الجزء السادس مين اللى سرق بحسن ؟؟؟

-6-

حينما دلف الرائد سعد النمر الى الغرفة واغلق الباب خلفه والتفت ليرى مستقبليه فوجىء بما لم يكن يتوقعه مما جعل جسدة ينتصب بقوة ويرفع يده مؤديا التحيه العسكريه وهو يقول : ( تمام ياافندم)

فقد كان يجلس فى الغرفه خمسة اشخاص يعرف منهم سعد أربعه والاخير لم يره من قبل الا ان هيئته ونظراته تدل على انه شخصيه مهمه فقد كان فى الغرفه وزير الداخليه ومدير مباحث امن الدوله ومدير مباحث مكافحة المخدرات واللواء عزمى صادق مساعد وزير الداخليه ومدير الامن العام .

بادره وزير الداخليه فى جديه وحزم قائلا : (( اتفضل يا سعد ))

فاقترب سعد من الحاضرين فقال رئيس مباحث امن الدوله قائلا : (( سمعتك فى الوزارة ياسعد هى اللى رشحتك للمهمه دى ))

فاجاب سعد وهو مازال فى حالة استنفار جسدى وذهنى : (( ده شرف كبير ليا ياافندم ))

فقال له الرجل الذى لا يعرفه وقد كان يجلس فى طرف الغرفه وهو يتحرك نحوه ويمد يده ليصافحه : (( نسيم عبدالقادر من المخابرات العامه ))

فصافحة سعد فى شىء من الدهشه وهو يقول : (( اهلا ياافندم ))

وهنا اقترب الجميع من طاولة فى منتصف الغرفه وجلسوا وقال اللواء عزمى مخاطبا سعد: (( المهمه اللى انت هتكلف بيها خطيره وعلى قدر كبير من السريه واظن واضح ليك مدى اهميتها لدرجة ان السيد وزير الداخليه بنفسه موجود معانا ))

فأومأ سعد برأسه علامة الاستيعاب فاكمل عزمى : (( العمليه دى عملية مشتركة بين الداخليه والمخابرات لانها بتتم داخل مصر وخارجها فلازم تتعاون تماما مع العقيد نسيم عبدالقادر عشان نجاح المهمه ))

وهنا قال نسيم مخاطبا سعد : (( تسمع طبعا عن المافيا يا سيادة الرائد ))

فقال سعد فى دعابه : (( اه طبعا وشوفتهم فى افلام السيما الامريكانى )) قالها وهو يبتسم الا ان صرامة الوجوه من حوله جعلته يشعر بالحرج .

فقال نسيم فى هدوء: (( بس المرة دى مش هتشوفها فى السيما يا سعد المرة دى هتشوفهم بجد--- وفى الحقيقه مش لازم الخير ينتصر على الشر وكمان فى الحقيقة الغلطه .. ))



فقاطعه سعد : (( الغلطه بعمرى ))

فقال مدير مباحث امن الدوله : (( لا ياسيادة الرائد الغلطة بمستقبل مصر وأمنها بحياة الاف الابرياء ))

فأكمل نسيم : (( من حوالى سنه احد عملائنا فى الخارج اخبرنا عن عمليه اسمها سقوط القيصر هتتنفذ فى مصر ، العمليه دى عبارة عن مخطط كامل لتدمير مصر وهى عمليه غير عاديه فهى عملية طويلة الاجل مش محدد بزمن معين وبتتم بهدوء شديد وبحركات محسوبه ))

وسكت قليلا ليرى رد فعل سعد الذى كانت ملامحه تنم عن الانتباه الشديد فقال سعد وقد فطن لما يريده نسيم : (( يعنى نقدر نقول انها مخدرات على دعاره على ارهاب على فتنه طائفيه على تحرش جنسى على زرع جواسيس على تدمير المجتمع كله ))

فقال مدير مكافحة المخدرات بهدوء: (( بالظبط ))

فاكمل نسيم : (( وبعد جهد غير عادى قدرنا نوصل للجهات اللى ورا الموضوع وقدرنا نوصل للجهة اللى هتنفذ ))

فقاطعه سعد: (( معنى كده ان الممول للعمليه دى دوله وهتنفذها بايد المافيا عشان المسؤليه ؟؟؟))

فقال وزير الداخليه : (( مش دولة واحده دول 3 ورصدوا ميزانيات مفتوحه لسقوط القيصر او بمعنى ادق لسقوط مصر ولكن كالعادة بأدين قتله ومأجورين ومنظمات إجراميه عشان تبعد عنهم الشبهه تماما وكمان المسؤليه قدام المجتمع الدولى ))

فأومأ سعد براسه علامة الفهم فاكمل نسيم : (( باختصار يا سعد المافيا بدات عمليتها فى مصر من حوالى 6 شهور وكانت البدايه هى تجنيد كل اتباعهم فى مصر للعمليه دى))

واكمل : (( وزى معرفنا المهمه هتتم على مراحل الاولى نشر السموم والمخدرات فى المجتمع لتدمير العنصر البشرى وسهولة السيطرة عليه ومع انتشار الادمان هينهار الاقتصاد ويمكن السيطره على اعداد ضخمه لتنفيذ عمليات ارهابيه بايدى مصريه وزرع الفتنه الطائفيه وازدياد التحرش وعمليات السرقه بالاكراه بمعنى ادق مصر تصبح دوله غير امنه ))

فقال سعد : (( يعنى دمر اقتصاد داخلى ودمر السياحه ودمر القيم والاخلاق ودمر الانتماء ودمر الناس نفسهم يا نهار اسود دى مش هتبقى بلد ))

فقال الوزير : (( دمر القيصر عايزين يفقدوا مصر زعامتها ووزنها عايزين نسقط ونبقى اتباع ))

وهنا قال مدير المكافحه : (( فى الفترة اللى فاتت رصدنا دخول انواع جديدة من المخدرات وبكميات كبيرة وكان الغريب هى ان الانواع دى كانت اسعارها رخيصه جدا وبدا التجار والموزعين فى نشرها فى كل حته من اسوان لاسكندريه طبعا هما لسه تحت السيطرة وبيتحركوا بهدوء عشان كده احنا سايبنهم عشان نقدر نلم كل الفران فى مصيدة واحده ))

فقال سعد : (( طبعا مفهوم سيادتك ومفهوم ليه ابتدوا بالمخدرات عشان يسيطروا على العقول الاول وبعدين يبتدوا ينفذوا كل اللى هما عايزينه ))

فاجابه نسيم : (( بالظبط ))

فقال عزمى : (( ومن فترة جالنا شخص مديرية الامن وطلب مقابلة سيادة الوزير ورفض انه يتكلم مع اى حد وبالفعل قابله وكانت لدية معلومات عن الشبكة اللى جت مصر ))

فقال سعد متسائلا : (( عملية بالحجم ده مفتكرش ابدا ان هيبقى فيها هفوات الراجل ده عرف منين ؟؟))

فابتسم عزمى وهو يقول: (( لانه كان واحد منهم ))

ثم اكمل : (( ده رجل اعمال مصرى كان شغال فى غسيل الاموال ولان سكة ابوزيد كلها مسالك حاولوا يسيطروا عليه زى مسيطروا على غيرة من ضعاف النفوس بالتهديد بفضح نشاطه وفعلا فى البداية تجاوب لكن لما عرف المطلوب منه حس ان الموضوع رهيب وبدون تفسيرات منطقيه لاقى نفسة جاى وبيعترف بكل حاجه ))


فقال سعد : (( ممكن الواحد يغلط وممكن يقع مره لكن فى ناس مهما خدتهم الدنيا مش ممكن يدمروا بلدهم يدمروا نفسهم ممكن لكن مصر لا ))

فقال الوزير بهدوء: (( بالظبط ياا سعد ))

فاكمل مدير مباحث امن الدوله : (( وبالتنسيق مع المخابرات تم الاتفاق على الاستفادة منه للحصول منه على كل الخطط والمعلومات اللى هتتاح ليه وكمان الافراد اللى هيتعامل معاهم لان دول اللى هيعرفونا افراد الشبكة بالكامل وكان كل شىء على مايرام لحد من كام يوم ))

فقال سعد متسائلا : (( متقولوش ان ادهم اللى اتقتل فى مدينة نصر هو الشخص المقصود ))

