في كل شارع في بلادي .. صوت الحرية بينادي

رباعيات المانتي

-1-

سألوني أسم الولد

قولتلهم محمد

حسيت كأني بتولد
لما قالوا الاب أحمد

-2-

تزعق تخربش وتضرب كمان

وتأفش وتقلب حواليك المكان

وأول ما نبدأ نبرق عنينا

تضحك تخلينا ننسى اللي كان

-3-

سألوني اسم الدلع

قولتلهم المانتي

قالولي باينه جدع

قولتلهم المانتي

-4-

حبيب بابا عامل زعلان
بالفيديو بيهز في راسه
قالب وشه وغضبان
انا رأيي نبوس راسه

-5-
المانتى مش مجرد انسان
المانتي أسلوب حياه
يقدر يخليك فرحان
وممكن يخليك زعلان

-6-
المانتي جاتله اخت
قلناله خديجه يا محمد
بص بطرف عينه وسكت
قلبي اتخطف على البت

شكلك فاهم يا نصه

عم اااحمد حمدالله على السلامة ياهندسة

اهلااا ازيك يا نصه عامل اية ؟ وايه الاخبار الكشك ماشي كويس؟

الحمد لله كله تمام لازم تقعد تشرب حاجه

ماشي ياعم نصه نشرب

ها احكيلى اية اخبار المنطقة والدنيا عاملة اية ؟

ولا اى حاجة الناس الحلوة بتمشى وزي ماانتى شايف النوواصى مليانه عيال واهى ماشية

معلش يانصة بكرة الدنيا تتظبط والبلد ترجع تاني

بكره ده مش جاي ياعم والبلد بترجع لورا مش جاية  لقدام تاني

ليه بتقول كدة ؟

لما كل العيال طالعة عايزة تبقى الالمانى والبنات مستعبطة فيها من اعدادى يبقى الجيل اللى جاي بلح يامعلم

مش كله كدة يا نصة في ناس كويسة ؟

الناس الكويسة مابتقعدش بتسبها وتخلع واللى بيفضل منهم كارة البلد باللى فيها

البلد ياباشا مش بتاعت الكويسين دى بتاعت الحلنجية



 

منغير عنوان

زمان القهاوي او البورصة كما يتم تسميتها في المناطق الساحلية كان جميع روادها من  الرجال لكن بعد التطور الكبير وبعد ان اصبح اسمها كوفي شوب أصبحت مأوى لجميع الاعمار من الجنسين حتى الأطفال وأصبحت تقدم أنواع لا نهائية من المشروبات والاطعمة الفرنجية ،المهم القهوة كانت زمان الناس تتجمع عشان تتكلم وتقابل بعض بعد يوم عمل او في الاجازة لكن اليومين دول بقت مكان في المقام الأول عشان الناس تشيش وتقعد ماسكة التلفون تراسل ناس  تانية غير الناس اللي معاها او تتصفح مواقع التواصل الاجتماعي اللى أصبحت مواقع خناق اجتماعي وفى جميع الأوقات كأن ما فيش حد بيشتغل في البلد دي واصبح مشروع الكوفي شوب هو درة التاج في المشاريع التجارية لدرجة انى بفكر افتح كوفى شوب وابطل هندسة .

 وللحديث بقية ....

   

هتشيش اية ؟

دة السؤال الاولانى اول متقعد في قهوة اه سوري في (كوفي شوب) بتسالة حضرتك لحد او بتتسال عنه عشان خلاص القهاوي بقت مركز لشباب وبنات وأطفال الشيشة .

 

السؤال التانى بقى هو في واي فاي ؟

 

ليه بقى عشان حضرتك مش جاي ترغى انت وصحابك او انت وعيلتك ،انت جاي تفتح تلفونك وترغى مع ناس تانية في عالم اخر ومافيش مانع تدخل تحطلك كام كومنت ولاتشير حاجة منغير متشوفها ولا تفهمها على مواقع التفكك الاجتماعى

 

السؤال الثالث تحبوا ناخد صورة سيلفي ؟

وطبعا ده عشان تخلد اللحظة التاريخية دي وتحطها على الفيسبوك ولا انستغرام وتكتب تحتها يلا نكمل لمتنا J

نفسي نخرج ونتكلم سوا يا جدعان

انا العسكري

انا المواطن اللى لبسوني ميري وقالولي اخدم هناك

وبقيت عسكري ودفعه ورقم فى السجلات 

ماحدش حسسنى ولا حدش عرفني الا لما قالوا ده مات

مايحسنيش الا اللى وقف خدمة بالساعات

وحر البياده بياكل فى جلدى اللى مات 

ووشه اتحرق من شمس النهار

وياما اتظلم بكلمة وقرار

وايده اتشلت من برد الشتا 

ونام من التعب بعد العشا

وسهر ليالي فى حفرة جبل

ومايعرفش يقول لا للعمل

انا العسكري

حياتي مخله بلم فيها كل الحاجات

افرول وبيادة وفوطة وسجادة صلاة

واخر الشهر يقبضوني سبعة وستون من الجنيهات

ويوم ماتحلى الاقي اسمي فى الاجازات

بقضي يومي وبعدي جيشي عشان يفوت

بحلم بيوم ماخرج من التابوت

اصل الجيش بالنسبالي زي الموت

:(

انا الشهيد 

انا من المريخ وأهلي من الزهره

اه ياعقلي يا مسكين آمنت بفكره مغلباك

اقول شمال يقولوا يمين وان كنش عاجبك ادينا قفاك

فكرتي يا خلق هووووه مطلعه عيني،أقولهم حريه يقولوا يا عيني

اقولهم كرامه وانسانيه يقولوا وماله،حدش شاف كده يا ناس حتى فى خياله

ياشعبي متنرفزونيش خلاص هتجن،يقولواياشاطر بنقولك يحنن

قال اية بعيد عنهم وكأنى من المريخ،نسيواالاذكيه انه عصر الصواريخ

امال لو كنا زمان ايام الجمل والحصان،كنتوا عملتوا فيا ايه يا قدري من زمان

حتى لو من المريخ وانتوا من الزهره،الحريه يا أهلي اقوى من الفكره

الفكره ليها جناحات بطير فى السما،مافيش مخلوق يمنعها توصل للفضا

والحريه سبقت الفكره فى سرعة الانتشار،بس انتوا يا اشرار عبيد الانتظار

طب اعمل اية يااخونا مع حلمي اللى انكسر،خايف اعاتبهم يردوا ردود البقر

وراكي يابنت الأيه مهما طال صبري بس ساعدينى وفهمي أهلي

بلاش يا اخونا ترضوا بالفتات ده حتى عيب علينا عشان اللى مات

 

 

واذا كان اللى مات نستوه،فاللى جاي ازاي هتواجهوه

خواطر .. متجدد

فرع شجرة انكسر فى هبت ريح شديدة .... الفرع كان جامد وليه طله فريده ... حزنت على الفرع وقولت خسارتنا اليوم كبيرة... ومع هبة ريح تانية لاحظت فروع كتيرة .... شايلة من الاوراق الوان واشكال جميلة ... الشجرة نقصت فرع محفوظ فيها مكانه ... ولكل فرع فينا زمانه واوانه ... وداعا لمن رحلوا وتركوا شجرة مصر

.........................

اللي مش عارف قيمة النهاردة يبقى لمؤاخذه حمار ... النهارده اول مرة فى تاريخ مصر القديم والحديث الشعب المصري يختار حاكمه بجد ، النهارده يوم اتمنته اجيال كتير واعتبره البعض فى زمانهم حلم اصعب من دخول الجنه واخرين اعتبروه جنون لكن بسبب ارادة الله اولا وشهداء يناير ثانيا الحلم بقى واقع ، النهارده يوم الكرامه

........................

