناخب مغرم بكرباج المرشح ولحيته ...:(
......................
على الرغم اني واحد من المفرووسين والمنقوطين بس لو حد قال
ان فى تزوير هقوله قديمه ومش مصدقك ، ولو حد قالي دى مش ارادة الشعب هقوله
لا ارادته بس هنعمل ايه نصيبنا كده اننا فى مجتمع القطيع ، ولو حد قالي
الامية هى السبب هقوله السلبيه هى السبب بدليل ان نص الشعب بس انتخب فى
الداخل ، و8 مليون مغترب انتخب منهم 250 الف يعنى مش اميه ولكن سلبيه
وخيانة وكنا نقدر واحنا برة مصر نقلبها مراجيح لو الناس يهمها مصر اصلا بس
كله بلاستك وكل انتخابات وانتوا طيبيين ومافيش اعادة بالنسبالي
.....................
انا اكتشفت حاجة اجمد من قانون الطفو بتاع ارشميدس ومن حقى
اقول زيه وووجدتها ... اننا (حمدين وابوالفتوح) والفلول (شفشق وموسى) مجرد
سذج وسنه اولى سياسه وممكن اقول بثقة اننا اخدنا على قفانا من الاخوان ...
ليه بقى يا اذكى اخواتك ، الاجابة بسيطة ان مجموع (اننا) اعلى نسبه ومجموع
الفلول التاني يعنى اكبر من الاخوان فبالتالى كان من مصلحة الاخوان يضحكوا
على حمدين وابوالفتوح ويطمعوهم فى الرياسة لتفتييت الاصوات وكمان ميزعلوش
اوى ان قانون العزل مطبقش على شفيق عشان يكسبوها بالاعادة لان طبيعى (اننا)
هيقفوا معاهم لما تبقى فى اعاده مع الفلول ... خدت مني مجهود كبير جدي
هناك تعليق واحد:
بعض العبور مفيد احيانا...كما يعبر القطار تعبر الناس ويعبروك...تمنياتي بمرور أمن في المحطه القادمه
كالناس ككل شيء
كمدينتك ذات الواجهات الزجاجيه
يتلون البشر
كالفلزات قابلة للصداء
يتفاعلون بكل سهوله
ويتحولون
لاشكال اخرى مؤكسده ونخره
ياللزمان!!
صديقتي اضحكي وواصلي
غدا الوان اخري ف انتظارك
تتبدل الوجوه امامك
فتلوحين,,,عمتم مساء ايها المسافرون
"لتقرائي الكتاب لابد ان تطوي صفحاته"
إرسال تعليق