أنا شايف إبتسامة مصر وكأن عيونها شايفه النصر
من كل حاره ومن كل شارع من الكنائس ومن الجوامع
خرج الشيوخ ويا الشباب خرج العجائز ويا البنات
يهتفوا بأسمك يا مصر
أنا شايف ابتسامة مصر لما مرقص شال محمد
وعم سالم مبقاش مسالم خد عياله ونزل معانا
هتف وصرخ زى الجميع وقال كفاية جبن القطيع
وكان هتافه بأسمك يا مصر
أنا شايف ابتسامة مصر لما اتجمعنا ويا بعض
خايفين على بعض وفى ضهر بعض منعرفش بعض
لكن الاسم مصرى والجدر واحد والرب واحد والهم واحد
فكنا واحد فى حب مصر
انا شايف ابتسامة مصر من مظاهرة الميدان
متسألنيش أسم الميدان لان الخروج كان من كل ميدان
خرج الالوف من كل مكان يقولوا كلمة الغلبان
وكانت الكلمة هى مصر
انا شايف ابتسامة مصر عشان المطلب كان جماعي
ماكنش فردى ولا هوائي كان مطلب بحقوق مشروعه
حق التعبير حق التغيير حق الكلمه حق الحياه
حق احترام اسمك يا مصر
انا شايف ابتسامة مصر من الخوف اللى اختفى
اختفى من قلب شعب فكان هتافه زى الرعد
والغضب كان كبير ودى بدايه بدون نهايه
اصل الحكايه مستقبلك يا مصر
انا شايف ابتسامة مصر من غباء التصريحات
اصل الغباء هيزيد الغضب فتكون نتيجته التغييرات
لكل سارق ولكل جاحد ولكل فاسد ولكل ترزي تشريعات
وبأدينا نكتب دستورك يا مصر
انا شايف ابتسامة مصر ووشها بيبتسم لولاد وبنات رجاله
فى القاهره واسكندريه فى السويس والغربيه خرجوا وصنعو حاله
بدون عنف بدون تكسير ولادك يامصر هيغيروا المستحيل
ودم الشهيد مارحش هدر دة جهاد وترتيبات القدر
وكل يهون عشانك يا مصر
انا شايف ابتسامة مصر