انا النهارده بس اكتشفت ان 81% من الشعب المصري امي وحلال فيه شفيق والاستبن ... لان نصه منزلش اصلا واللى نزلوا 64% منهم انتخبوا فردة كوتش وفردة جزمه ...

.......................

اعتقد لو عمنا جلال عامر لو كان عايش كان ممكن يكتب النهارده ... فى الدول الديموقراطية الناخب مغرم ببرنامج المرشح وخلفيته ، اما فى الدوله المصريه فالناخب مغرم بكرباج المرشح ولحيته ...:(

......................

على الرغم اني واحد من المفرووسين والمنقوطين بس لو حد قال ان فى تزوير هقوله قديمه ومش مصدقك ، ولو حد قالي دى مش ارادة الشعب هقوله لا ارادته بس هنعمل ايه نصيبنا كده اننا فى مجتمع القطيع ، ولو حد قالي الامية هى السبب هقوله السلبيه هى السبب بدليل ان نص الشعب بس انتخب فى الداخل ، و8 مليون مغترب انتخب منهم 250 الف  يعنى مش اميه ولكن سلبيه وخيانة وكنا نقدر واحنا برة مصر نقلبها مراجيح لو الناس يهمها مصر اصلا بس كله بلاستك وكل انتخابات وانتوا طيبيين ومافيش اعادة بالنسبالي

.....................

انا اكتشفت حاجة اجمد من قانون الطفو بتاع ارشميدس ومن حقى اقول زيه وووجدتها ... اننا (حمدين وابوالفتوح) والفلول (شفشق وموسى) مجرد سذج وسنه اولى سياسه وممكن اقول بثقة اننا اخدنا على قفانا من الاخوان ... ليه بقى يا اذكى اخواتك ، الاجابة بسيطة ان مجموع (اننا) اعلى نسبه ومجموع الفلول التاني يعنى اكبر من الاخوان فبالتالى كان من مصلحة الاخوان يضحكوا على حمدين وابوالفتوح ويطمعوهم فى الرياسة لتفتييت الاصوات وكمان ميزعلوش اوى ان قانون العزل مطبقش على شفيق عشان يكسبوها بالاعادة لان طبيعى (اننا) هيقفوا معاهم لما تبقى فى اعاده مع الفلول ... خدت مني مجهود كبير جدي

بزياده

كل اما افتكرك قلبي يدق بزياده

وحزني يختفي ويتبدل سعاده بزياده

وعنيا تلمع ودموع تملاها بزياده

دموع ذكرى ولا دموع ندم بزياده

صدقنى مش عارف كانت صداقه ولا حب بزياده

سنين كتير مرت ولساك فى القلب بزياده

وكل اما اقول نسيتك ترجع فى بالى بزياده

حلمت تكون معايا بس الحلم كان شويه بزياده

افرح لما اسمع خبر عنك والفرحه بتكون بزياده

تفضحنى فرحتى والاقى واحد يغمزنى غمزه بزيادة

طب اعمل اية ياعالم اذا كان شوووقي بزياده

اعمل مش هممني ومسالش عنك بزياده

الاقى نفسي تكلنى وتقولى كفاياك بزياده

ارجع اسال تاني عنك اكتر من الاول بزياده

كنت عالم جوا عمري كنت كتير بزياده

حلم واقع قدام عنيا وكان واقع بزياده

عرفت يومها ان الحقيقه احلى من الحلم بزياده

كنت ايدي كنت قلمي كنت نفسي بزياده

كنت ساحرني كنت أأسرني كنت مالكني بزياده

كنت دليلي كنت شمسي كنت نوري بزياده

كنت املى كنت عملي كنت حياتي بزياده

  وده مش كتير عليك ولا بزياده

أصل

ضحكتك كانت حلوه بزياده

حنيتك كانت تملى العالم بزياده

دمعتك كانت بتوجع بزياده

لمعة عنيك كانت مبهره بزياده

صوتك كان حنون بزياده

لمسة اديك كانت بتهزني بزياده

حزنك كان بيقتلنى بزياده

فرحتك كانت بتحييني بزيادة

 لما ترن عليا كنت اقوم ارقص بزياده

ولما يوصلنى رساله منك كنت مانمش بزياده

بينى وبينك كلك على بعضك بزياده

وكفايه بقى حنين

بزياده

 

 

 

 

 

الثالثة شمال

من الثالثه شمال

بنرج جبال

واليوم بنودع الابطال

شهداء رجال

مش عيال

وهيدفع الثمن الاندال

شهداء عايشين

فى قلوب ملايين

شعله ورمز للجايين

انس شهيد

عادل شهيد

وليكي يوم يا بورسعبد

جمهور شديد

جمهور عنيد

ويوم العدل ده يوم العيد

هفضل اشجع

هفضل انادي

باسم مصر باسم بلادي

دي مش حكاوي

ولا كلام قهاوي

انا بن مصر ان اهلاوي

يوم سكوتي

ده يوم موتي

يوم ماتزف مع الغاليين

وهييجي غيري

فى الثالثة شمال

ويهز جبال

ويقف تحية للابطال

فاطمة

بتبكي لية يا فاطمة النهارده يا حبيبتي عيد

النهاردة عدى سنه على ميلادك الجديد

والكل جاي عشانك القريب ويا البعيد

يحتفلوا فى يوم ميلادك باسقاط العنيد

الدمعه دي يا فاطمة النهاردة مش مكانها

ولاهي دى العين اللى تنفع سكنها

اقول لعيالك اية لما يسالوني عنها

اكدب واقول دي فرحه ودموع سقطت منها

 عيالك كلهم جايين من كل حته فى البلاد

اوعى تكسري خاطرهم وتخلى فرحتهم رماد

بيغنوا بصوت جهوري باسمك اللى عاد

وبينادوا من الميدان على كل العباد

فاطمه فاقت ، فاطمة راقت ، فاطمه هبت من الثبات

فاطمة قامت ، فاطمة وقفت ، فاطمة هتعوض اللى فات

فاطمة ضحكت ، فاطمة ركعت ، فاطمة سجدت بالساعات

 فاطمة لبت ، فاطمة وعدت ، فاطمة جمعت الشتات

فااطمه 

أوعى يكون بكاكى على عيالك اللى راحوا

دول يرطبوا القلب مش يزيدوا جراحه

تبكي عليهم ليه ده ربي وعدهم جناته

مصابيح حوالين العرش ليوم معلوم بذاته

وبلاش يكون بكاكي على عيالك اللى عاشوا

اللى نسيوا الهدف وفى خلافتهم ساحوا

اللي استعجلوا الحصاد واللى بضميرهم باحوا

اللي خزلوا نفسم ماخزلوش اللى راحوا

ولا تكونيش زعلانه على سذاجة عيالك

ولا تكونيش زعلانه على اولويات كتابك

ولا تكونيش زعلانه على تحريض اعلامك

ولا تكونيش زعلانة على وجع زهرة شبابك

أأأأأأيه يااا فااااطمه؟؟

فاطمة حلم ، فاطمة علم ، فاطمة رمز للكفاح

فاطمة باقية ، فاطمة جاية ، فاطمة عازمة على النجاح

فاطمة أمي ، فاطمه عشقي ، فاطمة دعمي للفلاح

فاطمة فجر ، فاطمة نور ، فاطمة تغريدة صباح

وابتسمت فاطمة ........ وقالت

انت مين يا وااد ؟

انا ابنك اللى عاد

ابنك اللى جاد

ابنك اللى ماسك فى طرف توبك وبيتباهى بين العباد

وعايز تعرف زعلانة لية ؟

لا

ازاى اسال عن وجع انا عارف سببه ايه !!!