فقال نسيم فى اسى : (( للاسف هو-- والمشكلة اننا لحد دلوقتى مش عارفين ازاى اتكشف وايه سبب قتله لانه لو كان انكشف كل خططنا هتبوظ لاننا هنفقد عنصر المفاجاه وممكن كل فراد الشبكة تتغير وساعتها هنبتدى من الصفر ))

فقال سعد مفكرا : (( طب ايه المطلوب منى ؟؟))

فقال نسيم : (( القضية هتتقفل مؤقتا وتقيد ضد مجهول وانت هتشتغل بواب ))

فقال سعد : (( ياريت توضحلى اكتر ))

فقال نسيم : (( هتشتغل بواب للعمارة اللى انقتل فيها ادهم وهتكون انت وحلقة الوصل اللى كان بيتعامل معاها ادهم عشان يوصلنا المعلومات فريق تحاولوا كشف سبب القتل بصورة غير رسميه لان ده مهم لينا جدا ))

فقال سعد مفكرا : (( يعنى انا مهمتى هى ليه الراجل ده اتقتل ومين اللى قتله ))

فقال نسيم : (( بالظبط بس لازم بصورة غير رسميه عشان يطمنوا ))

فقال سعد موافقا : (( طب مين الشخص اللى هيتعاون معايا او حلقة الوصل زى مبتقولوا ))

فجذب نسيم شنطة جليدة وفتحها واخرج ملف وقدمه الى سعد قائلا : (( هنا هتلاقى كل التفاصيل وطريقة التعارف وكل المعلومات اللى تهمك فى المرحلة دى ))


وهنا وقف وزير الداخليه فوقف الجميع واقترب من سعد وهو يصافحه ويشد على يديه : (( بالتوفيق المهمه دى مش مهمه جنائيه يا سعد المهمه دى فيها كرامة مصر ))

قالها وغادر الغرفه وخلفة الجميع الا سعد ونسيم الذى قال : (( حضرتك هتفضل هنا لحد متقرا كل كلمة فى الملف دة وبعد كده هنتناقش فى بالكامل )) ثم نظر فى ساعته وقال قدامك لحد الصبح لاننا ورانا واجب عزاء.

فقال سعد مندهشا : (( عزاء !!!))

فقال نسيم : (( فى المنصورة )) قالها وهو يغادر الغرفه ويغلق الباب خلفه فظل سعد ينظر الى الباب فترة ثم حرك رأسه بلا معنى وفتح الملف ليجد صورة ادهم القتيل وصورة اخرى مكتوب تحتها حلقة الوصل .

وقد كانت الصورة لشخص معروف لدينا جميعا .

******************************************

فى ظهر اليوم التالى كانت مدينة المنصورة قد خرجت على بكرة ابيها لتوديع شهداء الواجب وكان فى مقدمة المشيعين المحافظ ومندوب عن رئيس الجمهورية ووزير الداخليه واغلب القيادات الامنيه فى محافظة الدقهليه التى عاصمتها مدينة المنصورة وكان مشهد النعوش وهى محموله على الاعناق ملفوفه بعلم مصر مشهد تقشعر له الابدان وتدمى له القلوب وتزرف له العيون اخر قطراتها من الدمع فقد جف ونضب من هول الصدمه وكثرة البكاء

وكان فى مقدمة النعوش نعش الشهيد على السمرى ومن خلفه نعوش جنود الدفاع المدنى الذين استشهدوا اثناء محاولتهم انقاذ الضحايا المحبوسين داخل القطار .

وظلت النعوش تسير ومن خلفها الاف المشيعين حتى وصلت لمثواها الاخير ووقف بحسن واخوته ووالد الشهيد واقاربه امام المدفن واستقبلوا النعش ودلفوا به للداخل بعد جهد شاق من كثرة تدافع المشيعين مممن يريدون حملة ووداعه وهبط بحسن داخل المقبرة ونحى العلم ورفع الغطاء وكان جسد الشهيد مسجى فى كفنه الابيض فشهقت النفوس وارتفع البكاء ورفع الاهل الجسد الطاهر وتساقطت قطرات الدمع كالحمم ووالده يقبله فى كل ارجائة لا يعرف راسه يقبل ام قدمه وبجهد بالغ وعلى اصوات لا اله الا الله استلم بحسن الجسد هو ورجل دين صالح يعرفه بحسن لدفنه على السنه .

دقائق عصيبه مرت على بحسن وهو يوارى جسد زوج شقيقته وصديقه الثرى هو يجد نفسه فجاءه تحت الارض وسيترك عزيز لديه يدفن فى التراب ويكون طعام لدود الارض مااتفه الحياه فى تلك اللحظات وذلك الموقف ماا أسرع الزمن ومرت الدقائق ثقيله وتماسك بحسن ورفضت دموعه ان تكون هى كلمات الوداع لصديقه فاستجمع رباطة جأشه وهو يحل الكفن من على صديقه

وقال بنفس مطمئنه وراضيه بقضاء الله (( اللهم اغفر له وارحمه وعافه واعف عنه وأكرم نُزُله . ووسع مُدخلهُ . واغسله بالماء والثلج والبرد ، ونقه من الخطايا كما ينقى الثوب الأبيض من الدنس ، وأبدله داراً خيراً من داره ، وأهلاً خيراً من أهله وزوجاً خيراً من زوجه وأدخله الجنة وأعذه من عذاب القبر ومن عذاب النار ))

وماان انتهى حتى قبله وخرج واغلق القبر واحتضن والد على بشده ويبدوا انه لم يعد يحتمل وانهارت الدموع كالفيضان ولكنها للحظات وبعد ان دعا الحضور للشهيد وقف الاهل ليتلقوا واجب العزاء قى فقيد مصر

وتوافدت الجموع ووسط تلك الجموع الغفيرة اقترب شخصين يرتديان ملابس داكنه ويخفيان جزء كبيرا من وجهيهما خلف نضارت سوداء وحينما اقترب اولهما من بحسن قال له : (( عظم الله اجرك ))

فاجابه بحسن : (( غفر الله ذنبك ))

فاكمل الرجل : (( الشهيد عاش راجل ومات بطل ومصر هتفضل غاليه علينا ))

وهنا رفع بحسن بصره بسرعه فى وجه الرجل الذى شد على يده وهو يقول: (( مستنينك بره خد وقتك ))

ثم تبعه رفيقه بتقديم واجب العزاء وهو يتفرس فى وجه بحسن ، واكمل بحسن تلقى التعازى ولكن ذهنه كان شاردا فكلمة الرجل له : (( مصر هتفضل غاليه علينا )) دى وسيلة التعارف بين بحسن وبين اى احد من طرف المخابرات المصريه او الامن بوجه عام ، وبعد ان انتهى بحسن استاذن لحظات وخرج خارج المدفن ليجد الرجلين يقفان بجوار سيارة بيجو سوداء ذات نوافذ داكنه تقف بعيد نسبيا عن حركة المشيعيين .

اقترب بحسن منهما وصافحهما مرة اخرى فطلب منه اولهما الدخول الى السياره وركب الجميع السياره ودار الحديث التالى :

فقال نسيم وقد كان احد الرجلين: (( البقاء لله ياا بحسن ))

فقال بحسن : (( ونعم بالله ))

فرد نسيم : (( انا صقر ))

فتغيرت ملامح بحسن فقد كان الاسم يعنى بالنسبة له ظابط المخابرات المسؤل عن المهمه: (( اهلا ياافندم انا عارف انتوا جايين ليه عشان ادهم اتقتل ))

فقال سعد فى موده: (( لا يا بحسن احنا جايين نعزى فى الشهيد علي قبل اى حاجة دة بطل وزميل ونقف جنبك زى ماانت واقف جنب بلدك ))

فتاثر بحسن من صدق الكلمات وقال : (( دة مش غريب عليكم بس خلينا فى المهم دلوقتى ادهم اتقتل يعنى العملية باظطت ؟؟ ))

فقال نسيم : (( سيادة الرائد سعد هيشتغل بواب فى العمارة اياها واحنا منتظرين تتعاون معاه اكتر من اى وقت فات مش هفهمك يا بحسن لازم نعرف مين قتله واتقتل ليه والا كل حاجة هتبوظ ))

فقال بحسن : ( طب وعطوه البواب هيروح فين ؟؟))

فقال سعد : (( عطوه رجع بلدهم اشترى حتة ارض وراح يزرعها بقى من الاعيان ))