طب لحد امتى انت واخوانك ماسكين فى توبي وبتتخانقوا عليه

لحد متعلمينا وتفهمينا ان خيرك للي بيشتغل مش للي طمعان فيه

اتفقنا

اتفقنا

ابني امل ، ابني عمل ، ابني طريقي للنجاه

ابني عالم ، ابنى عامل ، ابنى صامد للحياه

ابني فلاح ، ابني ملاح ، ابنى عارف الاتجاه

ابني شديد ، ابني شهيد ، ابني نعمه من الاله

اايوووه بقى يا فاطمه

فاطمة هرم ، فاطمة نيل ، فاطمة بلد الطيبين

فاطمة ارضي ، فاطمة عرضي ، فاطمة ضي السهرانيين

فاطمة مدنا ، فاطمة جرس ، فاطمة للاقباط والمسلمين

فاطمة شارع ، فاطمه حارة ، فاطمة عطفة شقيانيين

فاطمة أيد ، فاطمة رجل ، فاطمة ساعد للبناه

فاطمة فكرة ، فاطمة معنى ، فاطمة كلمة على الشفاه

فاطمة نسر ، فاطمة حصن ، فاطمة قهرت الطغاه

فاطمة درع ، فاطمة سيف ، فاطمة جندي للاله

 

فاطمة بلدي ، فاطمة وطني ، فاطمة مصدر البشاير

فاطمة ضله، فاطمة عزة ، فاطمة عنوان الحراير

فاطمة جد ، فاطمة مجد ، فاطمة مجلس العشاير

فاطمة حره ، فاطمة ثوره ، فاطمة عروسة 25 يناير

فاطمة 

مواطن وثوري ومركزي

فى شارع جانبي متفرع من احد ميادين القاهرة الشهيرة وقف ثلاثة مواطنين  امام مبرد مياة يطل صنبورة من داخل احد المساجد وكان هناك شاب فى العشرين من عمره يشرب بنهم شديد وانفاسة تتلاحق بشدة ويبدوا علية الاعياء الشديد فاذ بيد تربت على ظهرة وسمع شخص يقول له  :- ( كباية مياة وحياة ابوك احسن هموت من العطش )

فاذ بالشاب يسرع ليملاء الكوب ليعطية للسائل والتفت نحوه بسرعه ليعطيه الماء وما ان وقعت عينيه على طالب الماء حتى توقفت يده فى الهواء وظهرت امارات الغضب على وجهه فقد كان طالب الماء احد عساكر الامن المركزي .

لاحظ الموقف السابق مواطن تبدو عليه البساطه ، ويبدو انه فى  العقد السادس من عمرة اشيب الشعر باسم الوجه على الرغم من تجاعيد وجهه الشديدة فامسك الرجل العجوز الكوب من يد الشاب واعطاه للعسكري قائلا :- ( اشرب يابني من ايد اخوك )

فاخذ العسكري الكوب وشرب بسرعه ومع اخر قطرات الماء التى تسقط من الكوب سمع الشاب يضحك بانفعال وهو يوجه حديثه للرجل العجوز قائلا :- ( اخوه ايه يا راجل ياطيب دول عمالين يقتلوا فينا زي الفراخ )

فقال العسكري :- ( احنا مبنقتلش حد ولا بنروح لحد انتوا اللى بتيجوا عندينا وعايزين تدخلوا الوزارة فبندافع عن نفسينا )

فامسك العجوز بيد العسكري والشاب وجذبهما الى داخل المسجد وقال لهما وهو يدعوهما للجلوس :- ( تفتكروا لو كل واحد بدل ملابسة مع اخوة اية اللى هيتغير ؟ )

فرد الشاب بسرعه :- ( اللى هيتغير كتير مش هقتل بايدى متظاهرين مسالمين ، مش هقف فى معسكر بلطجية الداخلية )

وقال العسكري:- ( مش هنزل من بيتنا واقف فى الشوارع واعطل المرور واضرب العساكر بالطوب )

فنظر العجوز للشاب وساله :- ( طيب لو لاقيت ناس جاية عليك بتضربك وبتصيب زمايلك وعايزة تدخل الوزارة وانت واجبك تحمى رمز من رموز سيادة الدولة  ، هتعمل اية ؟)

فسكت الشاب برهه ثم اجاب  :- ( هدافع عن الوزارة باى طريقة الا القتل )

فنظر العجوز للعسكري وقال :- ( ولو انت كنت فى بيتك ولاقيت مستقبلك ومستقبل عيالك بيتسرق هتقف تتفرج ؟ )

فاجاب العسكري :- ( اكيد لا هنزل واجيب حقي بس بالادب منغير مأذي حد )

فاكمل العجوز :- ( ولما نزلت لاقيت ناس مسالمين زيك بتموت قدام عنيك بدون ذنب ، ولاقيت العساكر والظباط بيفتروا عليكوا ، هتقف تتفرج ؟)

فسكت العسكري طويلا ثم هز رأسه قائلا :- ( اكيد لا هدافع عن نفسي وعن ااصحابى )

فقال الشاب متسائلا :- ( انت عايز تقول اية يا والدي ؟)

فرد العجوز مبتسما :- ( اللى عايز اقوله ان كل واحد منكم بيأدي واجبه على حسب قناعته ودوره فى الحياه ، العسكري بينفذ اوامر وبيبص للموقف من زاويته ، وانتي يا ثوري بتبص للموقف من زاويتك  وعلى ضوء قناعتك اللى هى اكيد صح زى مالعسكري ايضا صح )

فقال العسكري بعفوية  :- ( امال مين اللى غلطان يا حج )

فرد العجوز قائلا :- ( الغلط على اللى خلاكم فى مواجهة بعض ، اللى كان فى ايدة ميخليش الشاب ينزل من بيتهم وميخليش العسكري واقف ليل ونهار يفض مظاهرات )

فنظر العسكري والثوري لبعضهما البعض ثم سال الشاب العسكري بهدوء :- ( انت بتقتلنى لية ؟)

فرد العسكري :- ( وانت بتضربني ليه ؟ )

فاجاب الشاب  :- ( انا مش بضربك انا بدافع عن نفسي )

فرد العسكري :- ( وانا مش بقتلك انا بأدي واجبي )

فقال العجوز :- ( متتعبوش نفسكم كل واحد منكم شايف الصورة من زاويته وصعب يشوفها بعين التاني )

فسال الشاب العجوز :- ( وانت فين من دة كلة اية موقفك ؟)

فابتسم العجوز ثم قال  :- ( انا لا معاك ولا معاه ومش شايف ان مصر هتبقى افضل بتصرافتكم دي وفى نفس الوقت مقدرش انكرها عليكم ، انت حر تقول وجهة نظرك منغير خوف والعسكري يأدي واجبه ويحافظ على الامن بدون تراخي )

فقال الشاب مخاطبا العجوز :- ( ااه يعنى انت من حزب الكنبه )

فقال العجوز :- ( هو لو ماتفقتش معاك ونزلت ووقفت فى الشارع وعبرت عن وطنيتى باسلوبك ابقى فى نظرك سلبي ؟)

فرد الشاب بحماس :- ( طبعا )

فابتسم العجوزقائلا :- ( انا ايجابيتى يا بني ووطنيتى فى الصندوق مش فى البوق )