فقال بحسن : (( طب بالنسيه لعلياء والطفلين ؟؟))

فقال نسيم : (( افتكر انها لسه معرفتش الخبر لان طبعا مفيش جرايد بتطلعلها ولا حد يعرف مكانها المهمة دى عليك انت بقى يا بطل ))

فقال بحسن مفكرا : (( بس دى مهم صعبه اوى ياافندم ))

فقال نسيم : (( انت ادها يا بحسن اه وعلى فكرة احنا اسفين لسوء التفاهم اللى حصل بينك وبين والدك بسبب الموضوع دة دة خطا امنى مننا ومش هيتكرر تانى ))

ثم ااضاف باسما : (( بس ابوك معارفه كتير يااخى بس متقلقش فى الوقت المنااسب اكيد هنعرفه اد ايه ابنه لازم يفتخر بيه ))

فقال بحسن : (( لا متقلقش نفسك ياافندم بس عايزين ننقلها لبيت تانى لان ممكن ابويا يروحلها وتبقى مشكله ))

فقال نسيم : (( دة طبيعى انها هتتنقل عشان ترتيبات الامن وابوك حتى لو راح مش هيعرف يطلع ))

فأوما بحسن برأسه علامة الفهم فتبعه سعد قائلا : (( هستناك يا بحسن ان شاء الله فى مصر هتلاقينى شحاته البواب ))

فقال بحسن : (( ان شاء الله ياافندم بس بعد اذنكم مش هيكون قبل الثلاث ايام بتوع العزاء ))

فقال نسيم : (( طبعا مفهوم والبقاء لله مره تانيه ))

وهبط بحسن بعد ان ودعهما وانطلقت السيارة وحينما هبط منها وجد نشوى تقترب منه وهى ترتدى ملابس حداد وتظهر على وجهها علامات الحزن : (( البقاء لله يا بحسن ))

فرد بحسن وهو يحاول الفكاك من نظرات عينيها : (( ونعم بالله يا نشوى انتى لسه هنا انا افتكرتك سافرتى مع الصحفيين اللى سافروا ))

فقالت نشوى : (( ازاى بقى كنت لازم اعزى شريفه وطنط واهلك وكمان اعزيك ))

فقال بحسن بوجه خالى من اى تعبير : (( فيكى الخير ))

فقالت فى خجل: (( على العموم انا هسافر دلوقتى خلى بالك من نفسك ))

فاجاب مستفهما : (( هتسافرى ازاااى ؟؟))

فابتسمت : (( مهو انا كان لسه معايا العربيه وناس بيغطوا الجنازة هنسافر سوا ))

فقال : (( طيب ))

فهمت بالرحيل ثم التفتت وهى على بعد خطوات وقالت : (( بحسن ابقى خلينا نشوفك )) وانطلقت بخطوات اقرب للعدو دون ان تسمع اجابه

وياليتها التفت مرة اخرى للخلف لعلها كانت تلمح تلك النظرات المفعمه بالحنين ولكنها غادرت خوفا من ان تصطدم بجفاء اعتادت عليه منذ فترة .


****************************************
حينما ركبت نشوى السياره عائده الى القاهره اختارت مقعدا فى اخر السياره بعيدا عن النقاش الدائر حول الحادثه والضحايا فقد كانت لا تريد ان تتحدث فى شىء فما قابلته هنا اعاد لها حنين الماضى ونظرت من النافذه وشردت الى ماقبل خمسة اعوام حينما تعطلت سيارتها فى طريق النصر فى ساعة متاخره من الليل وفى جو ممطر شديد البروده ولم تجد اى شخص ممكن ان يساعدها فظلت تجلس فى سيارتها الى ان وجدت شاب يدق على زجاج السياره وهو يركب دراجه بخاريه من نوع (( فسبا ))

ففتحت الزجاج فسمعته يقول : (( العربيه عطلانه ولا ايه ؟؟؟))

فقالت فى لهفه : (( اه العجله ضربت ومش معايا استبن ومش عارفه اعمل ايه ؟؟))

فقال فى مرح: (( اعملى عبيطه وتعالى ورايا على الفسبا اروحك بيتكم ))

فنظرت باستهجان وهى تقول: (( لا شكرا اركب وراك بتاع ايه هو انا اعرفك ))

فرد الشاب : (( لا متعرفنيش ولما اهلك جابوكى الدنيا دى مكنتيش تعرفى حد كبرتى ماشاء الله وبقيتى عروسه وعرفتى اهلك وصحابك وزمايلك فى الكليه والمدرسه والنادى وطول ماانتى عايشه هتعرفى ناس جديده وتتعرفى عليهم ))

فنظرت اليه بااستغراب وقالت : (( ايوه بس مش اى حد اقابله فى الشارع اتعرف عليه كده ))

فاجابها : (( مهو لو متعرفتيش عليا هسيبك كده وامشى ومش هتلاقى حد يعبرك ))

فقالت فى عناد : (( طظ فيك امشى )) تبعتها باغلاق النافذه فى عناد طفولى .

فدق الشاب مره اخرى فلم تجيبه فظل يدق النافذه برفق فقالت فى غضب : (( عايز ايه ؟؟))

فقال فى رخامه: (( اعتبر اللى عملتيه ده انك مش عايزة تعرفينى ))

فتأففت بشده وقالت : (( ماشاء الله نبيه اوى ايوه مش عايزة اعرفك ))

فقال : (( اوك يبقى تكاليف تصليح الكاوتش واتعابى 20 جند يمشى معاكى ؟؟))

فقالت فى اندهاش : (( انت هتاخد منى فلوس ؟؟؟))

فقال فى اندهاش مصطنع : (( طبعا هو انا اعرفك ؟؟؟))

فقالت : (( اه انت بترودهالى بقى ))

فاجاب : (( ماشاء الله نبيها اوى ))

فابتسمت رغما عنها فقال لها مبتسما : (( انزلى بقى عشان ارفع العربيه واصلحلك الكاوتش فى اقرب بنزينه ))

وبالفعل قام الشاب بفك الاطار وذهب لاصلاحه وعاد وقام بتركيبه فقالت له فى امتنان وخجل: (( انا اسفه انى كنت رخمه معاك ))

فقال لها باسما : (( اهلا ا جو الحنيه ده معناه انك ناوية تضربى على ال20 جند ))

فابتسمت فاجابها : (( ولا يهمك ياافندم يلا روحى بقى زمان اهلك قالبين الدنيا عليكى )) قالها وهو يهم بركوب دراجته البخاريه .

فقالت على استحياء: (( هو انت اسمك ايه ؟؟))

فقال : (( اسمى بحسن ))

فقالت باستغراب : (( نعم بحسن يعنى ايه ده ؟؟ اول مرة اسمعه ))

فاجابها وهو ينوى الرحيل : (( لو اتقابلنا تانى هقولك معناه لكن لو مش اتقابلنا اكيد مش هتنسى الاسم )) وغادر دون ان يقول كلمة اخرى .

ومرت الايام والاسابيع والشهور وتلك الصدفه الغريبه مازالت تشغل بال نشوى الى ان كانت فى معرض الكتاب واثناء خروجها من أمسيه رائعه للشاعر عبدالرحمن الابنودى وجدت نفسها امام بحسن

فنظر اليها لحظات ثم قال : (( ايه ده انتى ماشية ورايا ولا ايه ؟؟؟))

فقالت بعد أن تغلبت على دهشتها بصعوبه : (( انت بتعمل ايه هنا ؟؟))

فقال فى مرح: (( كنت جاى اتسلطن واسمع الخال عبدالرحمان ))

فابتسمت وهى لا تخفى اندهاشها وقالت فجاءه : (( انت مين ؟؟))

فقال فى هدوء : (( انا بحسن ))

فقالت بلهفه وكانها تذكرت شىء : (( ايوه ادينا اتقابلنا تانى اهوه قولى بقى يعنى ايه بحسن ))

فقال : (( بشرط تخلينى اعزمك على مهلبيه من عند خالك المالكى))

فقالت موافقه : (( معنديش مانع ))

فقال : (( اه بس هنروح بالفسبا ))

فقالت فى عناد: (( اهو ده اللى مش ممكن ابدا هنروح بعربيتى الفسبا بتاعتك دى تبيع بيها ترمس ))

فقال فى امتعاض : (( عبيطه مش عارفه مصلحتك انتى تطولى تركبى ورايا على الفسبا ))

فقالت : (( لا مطولش عشان كده مش هركب ها هتركب معايا ولا بلاش ))

فقال بحسن : (( نو هنتقابل هناك انتى بجاميكا بتاعتك دى وانا بفسبتى حبيبتى ))

فابتسمت وانطلقا وبالفعل جلسا امام المحل المنشود يتناولان المهلبيه وقد لفت نظرها مدى تلذذ بحسن بها فقالت : (( انت شكلك بتحبها اوى ))

فقال موافقا : (( المهلبيه دى انجى بتاعتى يا على ))

فقالت فى عدم استيعاب: (( نعم ؟؟))

فقال : (( يعنى هى صحبتى وحبيبتى هى الجو ))

فقالت بتهكم : (( ربنا يخليكوا لبعض فعلا لايقيين اوى ))

ثم اكملت : (( قولى بقى يعنى ايه بحسن ؟؟))

فقال : (( بصى يا ستى ))

ودائما للحديث بقيه............... ال ن ســــــــــــــــــاج
***********************************

اخبار بلدن اليومين اللى فاتو-20 نوفمبر2008

اخبار بلدنا فى 20/11/2008

=======================

الاسبوع اللى فات كنت نوهت عن برنامج الحكومه الجديد للخصخصه على طريقة عايز حقى منغير مخوض فيه لانى مكنتش فاهم حاجة والاسبوع دة فهمت شويه البرنامج اسمه برنامج الملكيه الشعبيه وده تقدم كبير عرفنا العنوان .

اه نسيت اقولكم ان محدش غير الحكومه فاهم ولا حتى عاجبه موضوع برنامج الملكيه ده والجرايد كتبت والمعارضه كتبت وكله عمال يفتى واراء ووجهات نظر كتير لدرجة ان الفار اياه ابتدى يلعب فى عبى ان الموضوع وراه إنه على رأى القرد بتاع شومبنجو .

بس مخالفا لرأى الفأر ومع احترامى الكامل للقرد الشومبنجى وبعد كل اللى انطرح الأسبوع اللى فات ومخالفا لكل اللى مش عاجبه انا عاجبنى الموضوع جدا ويظهر ان الحدايه فى 2008 ممكن تحدف كتاكيت .

وزير التعليم يحذر الطالب والمعلم من الخروج على قرار منع العنف تفتكروا بقى حد سمع كلام سيادة الوزير ولا كان مجرد كلام جرايد ؟؟؟

3 وقائع ضرب فى 3 مدارس والحذاء الحريمى كان السلاح فى واقعتين والضرب كان بين مدرس ومدرسه ومدير وولية امر ومدرس ورئيس تعليم ابتدائى يعنى من جوه الوزارة يا معلم وده كان اول رد على سيادة الوزير .

مدرس فى مدينة ملوى بمحافظة المنيا قام بالرد العملى على الوزير مش بس ضرب تلميذ بعصاية مكنسه لا وكمان ضرب المدير بالكرسى فعلا فعلا ياسيادة الوزير تحذيرك جاب نتيجه والى اللقاء فى الحلقه القادمه من مسلسل تصريحات بنى خيبان .

امين الاعلام فى الحزب الوطنى الدكتور على الدين هلال يقول( المصريون لا يتقبلون التحول الديمقراطى والناس تريد الحكومه بابا وماما وانور وجدى ) الحقيقة خفة دم سعادته ملفته للنظر سكر .

ازمة فى بنزين 80 بصورة مستفزه وطبعا الحجج كتير بس فى ازمه وتعطيل مصالح كتير .

الحديد بعد ما قلنا عقل رجع اتجنن تانى والبركه فى الاشاعات المتفبركه اسعار الحديد ارتفعت بشكل مبالغ فى الاسبوع اللى فات والاسمنت مش لاقينه غير ان هو كمان سعره ارتفع .

فاكرين فى العيد لما حصل تحرش جماعى فى جامعة الدول العربيه بفتايات المهم صفصفت على 2 واحد راح الاحداث عشان سنه صغير والتانى اتحكم عليه بسنه سجن يلا عقبال مايصدر قانون منع التحرش اما براوه .

فاكرين وثيقة اللب الفضائى اللى عملولها مؤتمرات وزيطة وزنبليطه واضح انها فى طريقها لمفرمة الورق بسبب انتقادات الاعلام وتراجع العرب عن تأييدها ولا عزاء لمهندس هذه الوثيقه .

حكم فريد ونادر ومحترم هو صحيح مش هيتنفذ بس عشان ميبقاش ليهم حجه القضاء الادارى تصدير الغاز المصرى لاسرائيل بااااااااااااااااااطل باااااااااااااااااااااطل باااااااااااطل طبعا الحكومه استئنفت بس مش مهم بردددده باااااااااااطل .

طبعا كنا اشدنا الاسبوع اللى فات بتصرف الخارجيه المصريه مع دبلوماسيين الدول اللى مستهبله فيها وكانت النتيجه ان 80% من الدول الاوربيه تطلب الاعفاء المتبادل لـتأشيرات الدبلوماسيين مع مصر طبعا اما براوه وعقبال المواطن المصرى .

مفتى ومؤسس تنظيم الجهاد الدكتور سيد امام عمل مراجعات كتير لفكر الجماعه اللى اسسها طبعا الدكتور ايمن الظواهرى معجبوش قام مطلع كتاب اسمه التبرئه بيرد فيه قام الدكتور سيد مطلع كتاب اسمه التعريه بيكشف فيه اكاذيب الدكتور الظواهرى ودى حاجه لذيذه جدا لانها بتكشف الحقيقه وبتسقط الفكر المتطرف وتظهر الحقيقه امام من يعتنقون ذلك الفكر .

البورصه بنت ال.... ولا بلاش بقالها 4 ايام بتقع ولسان حال كل اللى اشتغل فيها وهو مش فاهم غلطه وندمان عليها .

القراصنه لحد وقت قريب كنا بنسمع عنهم فى السيما الامريكاوى لكن يظهر ان فيلم الحقيقه ابشع كتير من فيلم الخيال عمليات القرصنه مبهدله الدنيا المصيبه انهم فى طريق قناة السويس يعنى هيتخرب بيت اقتصادنا احنا اللى انا مش فاهمه فى عصر القمر الصناعى اللى بجيب بيه بيتنا وانا قاعد مكانى مش عارفين نضرب شوية قراصنه بضربة طيران ؟؟؟؟

ولا الحكايه فيها إنه وفى ناس من مصلحتهم الموضوع ده واقصد طبعا دول بره .

خبر طريف تم توثيق 150 عقد زواج عرفى مع ان الازواج فى سن الستين والخمسين وعندهم ابناء واحفاد والكلام دة تم فى وادى مندر فى شرم الشيخ لحفظ حقوق الاجيال القادمه وحقوق المواطنين لدى الدوله وطبعا معروف ان الزواج فى البدو بيتم بالعرف والاشهار وليس بالعقود الطريف ان الازواج الستنيين كانوا فى قمة الخجل اثناء تحرير العقود وشهم كان محمر يا عينى .

========================
رحيل صلاح الدين حافظ عاشق الحرية والصحافة
http://www.almasry-alyoum.com/article2.aspx?ArticleID=186919&IssueID=1228


استطلاع رأى مهم
http://www.almasry-alyoum.com/article2.aspx?ArticleID=187072&IssueID=1229

الانترنت في مصر
http://www.almasry-alyoum.com/article2.aspx?ArticleID=187076&IssueID=1229

مولد أبو حصيرة عربدة يهودية أم حرية دينية ؟
http://www.masrawy.com/News/Egypt/Politics/2008/november/19/7asseera.aspx

تعذيب المصرين في مصر لصالح واشنطن يا مشاء الله
http://www.almasry-alyoum.com/article2.aspx?ArticleID=187179&IssueID=1230

=================================

هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.

ال ن ســــــــــــــــــاج

اخبار بلدنا اليومين اللى فاتو-13 نوفمبر2008

اخبار بلدنا فى 13/11/2008

====================

· طبعا كلنا تابعنا قصة هايدلينا والقضاء اللى انتهت بحكم يقضى ببراءة جميع المتهمين زى احكام كتير بتصدر ببراءة الجميع وكان مفيش متهم لكن عشان فى نائب عام محترم الراجل نقض الحكم واخيرا تحقق له مااراد فقامت محكمة النقض بالغاء براءة هانى سرور واخرين وارسلت القضية للاستئناف لاعادة المحاكمه قدام الجنايات اماااااا براوه وعقبال العباره.