------------------

صوتك امانه ومصر امانه ومستقبل عيالك امانه حاول تحافظ على االامانه

مواطن مصري

مصطفى

خرج فى فجر نهار يسعى على رزقه

بيدعي للستار يحقق منى حلمه

ركب قطر الحياة يمكن يلحق مكان

عنده امل فى بكره انه مايصبح مهان

ودع بايده اهله وقال راجع يا والدي

رسم بوشه بسمه وقال ادعي ياامي

وهو على الباب بص بعنيه وراه

دق قلبه بشده ومحسش بيه سواه

فضل فى يومه يسعى عشان يحس بذاته

حلم بيوم يركب ..طيارة تحسن حياته

كان راجع المسكين فى طريقه وحاسس بشىء

خطف الغدر حلمة وسرق فرحة برىء

زاغت عنية وسقط على الارض من الألم

كان نفسه صوته يطلع ويسأل العلم

قتلونى لية يابلدي انا انسان فى حالي

دمي حرام عليهم دة مش رخيص ده غالي

فقدت عنيه بريقها وجسمه ارتعش من البرد

نظرة عنيه شايفها بتنادي على كل فرد

نسيم الجنه جاني وربي سماني شهيد

سلموا على اهلي وجراني وكل قريب وبعيد

انا بس عندي سؤال كويس مش بطال

لامتى هيكون الغدر وامتى هنلاقي العدل ؟

مصطفى كان مواطن لا تحريري ولا اخوان

ولاعمرة لعب سياسه ولا هتقولوا عميل وخان

كفاية كدب بقىى بتقتلوا زهرة شبابانا

مافيش مبرر واحد يخلينا نسيب ولادنا

مصطفى كان مؤدب طيب واد مهذب

الحزن مش عليه الحزن علينا احنا

بنقتل منغير لية ونكدب ونقول مش احنا

عفاريت جت من تحت ولا كائنات جت من فوق

خطفت شاب لتحت ورفعت كلب لفوق

صبرك يا عم عمر ابنك شهيد مظلوم

ودة مصير وقدر ونصره فى يوم معلوم

انا كنت ماسك لساني وقلت مش هتكلم

لكن مصطفى ابكاني وحسيت انى بتعلم

الحق لازملة فم الحق لازملة ايد الحق لازمله شهيد

...............

انا لله وانا اليه راجعون

الشهيد / مصطفى عمر بيومي

... كوبري قصر النيل قتل برصاصتين فى صدرة ورقبتة بدون ذنب كان عائد من مقابلة للعمل بالخارج

فينك يا صوت الحق ؟

فينك يا صوت الحق طافي شموعك ليه ؟
مالك ياصوت الحق بقى ليك حسابات ولا اية ؟
اعلى ياصوت الحق واخرج من صمتك
قول كلمتك لله مش لحزب ولا جاه
اصرخ يا صوت الحق بالكلمة فى وقتها
الكلمة لو ماتقلتش فى الوقت سدها

فينك يا صوت الحق طافي شموعك ليه

ليل الظلم حالك تهنا واتلخبطنا فيه

لاشايفين طريقنا ولا عارفين صديقنا ولا فاهمين نفسينا

يوم نكون يمين ويوم نكون شمال وتعبنا من التوهان

فينك يا صوت الحق طافي شموعك لية

كان الهتاف للعلم اليوم هتاف الالم

زهرة شباب بلدنا بينزفوا الوان

احمر بلون الدم عار علينا وهم

اسود بلون الظلم اللى خلى عشيتنا غم

ابيض بلون قلبهم الصافي لبلاده

فينك يا صوت الحق طافي شموعك ليه

الندل فى الضلمة بيعمل سبع رجاله

يحكى ويتحاكى عن فعله الخسيس

وكانه جزار مش ظابط بوليس

عيون شباب الثورة مش جفن ورموش

دي عدسة يااخونا تفرق السليم من المغشوش

فينك ياصوت الحق طافي شموعك ليه

كلام فى كلام فى كلام عشر شهور كلام

دة خضرة لو اتجوزت كانت جابت احلام

والمجلس والنخبة لسة عايزين كلام

والناس تموت فى الميدان وهيجتمعوا للكلام

فينك ياصوت الحق طافى شموعك لية

الصمت فى الفتنة افضل من التحريض

والجاهل ومش فاهم يتلم وكفايا تعريض

والفاهم يتكلم بس يختار توقيت

اصل الحكايه سخفت ومحتاجة تزييت

فينك ياصوت الحق طافي شموعك لية

حق الشهيد فى دمه ضمان لبلادي

انى اورث حبها لاهلي وولادي

دم الشهيد يا وطني طوق فى رقبينا

ولو معرفناش نجيب حقه العيب هيبقى فينا

فينك ياصوت الحق طافي شموعك ليه

ام الشهيد ياصبرة ماتزعليش علية

دة اهلة بيزفوه ومافيش خوف عليه

مامتش ياامي دة حي حوالينا

لكن العيون قاصرة ماتجبش امانينا

فينك ياصوت الحق طافي شموعك ليه

نور الحق ساطع وعقول شبابنا عال

لكن النيه مش خالصة و اللعب شغال

لسه العقول فاكرة ان القديم فعال

كفاية غباء ارجوكم اللى كان قبل 25 محال

فينك ياصوت الحق طافي شموعك لية

اتظاهر واشتغل واعتصم واشتغل اتكلم واشتغل

اصل مافيش فايدة من اي تغيير بدون عمل

اتلموا فى الميدان وبلاش كلمة ده علماني دة اخوان

ومتخلوش جبان يندس وسطيكم اصل العيون كلها عليكم

فينك ياصوت الحق طافي شموعك ليه

نفسي اسمع صوت بلادي ولا اشوف وشها

ولو مسمعتوش هصرخ واقولها

الظلم ساعه وربي عادل فالعدل جاي والحق غالب

والفجر طالع هيخلي الضلمة نور وحزنك يابلدي سرور

فينك ياصوت الحق طافي شموعك ليه

لا انا ثوري ولا فلال ولا حابب اكون غير نفسي

بحلم بيوم ارجع لبلدي والاقى بلدي رجعت لبلدي

وكمان بيوم اجمع ولادي واحكلهم عن ثوار بلادي

بس نكون كدنا الاعادي

.......................

الحق اقول كلنا شركاء لما وصلنا اليه

المجلس العسكري

النخبة

الاحزاب

الجماعات

الحركات

الشعب المصري بدون تصنيف اما بالجهل او بالضجيج

والحق اقول لا سبيل الا الانتخابات 

واخيرا وليس اخرا مصر هتفضل غاليه عليا 

جويا متلخبط

انا جويا متلخبط شوية يمين شويه شمال ......... لا انا ثوري ولا فلال ولا عايز اكون غير نفسي

سالت كتير وسمعت كتير عشان افهم معاني كتير وزى ماروحت زي ماجيت لا اتعلمت ولا على بر رسيت

كتبت كلام عاقل ورزين وكتبت كلام عاجز وحزين وكمان كلام مجنون وسخيف مليان غضب بصراحة عنيف

اصل الحكاية مش واضحة ولاحد فاهم الحسبه عايز تغير ? ..كلام موزون من غير ما تتغير اهو ده الجنون

أين حق مصر؟

ان الامة التى لا تأكل مما تزرع وتلبس مما لا تصنع أمه محكوم عليها بالتبعيه والفناء ،وان من يتهاون فى حق من حقوق دينه وأمته ولو مره واحده يعيش أبد الدهر مزلزل العقيده سقيم الوجدان ...... زعييم الوطنيين مصطفى كامل

تدعى للمليونيات وتخرج المليونيات للمطالبه باسقاط نظام والمطالبه بحقوق دستورية وبحقوق ومطالب فئويه وتخرج للزحف للفلسطين وتخرج لمهاجمة اشخاص او منظمات ولكن اين مليونيات البناء والتعمير؟

اين مشروعنا الوطني الحقيقي الذي يبني هذا البلد ؟؟ ، اين الثوره التى غيرت واقعنا فعليا ؟ اين حق مصر ، الوطن ، الدوله ، حق الاجيال القادمه فى ان تنعم بالامن والاستقرار والخير ؟

ماذا سنورثهم ؟ شعارات ام اغاني ام مشاهد من التحرير ام علم لدوله على شفا الافلاس والانهيار ام سنورثهم صور لشهداء ونقول لهم هؤلاء اسقطوا نظام فاسد وسوري كانت الضريبه ان كمان مصر سقطت وانهارت لاننا لم يكن لدينا وقت نفكر كيف نبنيها فمليوناتنا ومعركتنا كانت ضد افراد ورموز لنظام فاسد ؟

هل منا رجل رشيد ينظر للامر بموضوعيه ويرى مالنا وما علينا ام اننا سنظل نستخدم لهجة التخوين والعماله مع كل من يختلف مع افكارنا وما وقر واستقر داخلنا دون محاولة منا فى ان نرى الصورة الكاملة ، الصورة التى تقول انه كما لنا حقوق فعلينا واجبات تجاه امتنا الاسلامية اولا والى وطننا الغالي مصر ثانيا واننا لن نحصل على اى حقوق او ننعم باى تغيير دون ان نغير من انفسنا ودون ان تحصل الدولة اولا على حقها

كثر الصراخ فى الهواء وكثر الهرج ولم نعد نعرف اولوياتنا والبركة فى الفضائيات والاعلام والصحافة التى تتصيد الاخبار دون رويه او تدقيق اعلام ياكل ويعيش على تناحرنا وخلافتنا ينعم ويربح وينشأ الصحف والقنوات والبرامج على قفانا اعلام بيشتغلنا يااخونا

هل يمكنكم حصر عدد البرامج الحواريه (توك شووز) ولن اقول على كل القنوات بل على قناة واحدة فقط اى سخف هذا او اى عبث الذي نصنعه بانفسنا فبدل من ان نبنى ونعمر نجلس لنشاهد ماذا قال فلان وكيف ردت فلانه ، اعلام فقد هويته وحياديته وتخلى عن دوره التنويري فى سبيل الربح و الانتشار ويسمونها حرية التعبير !!!

هههه مش بقولكم ناس بتشتغلنا ،يدعون انهم منابر حريه وكل افكارهم وتوجههم للثأر من نظام فاسد ومن يعلو صوته بالموضوعيه والتعقل تنبري الاقلام فى اغتياله والبرامج فى السخريه مما يقول واجدني اتذكر كلمات لشاعر الحريه احمد مطر تنطبق على هؤلاء

قال لزوجته اسكتي وقال لأبنه انكتم ،صوتكم يجعلني مشوش التفكير،لا تبسا بكلمة أريد ان اكتب عن حرية التعبير!!!!!

كيف لدوله تبحث عن الاعانات ومن سيسقط الديون وبماذا سيمن علينا الغرب ان تنصر فلسطين؟ كيف لدولة تشحت من العرب ان تقود الاسلام والعروبه وان تكون لها كلمة مسموعه ؟

كيف لدوله تركت البناء للتتفرغ لفتن طائفية وافكار تشق وحدة الامة ان تتوحد ويكون لها هدف قومي ، اتقوا الله ياابنى وطني وكما بدات بكلمات عطره لرجل رائع احب وطنه وسعى للتغيير ساختم بكلمات اخرى له لعل احدا يعي ويفهم

(ان مصر للمصريين أجمع وعلى حامل اللواءان يجد ويجتهد حتى ينصهر داخل العمل الوطني فلا تستطع ان تقول الا انه جزءمن الشعله)

واخيرا وليس اخرا مصر هتفضل غاليه عليا

لقاء السحاب (كرومبو وحمبوزوا وسحس بوند)

جلس المفتش كرومبوا مع تلميذه سحس بوند وصديقه اللص حمبوزوا لاوي بوزوا على قهوة العيال كبرت بميدان التحرير يتجاذبون اطراف الحديث عن احوال مصر فى ظل الاحداث المتلاحقة والانفلات الامني الواضح والاحتقان الطائفي الذي اصبح منتشر بشكل لا يمكن انكاره وقد كان حمبوزوا فى غاية الاسى

حمبوزوا لاوي بوزوا :- لالا اللى بيحصل ده كتير كده البلد هتولع يا جدعان

سحس بوند :- بس يا جاهل دا حراك سياسي طبيعى فى ظل ديموقراطيه وليده يا أبله

حمبوزوا :- لايابرنس الليالي ده استهبال واستعباط وخراب بيوت البلد كلها بقت بلطجية وحراميه ، الله يخرب بيوتكم امال مين هيتسرق؟
سحس :- ايوه كده بان على اصلك يا عميل ،تلاقيك يا واطي من فلول العهد البائد ،يا بورجوازي يا متعفن

حمبوزوا :- هى حصلت بورجوازي يا صايع ، ياتلميذ فاشل عند الحج كرومبو، ده بيشغلك معاه صدقه

المفتش كرومبوا جذب نفس من شيشته البطيخ الفاخر ثم نفث الدخان فى الهواء وحاول ان يصنع دوائر ففشل ثم قال :- بس يا اهبل منك له ،انتوا الاتنين مثال حي عن سبب الخراب اللى احنا فيه

فقال سحس مستنكرا :- انت بتحطني انا والحثاله ده فى جمله واحده ده حرامي وجاهل

فاخرج حمبوزوا مطوته القرن غزال ثم قال :- لم نفسك يا امور يا نايتي يا اديك لقب مرحوم ومش هاخد فيك يوم واحد خصوصا اليومين دول ، االلى القتل فيه اسهل من شراء كيس مولتو

فتلعثم سحس وقال :- خلاص يا كبير

فضحك كرومبوا ثم قال :- مش بقولكم انتوا سبب خراب مصر ، حضرتك يا سحس مجرد جاهل ومدعي معرفه تلقى بالتهم جزافا على الجميع وتعتقد انك على صواب ومن يختلف معك عميل ، واللى شبهك كتير اوى اليومين دول

ثم نظر الى حمبوزوا وقال :- اما انت بقى واضح وصريح ،حرامى وبلطجى ،ومالكش فى اى حاجة ،مابدورش غير على مصلحتك وتولع البلد ،المهم فين مصلحتك ،وبرده اللى زيك كتير اوي

فقال سحس غاضبا :- انا مش جاهل انا اللى قمت بالثورة انا واللى زي ،احنا اللى حررنا مصر من الطغيان ولا انتوا خلاص بقيتوا عبيد وماتحبوش الى جلادنكم

فنظرا حمبوزوا ببلاهه دون ان يفهم كلمة ولكنه قال :- ايوه صح ، احنا كمان كمنا بثورة وخلاصناكم من الظباط المفترريين وحركنالكم كل السجون اللى كنتم بتتعذبوا فيها ،بشرفى انا لازم اخد وسام

فابتسم كرومبوا ثم قال :- الثورة مش انت ولا اللى زيك يا سحس ،الثورة ارادة شعب ولولا الشعب ماكنتش هتبقى ثورة ، والشعب ده فيه الاخواني والقبطي والسلفي والليبرالي واللى مش فاهم حاجه يعنى الثوره مش ملكك ولا ملك حد ، دي ارادة الله وهيأ لها اسباب وهي اتحاد الامه

ثم تابع :- اما انت يا حمبوزوا فانت وامثالك محرقتوش الاقسام وقتلتوا افراد الامن حبا فينا دة مخطط مرسوم وانتوا نفذتوه واترمالك شوية ملاليم وباديكم قتلتوا مصريين زيكم وحرقتوا اموال مصر لان الاقسام دي اتبنت بفلوس مصر