· لابسه عباية وحجاب محترم وقفاز وماشيه مع طفل وبردة تم التحرش بها دة ملخص ماحدث لفتاه فى اكتوبر عروسه جديدة ماشية مع بن اختها طفل 3 سنين جه عامل اهبل مشى وراها و على طريقة عبدالفتاح القصرى ياصفايح الذبدة السايحه يا جوز يالوز طبعا محدش عبره قام اتحرش بالبنت واهو اتمسك ولا هينفعوا عبدالفتاح ولا هيثم دبور وهيتنفخ ان شاء الله.

· بيقولوا فى نظام جديد للخصخه والحقيقه مفهمتش حاجة او محاولتش افهم لحد مالقانون يتقلوظ ويتوافق عليه من المجلس ونشوف اخر صوره بس هو المفيد انه على طريقة عايز حقى .

· كل ميطلع وزير الماليه يقولك بنستورد ب6 مليار قمح لحد محفظناها بس محدش قلنا انه بيستوردولنا علف حيوانى على انه قمح ودى الفضيحة التى ثبت تورط الحكومه والقطاع الخاص فيها لا غنى ولافقير بقى الكل اكل عيش حيوانى مصر بتتقدم بينا فعلا ربنا يوفقكم .

· مسلسل تعذيب التلاميذ فى المدارس وصل لدرجة ان مدرس يجبر تلميذه فى الصف الرابع بخلع بنطلونها ويسخر منها يعنى فى شوية معقدين بيدرسوا لاطفالنا فى المدارس.

· 3 مشاجرات فى مدارس القاهرة تنتهى باصابات لمعلمين وتلاميذ والسبب يبدا بسوء المعاملة مرورا برفض تلميذ جمع القمامه من الحوش واخيرا لخلاف على المجموعات المدرسيه مش عارف اقول ايه الحقيقه ولسه الوزير قاعد على كرسيه بيرغى فى الكادر واللى مكدرش التعليم يحتاج قياده قبل اى شىء اختاروا ناس الاول قبل متعملوا قوانين وتشريعات.

· مصادمات الحقيقه محزنه بين البدو فى سيناء والداخليه اسفرت عن مقتل 4 من البدو واصابات فى الشرطه وحرق وتلفيات كثيره لا تعليق لان اى كلام هيبقى من باب اللى ميعرفش بيقول عدس .

· اكتشوفوا هرم جديد فى سقارة عشان يبقى كده عندنا بتاع 119 هرم حجارة بس ياترى فى كام هرم بشرى نفكر كده مع بعض ؟؟

· د احمد فتحى سرور رئيس لمجلس الشعب للسنه 19 على التوالى منذ اغتيال رفعت المحجوب وحتى الان طبعا نبارك لاحمد بيه لكن هلى نبارك للشعب اللى هو رئيس مجلسه ؟؟

· على طريقة فيلم السفارة فى العمارة بس مع تغيير الاسم للسفير فى الجيم قاضى حرر بلاغ ضد السفير الاسرائيلى وحرسه بعد التضييق عليه فى محل مسكنه الحكاية ان الشاب السفير بيروح جولدن جيم اللى فى المعادى والجيم فى الدور ال8 والقاضى ساكن فى ال3 جه القاضى يخرج من باب العماره اتمنع—حد يقولى ليه؟؟؟ لحد السفير ميطلع عشان الامور خايف على نفسه احسن حد يعمل فيه حاجه وحشه.

· وزارة الصحه رفعت سعر 55 نوع دواء جديد وفى انواع وصلت الزيادة فيها لحد دلوقتى ل400% وبعدين ؟؟

· اعتراضات ووقفات احتجاجية مسانده فى كل مكان للطبيبين المحتجزين فى السعوديه .

· وزارة القوى العامله تحظر سفر الاطباء الى السعوديه بسبب ازمة الطبيبين والقرار جاى من فوق عشان للصبر حدود واما نشوف هترسى على ايه .

· مصر تمنع 3 دبلوماسيين اوروبيين من دخول اراضيها لعدم حصولهم على تأشيرات مسبقه من منطلق مبدا المعامله بالمثل ايون كده بقى بينوا كرامه احسن خلاص الحصى فى الارض بقى اغلى مننا .

=====================
هيكل يتحدث عن انتصار اوباما
http://www.almasry-alyoum.com/article2.aspx?ArticleID=185676&IssueID=1218

ومازال يتحدث
http://www.almasry-alyoum.com/article2.aspx?ArticleID=185680&IssueID=1218

موقف انسانى تجاه اسرة الشهيد الشماشرجى
http://www.almasry-alyoum.com/article2.aspx?ArticleID=185744&IssueID=1219

اسكول مصر
http://www.almasry-alyoum.com/article2.aspx?ArticleID=186289&IssueID=1223

حمدى قنديل ووثيقة البث
http://www.almasry-alyoum.com/article2.aspx?ArticleID=186245&IssueID=1223

==============================
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.

ال ن ســــــــــــــــــــــاج

الجزء الخامس..... مين اللى سرق بحسن ؟؟؟

-5-

حينما دلف بحسن داخل الشقه وجد امامه شخص لم يكن يتوقع وجوده فقد وجد شرف الذى ما ان رأه حتى قفز قائلا فى عصبيه واضحه : (( اية يا بحسن دوختنى عليك وبعدين انت جايب موبيل عشان ترميه فى الشقه ))

فنظر بحسن باندهاش ثم قال فى لهفه : (( ماما جرالها حاجة؟؟))

فاطرق شرف بوجهه فى الارض وهو يقول : (( لا بابا ))

فقفز بحسن ليقطع المسافه الفاصله بينهما وهو يمسك به بقوه قائلا : (( ماله؟؟؟؟))

فرد شرف: (( جتله ذبحه ودخل المستشفى))

فصمت بحسن برهه ليتمالك مشاعره ثم قال مخاطبا على الذى كان بصحبة شرف (( خلى بالك من البنات اى حاجة يعوزوها تجبهلهم ))

ثم اكمل وهو يخرج رزمه من النقود ويقول لسعاد : (( امسكى الفلوس دى خليها معاكى واى حاجة هتعوزيها على هيجبهالك متديلوش فلوس الفلوس دى عشان لو اخواتك احتاجوا حاجة ))

همت بالرد فقال بحزم : (( مش عايز كلام كتير دى فلوسكم وانتوا شايفين الظروف لولا كده مكنتش سبتكم خلوا بالكم من بعض ))

فقال عفاف : (( طب ابقى طمنا يااستاذ بحسن على والدك متنساش والنبى ))

فرد وهو يهم بالمغادره وخلفه شرف وعلى : (( ان شاء الله ))

وهبط الجميع لاسفل وقال بحسن مخاطبا على وهو يهم بركوب السيارة مع شرف: (( خلى بالك من الشغل يا على وخلى بالك من البنات انا عارفك راجل وادها والموردين لو جم ومحتاجين فلوس احكلهم على الظروف محدش هيتكلم معاك فى حاجة ولو فى حاجة ضرورى ابقى كلمنى على موبايل شرف ))

فقال على وهو يغلق الباب لبحسن : ( متفكرش يااستاذ المهم طمنى على صحة الحج كل حاجة هتمشى زى ماانت عايز بس امانه عليك متنفضش كلمنا طمنا ))

ثم قال بلهفه وكانه تذكر شىء مهم : (( على فكرة يااستاذ بحسن الاستاذ ادهم اتقتل )

قال على ذلك وكان شرف بدا يتحرك فواقفه بحسن بشده وهبط من السيارة وهو يقول فى استفهام مشوب بالحذر: (( الاستاذ ادهم مين ))

فقال على : (( اللى ساكن فى العمارة اللى فى وش الكشك الراجل اللى مكناش بنشوفه كتير ده ))

فاطلت من عينى بحسن نظرة تنم عن الغضب وتمتم قائلا : (( وبعدين بقى هى الدنيا بتدربك مرة واحده كده ليه ؟؟)

فقال على : ((( هو حضرتك قلت حاجة يااستاذ))