فقال سحس ساخر :- وايه كمان يا عم كرومبوا ،ظلمنا الزعيم القائد وخربنا اقتصاد مصر وضيعنا الامن والامان ، ومايكنش احنا كمان اللى حرقنا الكنائس وسرقنا كارفور، انا مش عارف هتفضلوا متخاذلين وترموا علينا المسئولية لحد امتى

فقال حمبوزوا متاثرا :- اهدى اهدى يا سحس يا ااخويا دايما كده الابطال فى البلد دى مظلومين ، لكن فى المستكبل هتخرج الحكيكه للنور ويعرف الشعب البطولات الرائعه اللى كمنا بيها

فنظر اليه سحس بضيق دون انا يتحدث

فقال كرومبوا وهو يحتسي فنجانا من القهوه :- كلنا بنضيع مصر انتم بجهلكم واحنا بسلبيتنا ، كلنا بنضيع مصر لما الصغار يتصدروا المشهد والخبراء يجلسون فى مقعد المتفرج ، كلنا بنضيع مصر لما المصري يقبض عشان يقتل اخوه المصري ويحرق كنيسه ويقف فى جامع يكفر فلان ويجرم فلان ، كلنا بنضيع مصر لما بنثبت لنفسنا كل يوم اننا مابنجيش غير بالكرباج

ثم اكمل وهو يلهث من فرط الانفعال :- بنضيع مصر لما بطلنا نبني وبندور على مطالب فئويه ، بنضيع مصر لانننا مش عارفين نختلف سوا مابنحترمش بعض، بنضيع مصر لما نجيب حكومة ضعيفه تحكمنا ، بنضيع مصر لما بنقسم بعض لفئات وطوائف ونسينا ان سبب سقوط النظام هو الاتحاد ... الاتحاد فقط وليس شىء اخر

فقال سحس منفعلا :- السلفيون والاخوان هما اللى ابتدوا كفرونا وعايزين يهمشونا واستلوا على الجوامع والمنابر وبسبب جهل معظم الشعب وحبه للدين غسلوا عقولهم باسم الدين ، وهما سبب الفتنه الطائفيه وهما اللى بيحرقوا الكنائس

فقال كرومبوا متسائلا :- وعرفت منين ؟؟

فقال سحس :- واضحة زى الشمس وموضوع كاميليا شحاته يشهد ... ياعم دى عالم مابتحترمش حقوق المواطنه وعايزين يقتلوا المسيحيين ويرجعوا الحدود ، ويرجمونا ، ومايغركش كلامهم المعسول دول بيدحلبوا لحد مايتمكنوا

فقال كرومبوا موجها حديثه لحمبوزوا :- ايه رئيك فى الكلام ده يا حمبوزوا ؟

فتلعثم حمبوزوا وقال مستهبلا :- كلام اية حضرتك

فقال كرمبوا مبتسما :- السلفيون والاخوان اللى حرقوا الكنائس برده وهما اللى بيدخلوا وسط الاعتصامات والمظاهرات ويشعللوها ؟
فتلعثم حمبوزوا وقال :- هو يعني ، فى الحكيكه الموضوع كبير ، واعتكد

فقاطعه كرومبوا :- حمبوزوا

فنظر حمبوزوا بخجل وقد اشاح بوجهه بعيد ا:- الحكيكه الموضوع فى بلطجيه ، بيدخلوا وسط المظاهرات اللى بيعملها العيال امات دقون دول ،وديتها رصاصة وكلمة والدنيا تخرب والحكاية كلها عقب سجارة مع جركن بنزين والباقى بقى معروف

فقال سحس :- برده ليهم يد بيتظاهروا وبيعتصموا على حاجات فارغة

فقال كرومبوا :- فعلا لان كل فئه فيها الفاهم وفيها الجاهل ، والجهلاء بيتشابهوا ايا كانت عقائدهم ومللهم ، الجاهل احمق

ثم اكمل :- اللى من مصلحته يولع الدنيا بين المسلمين والمسيحيين هو اللى من مصلحته يقسمنا لطوائف هو اللى من مصلحته يستنزف مصر هو اللى من مصلحته يوقع بين الجيش والشرطه والشعب هو اللى من مصلحته نفضل نعض فى بعض ، وهو الى من مصلحته اننا نفضل فى الاميه وبدل مانفهم الناس ونعلمهم بنلومهم على اميتهم وبنتهمهم بالجهل

وتابع :- الجهل هو اننا مانعرفش نخاطب عقول الناس ونتوحد ونضيع الفرصه على اللى عايزين يخربوا مصر ، الجهل اننا نقعد نولول على تواجد الاخوان فى الشارع والسلفيون والتحامهم بالناس وبدل منخاطب الناس زيهم ونلتحم بيهم ونفهمهم عمالين نصرخ فى الفضائيات وعلى النت

ثم ضحك وقال :- الشعب مابيقعدش على النت يااخونا الشعب فى الحقول والقرى والنجوع والمصانع انزلوا للناس واعملوا توازن بين كل القوى وبلاش نخون بعض كلنا مصريين وبنحب بعض لكن افكارنا مختلفة لكن المفروض هدفنا واحد ، هو رفعة مصر وبلاش ندي الفرصه للى بيكرهونا يدبحونا بادينا

فقال حمبوزوا :- يعنى اسرائيل يا حضرة المفتش كرومبو
فاكمل سحس :- وكمان فلول الحزب الوطني
فابتسم كرومبوا ابتسامة ذات مغزى وقال :- القائمة اكبر بكتير .........

فهمتكم فهمتكم

خلق الله سبحانه وتعالى لنا أذنين ولسان واحد، ولعل دلالتها انه يجب علينا ان نسمع اكثر مما نتكلم لكن فى زمن كثر فيه الهرج والمرج وشاعت الفوضى واصبح الجهل والحمق سمة مميزة لعصرنا ، بعد ان اصبحنا نصنع من المجرمين والقتلة ابطالا ، لذا وجب عليا ان اعتذر وأوجه الفين سلام وتحيه لــــــــ

محمد منصور ( الخط الاصلي مش التقليد) خط الصعيد الذي نهب وسرق وحرق وروع الامنين وقتل مايزيد عن 15شخصا وخطف الاطفال فان لهذا الرجل فضلا عظيما لم يدركه احد ووصفناه نحن الاشرار بالقاتل وهو الرجل الذي اراح الضحايا من ذل الفقر وخلصهم من حياة الدنيا الفانيه ، يا سلام اد اية الراجل ده عظيم ومش بعيد يبقى شهيد ويبقى الظابط العبودي اللى خلص الناس من شره مجرم وغدر بالخط لما عمله كمين وهو خاطف طفل برىء يطالب بفديته ، معلش يا خط كنا محتاجين سنين كتير عشان ندرك قدرك واخيرا فى 2011عرفناه

ريا وسكينة انا الحقيقة ضميري يؤنبني انتوا اتظلمتوا كتير وشهرنا بيكم وعملنا عنكم افلام ومسرحيات ومسلسلات ولم يفطن احد للمغزي الحقيقي لقتلكن النساء لكنى ادركت الان فالنساء فتنه وكيدهن عظيم وانتوا كنتوا عايزين تحموا الرجاله الغلابه من شرهم عشان كده كنتوا بتخلصوا عليهم مش عشان الدهب زي مالشريرين الوحشين اشاعوا عنكم وكمان ظلمنا عبدالعال وحسب الله اللى يعتبروا ابطال وكان لازم نعملهم تمثالين فى ميدان المنشية على تضحيتهم فى سبيل الرجال لكن للاسف محدش فهمكم لكن خلاص فهمتكم فهمتكم २०११

سعد اسكندر عبد المسيح البطل القومي اللى كان بيخلص الناس من الرأسماليين المتعفنيين وياخد فلوسهم عشان المال السايب يعلم السرقة فكان بيقتلهم احسن مايتسرقوا وكمان عشان الفقراء يعيشوا فى العالم من غير اغنياء وكل الناس تبقى زي بعض ويبدوا ان الشيوعية استوحت افكاراها من بطلنا الشهير بسفاح كرموز ،دة بخلاف اعماله البطولية فى قتل الستات عشان الستات تتعلم الادب ومتزعلش اجوازها واى ست هتنكد على جوزها هنجبلها سفاح كرموز لكن احنا مستوعبناش رؤيته المستقبلية وأعدمناه لكن وهو بيتعدم سابلنا لمحة عن نبوغه فطلب كباية ميه وسجاره وشربها بمزاج وبعدين وقف قدام المشنقة وضحك بدون سبب طبعا لازم يضحك ما هو شهيد يا سلام معلش يا سعد مفهمناش سبب ضحكتك قدام المشنقة غير २०११

محمود امين سليمان بطل رواية اللص والكلاب البطل اللى كان بيسرق الشقق بتاعت الناس الاغنية عشان يدي للفقراء الغلابه فقبضنا عليه ظلم ولما طلع لاقى مراته خانته قتلها هى وعشيقها .... دة يستاهل نقتله ؟؟ لكن نعمل اية للبوليس الشرير اللى معجبوش ان محمود يتصيت ويبقى حديث الجرانيين فتآمر عليه وتحالف مع الكلب البوليسي اللى شم لبس محمود وعرف مكانه فى الجبل وقتلوه ،معلش يا اابوحنفي هما الابطال مصيرهم كده لكن عزائنا فيك ان جه اليوم اللى عرفنا فيه قيمتك يا بطل فى २०११

عزت حنفي ملك الكيف عم الشباب كلهم الراجل الصح اللى كان مظبط مصر اللى كان بيقضى على البطالة وبيشغل الناس فى زراعة المخدرات اللى كان بيستصلح الاراضي اللى كان بيدعم الاقتصاد الوطني اللى كان بيقتل رؤووس الفتنه والذنادقة اللى تحاول معارضته وتشق عصا الجماعه ، انا اسف ليك ياعم عزت فين ايامك يا ملك الدخان الازرق يابرنس الليل واخره ، اتغدر بيك ياغالي لكن 2011كانت سنه فارقه عشان نعرف قيمتك

التوربيني ملك الشوارع والحواري اللي كنت بتقضى على بطالة اطفال الشوارع ومشغلهم ومهننهم ومدلعهم ،قتلوك يانجم عشان قال اية كنت بتغتصب العيال والبنات وماحدش كان فاهمك يا كبير انك كنت بتكسر عينهم بس عشان يشتغلوا تحت طوعك ومتنقسمش العصابة وتشيع الفوضى كنت معلمهم الادب واللى يفتح بقه يندفن فى مكانه ماكنش فارق معاك حد ،الشوارع تبكيك يا مربي الاجيال الشارع فى 2011مشتاقلك اخر حاجه

ويبدوا ان القائمة ستطول واعتذراتي لن تكفي فبعد ان اصبح عبود الزمر بطلا تتهافت عليه الفضائيات والصحف لاجراء الاحاديث معه واصبح الاسلامبولي ورفاقه شهداء لقتلهم رئيس الجمهورية غدرا وجب علينا ان نعتذر لكل المجرمين والسفاحين والقتلة ولا هى كوسه ناس وناس

كم انا حزين فى اى زمن نعيش !!!!!!

ولولا خوفي من الله الذي منعنا من سب الدهر لقلت الكثير لكن لا نقول الا مايرضي الله ورسوله ..... صبرا جميل

هدية شهيد

أمي الحبيبه

كان بودي أكون وياكي أصبح عليكي وابوس أديكي وكحل عيوني بنظرة عنيكي

أصلك يا أمي انسان خرافي حمال آسيه وحنانه دافي

أقرب تضمي أبعد تحني أغضب تدادي أغيب تنادي أيأس تمني أفرح تهني

شايله حمولك مابين ضلوعك وراسمه ابتسامه تداري دموعك

كل اما افكر ازاي اكافئك تفاجئينى اكتر بنبلك وزهدك

انا ليكي اغلى من عنيكي ورغم قساوتي وبعض جحودي الاقيكي دايما تداري عيوبي

خرجت أدور فى هدايا البشر يمكن الاقى حاجه تنفع القمر

وانا بلف سمعت منادي وكان هتافه ضد الاعادي

بيهتف ويصرخ باسم مصر

عزمت امري وشديت رحالى وعرفت فين هلاقي مرادي

وقفت اصرخ واهتف واجاهد ضد الفساد والاستعباد وظلم طال كل العباد

كافئني ربي واداني هدفي يمكن ارد جميلك يا امي

شهادة نضرة وسيرة عطرة ومصر حره رغم انف الظلمه

اخر هديه فى عيون البشر لكن هديه من رب البشر

شفاعه ونعيم وبراءة من الجحيم يحسدنا عليها حتى الحصى والحجر

كل عام وانتى حره يا أمي

مصر هي الكسبانه

أنا لا اوافق على ما تقول ولكني سأقف حتى الموت مدافعا عن حقك في أن تقول ما تريد ........ تشي جيفارا

هذا المعنى هو ما اتمنى ان يسود بين ابناء وطني فى هذه المرحلة ، اتمنى ان يعي كل منا ان الافراد يصيبون ويخطئون لكن الاغلبية والجماعة لا تضل ابدا فان يد الله مع الجماعه

يرى البعض من ابناء وطني ان عدم الموافقة على التعديلات الدستورية هو الصواب ويرى البعض الاخر ان الموافقة هو الحل للخروج من الازمة التى نعيشها جميعا

ولست قانونيا او فقيها او حتى مؤهلا لاتحدث عن ما هو اكبر مني فان الامر اكبر من ان يعيه مواطن بسيط مثلي خبرته محدودة ومؤهلاته لا تساعدة على التخطيط لمستقبل وطن

لذا استمعت وقرأت للخبراء ووقر فى ضميرى رأي ليس بالضرورة هو الصواب ولكنه ما اقتنعت به وما سأضعه فى صندوق الاستفتاء ان كنت فى مصر وعلى كل منا ان يفعل ذلك ولنكن على يقين ان النتيجة النهائية هى الصواب وان خالفت قناعتنا وتوجهاتنا

ولا يظن البعض انها مباراة بين فريقين فليس هناك صراع بين حق وحق فالحق واحد وبما ان هدفنا واحد وهو رفعة مصر فان الله سبحانه وتعالى سيهيأ لهذه الامة الخير باذن الله

ولا يجب ان نصنف بعضنا ولا يجب ان نحصر الموافقة على فئة او جماعة والمعارضة على فئة او جماعه فليس لاحد فضل على احد فكلنا سواسيه نجتهد وربما نصيب وربما نخطىء ولنا الاجر عند الله فى الحالتين طالما خلصت الضمائر ونقية السرائر

فان ما يحدث فى مصر الان لامر يجب ان نفخر به جميعا فحينما يقرر ابي وامي واخوتي الذهاب للادلاء باصواتهم والمشاركة فى الاستفتاء فان هناك تغيير رهيب حدث فى الاسرة المصرية الصامتة التى لم تكن تهتم او تثق ان لها رأي او قيمة فى مجتمعها ولم تكن تظن انه سياتي يوما يكون لصوتها قيمة كبيرة لتحديد مستقبل مصر

اني اشعر بالسعادة لانه اتى يوما اثق فيه بصندوق انتخابي ويثق غيري معي ونقررمصير وطنننا بايدينا ، وان هذا الامر ليس لاحد فيه فضل بعد ارادة الله وتوفيقة سوى الشهداء وشعب مصرفليس هناك محررين فالمحررين لا وجود لهم الشعوب وحدها هي من تحرر انفسها