فقال بحسن وهو يعاود ركوب السيارة : (( لا مفيش )) ثم اكمل مخاطبا اخية : (( يلا بسرعه على المنصورة ))

وانطلق شرف فى اقصى سرعه واثناء الطريق عرف بحسن من شرف ما دار وسبب سقوط والده والغريب ان كل هذا لم يقلقه مما ااصاب شرف بالدهشة وقال

(( فى ايه يا بحسن انا حاسس ان الموضوع مش فارق معاك مين الست دى وايه الحكايه ؟؟))

فنظر بحسن نظرة طويله لاخيه ثم نظر امامه وهو يقول: (( ماما عاملة ايه واخواتك ؟؟))

فكرر شرف السؤال بنبره اعلى فقال بحسن فى هدوء: (( مالكش دعوه سوق وانت ساكت وفكر فى ابوك غير كده متسألش ))

ويبدوا ان الاجابه كانت اكثر من احتمال شرف فكبح دواسة الفرامل فى شدة ثم نظر الى بحسن وقال : (( انت ليه بتعمل كده دة انا اخوك واللى مرمى فى المستشفى دة بسببك ابوك طمنا يااخى قولنا اية الحكايه بلاش عشانى وعشان ابوك عشان امك اللى مش دريانه بحاجة من ساعة اللى حصل وعشان سمعتنا يااخى عشان اخواتك البنات عشان شكلنا قدام الناس ))


كان بحسن اثناء حديث شرف يمسك ورقة وقلم ويدون بعض الارقام وبعد ان انتهى اخيه نظر اليه نظره جانبيه وقال : (( خلصت اللى عندك ممكن تسوق بقى خلينا نوصل عشان نبقى جنب ابوك وامك اللى بتدينى محاضرة فى البر بيهم وانت مش فاهم حاجة ))

وصمت

فتحرك شرف وهو يتمتم بعبارات ساخطه وخيل له ان بحسن لن يتكلم مرة اخرى ولكنه فوجىء ببحسن يقول: (( انتوا مش بيعلموكم حاجة فى اكاديمية الشرطه اسمها المعلومة على قدر الحاجة ))

فقال شرف وهو ينظر امامه : (( تقريبا ))

فقال بحسن : (( يبقى ياريت تستفيد من اللى بيعلمهولك عشان ترتاح وتريحينى وكمان تكون ظابط شاطر ))

فهم شرف ليرد ولكن بحسن اشار اليه بيده علامة الصمت فلم يجد شرف امامة سوى القيادة باقصى سرعه

وفى اقل من ساعة ونصف كان الاثنين يدلفان الى المستشفى وهما لا يدريان سبب لكل ذلك الهرج والمرج ليس فى المستشفى فحسب بل فى المدينه كلها وفى تلك الزحمه لمحتهما شريفة التى جاءت مسرعه واحتضنت بحسن بشدة وهى تقول : (( وحشتنى يا حبيبى وحشتنى يا بحسن))

فاحاطها بحسن بدراعه فى حنيه شديد وهو يقول: (( وانتى كمان ياستى طمنينى بابا ازيه دلوقتى ))

فقالت فى اسى : (( الحمد لله ان شاء الله هيكون كويس – ابوك تعب اوى يا بحسن وانت قلبك بقى قاسى اوى وعلى طول كده تاعب قلوبنا عليك))

فاربت على كتفها وهو يتحرك معها ومع شرف لاعلى : (( انا يا شريفه ماشى بلاش نتكلم دلوقتى بعدين نبقى نشوف الحكاية دى))

فقال شرف ليغير دفة الحديث: (( هو فى ايه ياشريفه ايه الناس والحركة دى كلها))

فقالت فى سرعه وكانها تذكرت شىء: (( اه اسكتوا حصلت حادثة قطر كبيرة دة حتى على استدعوه ))

ومع انتهاء حديثها وصلا الى العناية المركزة وما ان راى بحسن والدته حتى هرول اليها واحتضنها بشدة واخذ يقبلها ويقبل يديها

وهى تبكى وتقول: ( ابوك هيروح مننا يا بحسن ))

فقال وهو يحتضنها بشده : (( ان شاء الله هيكون بخير ياحبيبتى دة ابويا لسه شباب انتوا بس اللى مخضوضين زياده ))

ثم وقف واحتضن شريف وشاهيناز وتابع مصافحة كل اقاربهم ثم جذب شريف من زراعه وهو يقول: (( تعالى ودينى للدكتور اللى ماسك الحاله ))


بعد مقابله قصيره علم بحسن حالة والده واطمن عليه واثناء ذلك وجد بحسن وشريف شرف يهرول اليهم وقد تغير لون وجهه وهو يصرخ بشدة : (( مصيبه مصيبه ))

**********************************

دلف الرائد سعد النمر رئيس مباحث مدينة نصر الى مكتب اللواء عزمى صادق مساعد وزير الداخليه الذى استقبله بود وهو يقول: (( ازيك يا سعد وعامل ايه فى المباحث))

فاجاب سعد فى تودد::::: ((تمام ياباشا بس الخدمه مع سعادتك فى المخدرات كان ليها طعم تانى))

فاجاب اللواء فى دعابه : ( تقصد ريحه تانيه ))

فقال سعد : (( اه ياباشا بس سعادتك بقى اتريقت ونقلتنى المباحث ))

فقال عزمى فى جديه : (( اسمع يا سعد انت معاك قضية قتيل مدينة نصر صح ))

فقال : (( تمام سعادتك ))

فقال عزمى فى استغراب: (( متقعد يابنى انت واقف ليه ؟؟ ))

فجلس سعد واكمل عزمى : (( انهارده بليل تلبس كاجوال وتغير فى شكلك ركب سكسوكه اعمل اى منظر كده – وبعدين هتروح العنوان ده )) قال الجمله الاخيره وهو يعطى ورقه مطويه لسعد.

فقرا سعد الورقه بصوت مرتفع: (( فيلا نازك -- المعادى))

ثم نظر الى عزمى وقال : (( وبعدين سيادتك))

فقال عزمى : (( متنساش وانت رايح تبقى تاخد معاك هديه ورد من بتاع الفلانتين دبدوب ))

فقال سعد فى استنكار: (( ورد –دبدوب يانها ر اسود دة انا لو مراتى عرفت تدبحنى)) وتبعها بضحكه مرتفعه

فنظر اليه عزمى نظره خاويه على اثرها قال سعد: (( معاك سعادتك ناخد معانا ورد وبعدين))

فقال عزمى : (( هتفتحلك بنت اول متشوفها هتقولها الحلوه دى قامت تعجن فى الفجريه ))

فقال سعد فى تلقائيه : (( والديك بيدن كوكو كوكو فى البدريه))

فنهره عزمى: (( لا هى اللى هتقولك كده ))

فقال سعد : (( ياسلام ))

فقال عزمى فى حزم: (( سعد ))

فقال سعد فى تزمر: (( ياباشا انت عارفنى لما مبكنش فاهم ببقى غير مستقر وهتاخد منى لخبطة للصبح فهمنى سيادتك ايه الحكايه ))

فقال عزمى وكانه لم يسمع الجمله الاخيره : (( لما تقول والديك بيدن هتقولها هابى زلانطين داى ))

فهم بالكلام ولكن عزمى اكمل: ( هتقوم واخدة منك الهديه وحضناك وهتقفل الباب ))

فابتسم سعد: (( بجد ايون كده هو ده الشغل وبعدين سعادتك ))


فقال عزمى وهو يقف منهيا المقابله : (( الساعه 7 تكون بدق جرس الفيلا بالتوفيق يا سعد ومش عايزين غباء زى عملية القنطره ))

فقال سعد وهو يرفع يده بالتحيه : (( تمام سعادتك )) قالها وهو يغادر وتبدو على وجهه علامات التزمر فسعد النمر من اكفاء ظباط الداخليه خدم فى العديد من القطاعات وفى كل مكان اثبت كفاءه واكتسب صداقات رؤساءه للدرجة التى تجعلهم فى بعض الاحيان يرفعوا التكليف وهو من النوعيه خفيفة الظل والتى لا تستطيع العمل بدون دعابه ولكنه فى نفس الوقت شرس وقد سبب له ذلك بعض المشاكل فى بعض العمليات .
وفى الساعه السادسه دخل شاب محل ورد يبدوا من مظهره انه خنفس يرتدى بنطلون باجى وقميص هاواى ازراره مفتوحه لنصف صدرة ويرتدى نضارة شمس ويضع فق راسه قبعه قال مخاطبا العامل : (( انا عايز ورد ))

فرد العامل فى ادب جم : (( حضرتك تفضل نوعيه معينه ؟؟ ))

فقال فى لا مبالاه: ( ( هو الورد بقى انواع كمان ))

فقال العامل : ((( ايوه حضرتك انواعه كتير ولكل نوع مناسبه ولكل نوع معنى ومغزى))

فقال الشاب : (( اه طيب اصلى مشترتوش قبل كده بقولك ايه انا مصاحب جديد وعايز بوكيه يلوحها ))

فابتسم العامل: (( من عنيا حضرتك ))

واخذ العامل يعد بوكيه بتأنى شديد مما ااصاب سعد الذى كان متخفى بالملل فقال فى نفاذ صبر: (( ياعم انجز حد قالك انى رايح اقابل ملكة انجلترا ))

فابتسم الشاب باحراج وقال : ( حاضر حضرتك ))

وبعد دقائق كان البوكيه جاهز وقال العامل فى ادب: (( 150 جنيه حضرتك))

فنظر سعد للورد بين يديه باحتقار والى العامل وهو يقول: (( 150 جنيه فى شوية زرع مكنت روحت اى جنينه وخلصت-- الشغلانه دى جايه علينا بخسارة ))


ودفع سعد المبلغ على مضض وتمتم وهو خارجا من المحل قائلا : (( قال ومراتى كانت عايزانى كل اسبوع اجبلها بوكيه يا نهار اسود دة انا كنت شحت من نص الشهر ))

وفى الوقت المحدد كان سعد يدق جرس الفيلا وفتحت له فتاه فى منتصف العشرينات وما ان رأها سعد حتى انفرجت شفتيه وقال : (( يانهار اسود بقى دى تقوم تعجن امال اللى عندى فى البيت تعمل ايه ))

فقد كانت رائعة الحسن فقال وهو يغمز باحد عينيه ويحرك جسمه كالخنافس: (( الحلوه دى قامت تعجن فى الفجريه ))

فابتسمت الفتاه قائله : (( والديك بيدن كوكو فى البدريه ))

فقال وهو يهديها الورد : (( ب 150 جنيه والله ))

فقالت فى قلق : (( نعم ))

فقال وهو يتدارك الموقف : (( هابى زلانطين داااى))


فابتسمت وهى تحتضنه وتقول : (( يااا حبيبى يو ار سو كيوت ميرسى ))

واغلقت الباب وما انا اغلقت الباب حتى تبدلت ملا محها تمام وارادت انا تبتعد عن سعد ولكن سعد امسك فيها بشده فقالت وهى تهمس فى اذنه : (( الكاميرات مراقبه كل حاجة وسيادة الوزير هيشوف الشريط ))

فانتفض سعد وهو يقول مخاطبا الفراغ وتحدد عينيه المدربتين اماكن الكاميرات : (( تمثيل والله بسبك الدرو سيادتك))

فقالت له وهى تبتسم : (( اتفضل معايا ياسيادة الرائد ))

وتوقع سعد الصعود الا انها دخلت به لممر ضيق ومنة الى بهو الفيلا وفجاءه وجد نفسه فى مكان عجيب فقالت له اول غرفه على ايدك الشمال منتظرينك هناك .


فدق سعد على باب الغرفه عدة طرقات فأتاه صوت من الداخل يدعوه للدخول فدلف للغرفه واغلق خلفه الباب وكانت فى انتظاره مفاجاءه مذهله .

**************************

فجاءه وجدت نشوى نفسها وجها لوجه فى مقابلة بحسن وللحظات ظل الاثنين يحدقان فى بعضهما البعض وكانهم يعاودون الذكريات ولكن التهاب الموقف لم يسمح لهما بالشرود كثيرا فقال بحسن : (( ازيك))

فاجابت نشوى فى لا مبالاه: (( كويسه الحمد لله ))

فقال بحسن : (( طيب )) وتركها وغادر

فظلت فى مكانها فترة ثم تبعته قائله : (( ايه طيب دى وبعدين ازاى تسبنى وتمشى ))

فقال وهو يتحرك بين الحطام : (( نشوى مش نقصاكى خالص ومش ناقصه دلعك ))

فقالت نشوى فى عناد: (( انا بدلع ولا انتى اللى مش طايقلى كلمه من ساعة اللى حصل))

وهنا وقف بحسن وحد ق فيها طويلا واقترب مما سبب لها بعض الارتباك وقال وهو ينظر لعينيها مباشرة : (( انا جوز اختى مرمى تحت الانقاض مش عارفين حى ولا ميت يبقى انا مش طايق كل الناس مش مش طايقك انتى بس وبعدين انتى عارفانى خلقى ضيق فسبينى دلوقتى ))

وهنا تغيرت ملامحها وتحولت من التزمر الى ملامح اقرب للبكاء: (( جوز اختك مين شريفه ؟؟))

تحرك نحو شرف وشريف ويقول لهم : (( ها لسه مفيش جديد ))

فقال شرف : (( لا لسه اخر مرة شافوة لما دخل مع بتوع الدفاع المدنى ينقذ اطفال وناس كانت محصراهم النار ))

فقالت نشوى بدافع فضول الصحافة: (( هو بيشتغل ظابط ؟؟؟ ))

فقال شريف وهو ينظر اليها نظرة هادئه لا تتناسب مع الموقف : (( ايوه ))

ظلت عمليات الانقاذ على قدم وساق ومحاولة اخماد الحرائق مستمره التى كانت تلتهم كل شىء ليس الحديد والمقاعد الخشبيه وفقط بل انها تلتهم احلام الناس زهرة الشباب فهى كانت تلتهم قلوب اهالى الضحايا قبل كل ذلك وفى ساعة متاخرة تم اخماد كل الحرائق وبدا نقل الجثث التى كانت قد تفحمت تماما .

واستبد بالجميع القلق فلم يعد هناك احياء او مصابين جثث وفقط وانخرط شرف فى البكاء ووجدت نشوى دموعها تنساب على وجنتيها بدون وعى وقد نست ما قد جاءت من اجلة فقد اصبح الموضوع شخصى بالنسبة لها وكان بحسن يتحرك بثبات محاولا الوصول لزوج شقيقته وفجاءه جاءه بعض زملاء على وعلى ملامحهم تظهر الحقيقة جليه واقترب منه صديق يعرفه واحتضنه وهو يبكى يقول : (( على شهيد يا بحسن ))


فقال بحسن : (( عايز اشوفه هو فين ؟؟))

فاجابه ظابط فى ملابس مدنيه : (( بلاش يااستاذ بحسن الشهيد على جثته اتفحمت ))

فقال بحسن : (( عايز اشوفه ))

وامام اصراره جذبه احدهم الى سيارة اسعاف تقف بعيد وقال بلهجه آمره للعسكرى افتح الباب وقال لبحسن : (( انا لله وانا اليه راجعون – اتفضل شوفه )) وصافحه بشده ودلف بحسن وظل بالداخل لحظات ثم خرج من السياره ليجد شريف وشرف ونشوى فى مواجهته ولاول مرة يرى احد دموع بحسن وكانت تنساب فى غزارة .

وهنا احتضن شرف وشريف بحسن بشده وانخرط الجميع فى بكاء شديد شاركهم فيه زملاء الشهيد من الظباط والعساكر وكل من شاهد بطولته وتضحيته بحياته من اجل انقاذ غيره ولكن نشوى لمم تتمالك نفسها وسقطت مغشيا عليها .

وبعد قليل توجه بحسن للمستشفى وقد فوجىء بعدد من القيادات الامنيه يصافحونه لتقديم واجب العزاء واقترب الحشد من اهل على ومن شريفه وقد كانوا جميعا فى الدور العلوى بجوار ووالد بحسن وحينما اقترب هذا الحشد ارتسمت على الوجوه علامات الحذر والقلق

ولكن شريفه ابتسمت او حاولت ذلك وقالت لبحسن : (( بابا فاق يا بحسن ))

فلم يجيب احد ووجدت لواء يقترب من والد على وهو يقول: (( الدنيا دى فيها ناس بتيجى وتمشى وتعيش مهما تعيش ومحدش يحس بيها وفى ناس بتبقى فى حياتنا زى الضيوف مش بيفضلوا معانا كتير بس على الرغم من كده اللى زيهم هما اللى بيعيشوا واحنا اللى بنموت – البقاء لله ولا تحسبن الذين قتلوا فى سبيل الله امواتا بل احياء عند ربهم يرزقون مصر كلها تقدم وجاب العزاء فى الشهيد على السمرى )) قالها وهو يشد على يد الرجل الذى اصابه الخبر بالذهول .