وبعد انتهاء الاستفتاء واعلان النتيجة ليس هناك خاسر وكسبان بل كلنا سنكسب لان مصر هى الكسبانه

مواليد 9الصبح

اعرفكم بمواليد9الصبح
شخص لم يكن يدري عن وطنه شىء سوى اسمها وفجاءة اصبح ثوري ويطلق سهامه يمينا ويسارا لتحرق الاخضر واليابس حيث انه اذكى اخواته والعالم ببواطن الامور طبعا فهو من مواليد9الصبح
اعرفكم بمواليد 9الصبح
شخص لم يكن يجروأ ان يتحدث فى السياسة ولا يتكلم بابسط الكلمات عن مامور مراجيح مولد النبي فاصبح الان يشتم وينتقد من الرئيس المخلوع حتى عم حسنين بتاع الكشك بتاع ناصية حارتهم الموكوس اللى مطلعش فى المظاهرات وهذا من حقه فهو من مواليد 9الصبح
اعرفكم بمواليد9الصبح
شخص لا يعرف نائبة فى البرلمان ولا يعرف اسماء من يحكمونة ولا يعرف كيف تدار بلدة واصبح فجأة يخطط لمستقبل وطنه ويقبل ويرفض ويشجب ويندد ويولي ويخلع وليس من حق احدا غيره ان يتكلم والا انت من اعداء الثورة وهذا من حقه فهو من مواليد 9الصبح
اعرفكم بمواليد9الصبح
شخص لم يكتب يوما كلمة او حرفا من اجل وطنه او قضايا امته وكان يرى المدونات لعب عيال والجروبات ناس بتتسلى وفجاة اصبح يملأ السمع والبصر بكلماتة الثورية وتعبيراتة النارية نعم وكيف لا فهو من مواليد9الصبح
اعرفكم بمواليد9الصبح
شخص كان يحذف كل ما نرسلة من مقالات فى حب مصر واخبار عن مصر واحوال مصر ونقدنا لحكومة مصر ويمصمص شفايفة ولسان حالة يقول عالم فاضية مش لاقية حد يلمها وفجاءة اصبحنا خونة وعملاء ومن فلول النظام البائد لانننا لا نقول ما يتفق مع افكارة وتوجهاته ولما لا فهو من مواليد9الصبح
اعرفكم بمواليد9الصبح
شخص لا يعرف شيئا عن تاريخ مصر ولا رواد الحركة الوطنية ولا يعرف من المعارض ومن المنافق فكيف يعرف وهو لم يكن يقرا او يتابع لذا اصبح البرادعي من الثوار ويحي الجمل واحمد كمال ابوالمجد من المتخاذليين لانهما مع التهدئة ولديهم قناعات تختلف معه ، انا شرير كيف الومه فهو من مواليد9الصبح
اعرفكم بمواليد9الصبح
هو من نام واستيقظ فوجد مصر على اعتاب مرحلة فارقة فى تاريخها فحدث نفسة لما لا اكون مناضل وثورى وبطل واقود مصر نحو الهاويه دة انا جامد اوى بس اخد فرصتي وكيف نندهش فنحن فى زمن مواليد9الصبح
اعرفكم بمواليد9الصبح
هو من جعل من شرار الخلق ابطال ومن اشباه الفنانيين والمثقفيين متحدثين بلسانه ومن نصب من مثيري الغرائز والشهوات قضاه وهاجم وخاصم وفجر كل من يختلف معه ومعهم ودة طبيعي فهومن مواليد9الصبح
اعرفكم بمواليد9الصبح
هو من ظن ان الفروسية فى ان يناضل ضد فساد لم يعد موجود واشخاص زالوا ونظام سقط ولكن عفوا النضال هو ان تنضال ضد فساد قائم ولدية سلطة ضد عتاة وظلمة يقدرون فأين كنت ونحن نكتب ونهاجم وننتقد منذ سنوات ولانعرف ماذا سيحدث لنا لم نكن جماعه ولكن كل منا فرد يكتب ماهو مقتنع به ومايمليه علية وطنيتة وضميرة لم نكن نتوارى خلف احد او ندعي ثورية غير حقيقية ولكنك معذور فانت من مواليد9الصبح
اعرفكم بمواليد9الصبح
هو من لا يعرف للحوار اداب ولا يعرف الفرق بين الاختلاف والسخرية ويرى انننا سذج وهو حكيم ويرى انننا قصر وهو الراشد ويرى انننا مدبرين وهو المقبل ويرى انننا القطيع وهو القائد ، اى مستقبل ينتظرنا وقائدنا من مواليد9الصبح
اعرفكم بمواليد9الصبح
هو من يظن ان شعبه كالبهائم لا يستطيع ان ياخذ قرار ويجب علينا ان ننفذ كلامه فنحن لم نفطم بعد وهو من يظن فى نفسة الحكمة وهو الجاهل فلا تضل امة ابدا ويد الله مع الجماعة فما تتفق علية الامة هو الصواب وان كان من وجهة نظرك انت خطأ ولكن كيف تقتنع وانت من مواليد9الصبح
اعرفكم بمواليد9الصبح
هو من يستخدم دم الشهداء ويتاجر به حتى لانبنى ونعمر ويعتقد جهلا ان دم الشهداء سال من اجل فوضى وتصفية حسابات وثأر اعمى ولكنه سال من اجل الحرية والكرامة ومن اجل وطن افضل ولكن كيف لك ان تفهم وانت من مواليد9الصبح

اعرفكم بمواليد9الصبح

هو لم يقرأ او قرأ ولا يريد ان يفهم او فهم ويفسرها كما يريد ، الحديث الشريف عن أبا هريرة قال قال رسول الله صلى الله عليه وسلم ستكون فتن القاعد فيها خير من القائم والقائم فيها خير من الماشي والماشي فيها خير من الساعي من تشرف لها تستشرفه ومن وجد فيها ملجأ فليعذ به ... انا اسف انى تقلت عليك يامواليد9الصبح

قد يظن البعض انى اتحدث عن ثوار يناير ولكن هذا ليس صحيح بالمرة بل اتكلم عن اشباة الثوار الذين يركبون الموجة ويتمسحون بهؤلاء الابطال وسيرة الشهداء العطرة اتحدث عن من تختلف معه فيخرج عن اداب الاختلاف فيترك وجهة نظرك وخلافك معه ليلمح انك عميل وخائن ومتخاذل ومحبط وان انا واللى زي اللى خربنا مصر .....

ببساطة انا اريد الا يتصدر المشهد من ليس لديهم الدراية والخبرة يجب علينا ان ترك الامر للمحترمين من القانوننيين والدستوريين وااصحاب الخبرة والتجربة ليخرجوا علينا بالقوانين والخطط يشرحوها لنا ويعلمونا ومن حقنا نرفض او نقبل وهذا هو البناء والديموقراطية

واقولها لك يا مواليد9الصبح اكرم لي ان يكون لي مبدأ لا يتغير على ان اكون انتهازي ومدعي بطولة زائفة فأنا لست ثائر ولست صامتا ولي موقف قبل الثورة لم يتغير بعدها انا مع الاستقرار وضد الفوضى وحينما جاءت الثور معها تماما ومؤمن باهدافها ولكن اختلف فى الية التنفيذ وهذا من حقي

واخيرا لكل من هم يتفقون معي او يختلفون (عليك بما انت مقتنع به وإن رفضك الناس ، وإياك وآراء الرجال وإن زخرفوه لك بالقول ، فإن الأمر ينجلي وأنت على طريق مستقيم)