ولكن والدته واخوته اخرجوه من هذا الذهول فما ان سمعوا تلك الكلمات حتى فقدت والدته الوعى وصرخت اخته بهيستريه ولكن شريفه نظرت لبحسن وهى تقول: (( على ممتش يا بحسن ده اكيد انتوا غلطانين ))

فاقترب منها بحسن واحتضنها فقالت وهى على نفس الحاله: (( انت بتحضنى ليه على مممتش مممتش ممشتش)) قالت ذلك وهى تبعده عنها .

واااااااا سقطت .

ودائما للحديث بقيه............... ال ن ســــــــــــــــــاج

اخبار بلدن اليومين اللى فاتو-06نوفمبر2008

اخبار بلدنا اليومين اللى فاتو 06-11-2008

======================

· الاسبوع اللى فات كان فى مؤتمر الحزب الوطنى اللى هو الحزب الحاكم فى بلدنا والمفروض انه مؤتمر كشف حساب وطبعا المفروض حاجة وواقعنا حاجة تانى .

· ابرز حاجه فى المؤتمر الهجوم الشديد من اعضائه على المعارضه المصريه او مايسمون بالمعارضه وكان وجهة نظر الوطنيين ان المعارضيين شريرين ومتخلفين وعايزين يرجعوا بينا للعهد البائد .

· قام المعارضيين الاحرار مسكتوش والقوا تصريحات ناريه كلها تنصب فى بوطقة ان الحزب الوطنى مفلس وهو حزب ضايع وضعيف اخر حاجة وانه هو اللى جايب البلد لورا .

· ومابين دول ودول احترت واحتار دليلى ومش قادر اقول ال2حلوين ال2 طعمين على رئى الاغنيه اياها وكما قلنا من قبل كل يغنى على ليلاه واحنا الشعب ملناش علاقه لا بدول ولا بدول احنا مع رغيف العيش وكارت المحمول وفلوس المدارس والدروس الخصوصيه والبطاله الخ.......... .

· فقدت مصر عالم محترم وشيخ جليل ورجل فى زمن عز فيه الرجال هو فضيلة الدكتور / محمد المسير – اذا اردت ان تسمع رجل مقنع وواضح وصريح لا يجامل ولا ينافق ولا يغير حديثه فكان يجب ان تسمع هذا الرجل العجيب بقى انى قعدت ادور على خبر وفاته كتير بعد ان علمت بالصدفه من برنامج الطبعه الاول بخبر وفاته شوفتوا كده فى الدنيا رجل مثله نعلم بخبر وفاته صدفه هنقول ايه اخر الزمن انا لله وانا اليه راجعون رحمة الله عليك يا دكتور محمد.


· نهى رشدى كنا اتكلمنا عليها اللى بيسموها فتاة التحرش اللى حيينا شاجعتها وفى نفس الوقت كان فى كذا علامة استفهام على انسحاب محاميتها وانضمامها للخصم وكان رد نهى للمصر ى اليوم لست اسرائيليه وتصريحات المحامية جريمه ومش مهم عندنا اسرائليله ولا غيره لو السائق فعلا كان اتحرش بيها فعلا بس هى الفكرة هل هو اتحرش بيها فعلا ؟؟

· وحدة الغسل الكلوى بالمنصورة المياه انقطعت عنها 5 ايام ومحدش اتحرك رئيس المرز وصل خرطوم بكولدير فى الشارع عشان عمليات الغسيل متقفش !!! فى سؤال رفيع لو كانت المياه دى انقطعت ساعتين 3 عن فندق ولا قريه سيايحه ولا ملعب جولف ياترى كان ايه اللى هيحصل ؟؟؟

· نتيجة الكادر ظهرت للمعلمين وكانت النتيجة 85.9% طبعا الاعتراضات كتير والتظلمات كتير وأى كان موقفنا من الكادر ومن المعلمين ياريت الموقف دة يخلى المعلمين يحسوا بطلبة الثانويه العامه عشان كل ماالطلبه تقول الامتحان صعب النتيجه غلط يطلع المدرسين يقولوا مش صحيح وكان الحل انهم يتذوقوا من نفس الكاس بس مين يفهم ؟

· مسلسل التعذيب فى المدارس مازال مستمرا وكل يوم طفله تموت عيال تتعبط وكان مفيش حاجة حصلت بس كتر خيرة وزير التربيه والتعليم كلم اسرة الولد اللى مات فى اسكندريه على ايد المدرس وقال لاهله انا والوزارة اسفين وسنعوضكم لا تعلبييييييق .

· على الرغم ان الجمله الشهيره ( هى دى مصر يا عبله )) اللى اتقالت فى فيلم الصعود الى الهاوية اصبحت جملة للسخريه وليس للتعبير عن الانتماء وحب الوطن لكن ملقتش غيرها يعبر عن الخبر ده (( الاقباط الارثوذوكس يحتفلون ببدء الصلاه بكنيسة المعادى ومعهم المسلمون المساهمون فى بنائها )) .

· كل يوم اعتامات ومظاهرات ززقفات احتجاجية فى كل حته فى مصر من اسوان لاسكندريه من الطلبة والفلاحين من الممرضات والمدرسين من الاطباء والمستثمرين باختصار كل الفئات مش عاجبها حاجه ومش عاجبها حد بس لو فضلت الطريقة دى هى الطريقة الوحيدة للحصول على الحقوق فى بلدنا بعد شويه هتفقد مفعولها لازم يكون فى حل .

· كل يوم نسمع عن اغلاق مستشفيات وغرف عمليات ومنع استخدام انواع غاز معينه ومحدش بقى فاهم حاجة والجديد بقى بيع المستشفيات بس بيقولوا اطمنوا القصر العينى مش للبيع يعنى الصحة والتعليم بيتخصخصوا هو ايه اللى فضل من حقوق المواطن كده احسن عمال ادور مش لاقى .

· استراليا ترفض بيع الخرفان لمصر لسوء معاملاتها للحيوانات عالم رايقين اوى بجد .

· نظافة القاهرة تزيل 50 شجرة من اشجار العباسيه بحجة منع الاعمال المنافية للاداب بقى قص الشجر هيمنع الاعمال المنافية للاداب فى مكان اصلا بؤرة الحركة الجامعات والكتدرائيه ومسجد النور اااااااااااادينىىىى عقلللللللك.

· بعد فشل وزارة البيئة وزارة الزراعه تتبنى مسئولية القضاء على السحابة السوداء وانا شايف ان المسئوليه مش مسئوليه حكوميه بقدر مهى مسئولية شعبيه من الفلاحين والمحليات يااخونا كفايه تنبله بقى .

· محافظ القاهرة يحيل رئيس فرع هيئة النظافه بمدينة نصر للتحقيق بتهمة الاهمال والتقاعس عن اداء الواجب امااااااااا براوة معلش الخبر ده على مزاجى حيث انها منطقتى ملعبى وصباى الغاليه مدينة نصر .

· أوبامبوا مسك يااا رجاااله على رأى واحد صاحبى سودانى متفائل اوى بأوبامبوا بس هل ده تفائل بأوباما فعلا ولا فرحه بسقوط الطاغيه بوش يلا اهو هيترمى فى مزبلة التاريخ زى كل اللى زيه هو ده اللى مهما حاولوا انهم يزيفزه مش هيعرفوا ابدا .

=======================

· حمدى قنديل هؤلاء قادرون على حكم مصر
http://www.masrawy.com/News/Egypt/Politics/2008/november/5/hamedi-kandeel.aspx

· والله ونورت يا عبدالرحمان
http://www.almasry-alyoum.com/article2.aspx?ArticleID=185359&IssueID=1216

· الوطنى يرفع شعار لا للتغيير
http://www.almasry-alyoum.com/article2.aspx?ArticleID=185376


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.


ال ن ســــــــــــــاج